Архив новостей
понвтрсрдчетпятсубвск
    123
45678910
11121314151617
18192021222324
25262728293031
       

Главная Здравоохранение Уколасьны? Али висьны?

Уколасьны? Али висьны?

27 июля 2021

Россияын олысьясӧс тыр ӧдӧн вакцинируйтчӧны коронавируса выль висьӧмысь. Та дырйи унаӧн вӧчӧны тайӧс ас окотасьыныс, кодкӧ – уджӧн могмӧдысьыслӧн тшӧктӧм серти, но эмӧсь и пыксьысь-ӧтдортчысьяс. Коми Республикаын бура тӧдса войтырлысь ми юалім та кузя видзӧдлассӧ.

Александра Бушуева, «Комиинформ» юӧртан агентствоӧн веськӧдлысь:
– Веськыда шуа, вакцинируйтчыны мӧвпыс юрӧ весиг эз волы, ӧд вакцинаыс помӧдз туявтӧм на, и код на тӧдас, мыйӧдз сійӧ вайӧдас. Сэк жӧ воӧн-джынйӧн нин ми став семьяӧн быд ногыс видзчысям быдсяма висьӧм-нёрпалӧмсьыс. Уджъёртъясысь кодсюрӧ весиг серавлісны та кузя...
Меным висьӧмыс, тыдалӧ, кӧвъясис самолётын орччӧн пукалысь лёкысь курксысь-кызӧдысь аньсянь. Да, ме вӧлі маскаа, но и тайӧ эз отсав. Нёрпалӧм да вуджан висьӧмысь бурдӧданінын куйлӧм-туплясьӧм бӧрын верма стӧча шуны, мый коронавируссьыс некодӧс абу видзӧма. Олӧмсьыд тӧлысьӧн-джынйӧн воштӧм дорысь кокниджык уколасьны.

Галина Бутырева

Галина Бутырева, коми гижысь:
– Коді чайтӧ, мый висьӧмыс мунас сы бокті, да оз видзчысь, сійӧ быть висьмас. А мыйӧн тайӧ помассяс, некод водзвыв оз тӧд. А водзӧсӧ, гашкӧ, висьӧм бӧрас антителаыс отсаласны, либӧ вакцинаыс лӧсялас. Менам матыссаяс да тӧдсаяс пӧвстысь унаӧн висисны, ачым куйлі больничаын ковидӧн. Енмыс видзис, ӧні ставыс бур. Антителаыс эмӧсь и, на вылӧ лача кута. Но бырас да, чайта, тӧдсаясӧй моз ме уколася жӧ.
Мукӧдыс моз жӧ ме майшася, гӧгӧрвотӧмыс уна на да, но мӧд петан туйыс талун кежлӧ абу. Сиа ставныслы – висьысьяслы, бурдӧдысьяслы да висьтӧмъяслы – дзоньвидзалун. Кута лача, вакцинаыс отсалас.

Алексей Габов

Алексей Габов, «Коми войтыр» ӧтмунӧмса веськӧдлысь, «Агрокомплекс» акционер котырса генеральнӧй директор:
– Миян предприятиеын ковмис босьтчыны гортсянь уджавны. Июнь 15 лунӧ ӧти ань локтіс удж вылӧ COVID-19-ӧн моз висьӧмӧн: дуксӧ ни кӧрсӧ оз кыв, сьӧкыда лолалӧ, а шойччан лунъясас температураыс кыптылӧма. Та вӧсна ковмис вуджӧдны йӧзсӧ гортсяньыс уджавны. Оз ӧд сӧмын ас вӧснаыд, но и матыссаяс пондаыд колӧ тӧждысьны.

Ольга Останкова, Выльгорт сиктса юралысь, Сыктывдін районысь Э.А.Налимова нима история да культура музейӧн веськӧдлысьлы отсасьысь:
– Дзикӧдз нин йӧртіс ставнымӧс тайӧ висьӧмыс, он нин тӧд, кыдз лоас бурджык. Миянӧс, культураын зільысьясӧс, тшӧтш чуксалӧны вакцинируйтчыны. Ветлі нин поликлиникаӧ, гижӧдчи антитела туялӧм могысь вир сдайтны. Та бӧрын нин водзӧ понда мӧвпавны.

Людмила Камбалова, челядьлы С.Я.Маршак нима национальнӧй библиотекаын юкӧнӧн веськӧдлысь:
– Вӧчны прививкасӧ али кутчысьны таысь – быдӧнлӧн аслас видзӧдлас. Ме серти, ӧти-кӧ, прививка йылысь юӧрыс зэв уна: ошканаыс и вӧйпанаыс, дерт, сэсся вошан... Мӧд-кӧ, окота вӧчны воськовсӧ восьса синмӧн, та вӧсна прививкаӧдзыс мед эськӧ дон босьттӧг вӧчисны антитела вылӧ анализ. Сэк нин мортыс ачыс гӧгӧрвоас, мый виччысьны, иммунитетыс кӧ сылӧн абу.
Ас йылысь кӧ шуны, ме уджала челядькӧд, менӧ быд лун кытшалӧ уна йӧз. Та вӧсна висьӧмсьыс ачымӧс дорйыштӧм, да и матыссаясӧс видзӧм ради, ме уколаси нин. Кыдзи и мукӧд прививка бӧрти, неуна нёрпалыштi, но лун мысти ставыс нин вӧлi бур. Сиа ставнымлы лоны дзоньвидзаӧн. Видзӧй асьнытӧ да матыссаяснытӧ!

Любовь Кирушева, «Коми войтыр» ӧтмунӧмлӧн Кӧрткерӧс районса юкӧнысь нырщик:
– Ме ногӧн, ми коронавирус йывсьыс нинӧм ог и тӧдӧй. Ставыс пансис йӧзӧс повзьӧдлӧмсянь. Миян сикт кузя ветлӧдліс полиция машина, кысянь горзісны-ӧлӧдісны: пукалӧй пӧ гортаныд, ывлаӧ эн петӧй. Быттьӧ война дырйи. А кор йӧзтӧ повзьӧдлӧны, вежӧрыс мӧдарӧ уджалӧ. Сы вӧсна и ӧнӧдз йӧзыс вошӧмаӧсь...
Верӧсӧй вакцинируйтчис нин. Ме помӧдз виччыси, кор ӧтчыдысьӧн позяс вакцинируйтчыны, но радио пыр висьталісны, татшӧм вакцинаыс пӧ воӧма сӧмын Вӧркутаӧ да нӧшта куим карӧ. Дӧзми да ӧти укол вӧчи нин, ӧні виччыся мӧдсӧ. Уколсьыд ог пов. Мамӧ фельдшер вӧлі да, век вакцинируйтлiс. Прививка бӧрас вӧлі сьӧкыд: висис юр, лысьӧм юкаліс да восӧдіс.
Израильын, Исландияын да Венгрияын со вермӧмаӧсь нин тайӧ пӧрӧссӧ. А миян йӧзыслы нинӧм стӧча висьтавны оз кужны. Колӧкӧ, уналӧн эмӧсь нин антителаыс, а туявны сійӧс абу быдӧнлы зеп сертиыс. Сэсся и унаӧн ылі пельӧсын олӧны. Ме серти, тайӧ тестсӧ колӧ вӧчны дон босьттӧг быд больнича-поликлиникаын.

Сергей Артеев, Коми Республикаса Каналан Сӧветӧн веськӧдлысьӧс вежысь:
– Вӧчны прививкасӧ али абу, быдӧн ачыс кывкӧрталӧ. Тшӧтш и дзоньвидзалунтӧ да медикъяслысь вӧзйӧмъяссӧ тӧд вылын кутӧмӧн. Но, дженьыда кӧ, талун вакцинируйтчӧмыс – дзоньвидзалунтӧ видзны да матысса вӧснаыд тӧждысьны позянлун.

Роман Истомин, журналист:
– Эг чайтлы, мый COVID-19-лысь этшсӧ тӧдла тырвыйӧ. Кӧсйи виччысьлыны арӧдзыс, донъявны нёльнан вакцинасӧ да уколасьны медся бурнас. А со тай! «Шуд» уси туплясьны вольпасьын 45 прӧчент мында ты ӧдӧмӧн да чуймавны, кутшӧм бура тайӧ здукъясас уджалӧ юр вемыд, но мӧвпъясыс оз вермыны чужны вир-яйлӧн мукӧд юкӧн вӧсна. Ветлӧдлыны сьӧкыд, сёрнитны сьӧкыд, мыссьынытӧ ачыд прамӧя он вермы. Нӧшта на и ывлаас жар: войясыс югыдӧсь, а ӧшиньыс занавестӧм; да вой и лун ланьтлытӧг помся жунгӧны-уджалӧны кислородӧн могмӧдан бӧчкаяс.
Адын кодь олӧмсӧ мичмӧдӧны-кокньӧдӧны сӧмын медсестраяс: ассьыныс уджсӧ бура тӧдӧны, шаньӧсь да отсӧг вылӧ воны дасьӧсь. Коми минздрав, вылӧ донъяв налысь уджсӧ!

Коронавирусысь вакцинаяс оз быдӧнлы лӧсявны. Вакцинируйтчӧм водзвылын колӧ консультируйтчыны бурдӧдыськӧд.

МИЯН КОРР.
 

Комментарии (0)


Противодействие коррупции



Фотогалерея
Версия для слабовидящих