Водзын уджыс уна

Сёрниыс колян вося öшым тöлысся коми конференция вылын мунiс вöр-ва да йöзлысь дзоньвыдзалун видзöм, коми кыв сöвмöм, районын олысь войтырлысь могъяссö олöмö пöртöм йылысь.

XXIX коми конференция, кодöс вöлi сиöма районын олысь войтырлöн да вöр-валöн дзоньвидзалун видзöмлы, мунiс öшым тöлысь 14 лунö важ коми Емдiн сиктын. Дзоньталöм культура керкалöн фойеын уджалiсны выставкаяс, мунiс делегатъясöс да гöстьясöс регистрация. Залын чукöртчöм войтырлы сиктса артистъяс петкöдлiсны некымын художественнöй номер коми мотивъяс вылö.

Уджалан президиум да секретариат бöрйöм бöрын медводз кыв сетiсны Емдiн районса администрацияöн веськöдлысь Галина Плетцерлы. Галина Яковлевна тöдмöдiс залын чукöртчöм войтырöс экономическöй да социальнöй уджкöд, кодi мунö районын.

Экономикалöн медшöр мытшöдыс йиджтысьö гырысь предприятиеяс вылö. На лыдын бöръя воясö тыр вынöн уджалысь ООО «Зöвсьöртса ЛПК», Казлукса лесозавод, кодi пиломатериалысь кындзи пондiс лэдзны биотопливо – пелетъяс. Бура уджалö и век паськöдö производство Микуньса ЛПУМГ, кöнi виччысьöны кöкъямысöд газопровод нюжöдöм. Важног ыджыд пай районса экономикаö пыртöны кöрт туй транспортса предприятиеяс. Районын сöвмö видз-му овмöс, тшöтш и продукция переработка. 2018 во помын районын воссисны выль куим цех: Межöгын пондiсны лэдзны пакетированнöй йöв, Аквадын – сыр, Айкатылаын – яйысь полуфабрикат.

Районын унатор вöчсьö социальнöй объектъяс вылын. Микунь карын квартираясö пондiс воны сöстöм ва, мунö ремонт культура керкаын, корсьысьö сьöм спортивнöй комплекс стрöйтöм помалöм вылö. Зöвсьöрт посёлокын нюжöдчö выль магистральнöй водопровод ва весалан станциясянь Эжва юöдз. Сэнi жö матысса воясö пондасны капитальнöя дзоньтавны культура керка.

Районын воддза воясö ыджыд удж лои нуöдöма овны туйтöм керкаясысь йöзöс выль керкаясö вуджöдöм. Та восянь федеральнöй программа пондас уджавны водзö и нюжалас сiйö 2024 воöдз. Тайö вит вонас районын колö вöчны куим пöв унджык удж сыысь, мый вöлi вöчöма водзсö.

Александр Малафеев, Емдiн районса МОД «Коми войтыр» представительстволöн веськöдлысьöс вежысь, висьталiс представительствоöн вöчöм удж йылысь, а сiдз жö 2017 вося резолюция олöмö пöртöм йылысь.

Артем Микличев, Емдiн районса вöр-ва видзан комитетöн веськöдлысь, пасйис, мый районын вöр-ва видзöмын зэв уна тырмытöмтор: кар-сиктъясын канализационнöй стокъяс весавсьöны оз тырвыйö, районын зэв уна быдсикас шыблас чукöр оланiнъяс гöгöр, зэв мисьтöма асьнысö кутöны районын олысь уна войтыр – гортын да вöр-ваын шойччыгъяс дырйи артмöм ёгсö шыблалöны кытчö шедö.

Валентина Исакова, районса медыджыд врачöс вежысь, висьталiс, мый районын уна висьысь, а олысь йöз лыдыс век чинö и чинö. Оз сöмын сы вöсна, мый унаöн, медводз том йöз, мунöны гырысь каръясö корсьны бурджык олöм, но и сы вöсна, мый унаöн кулöны висьöмъясысь пöрысьмытöдзыс на. Та вöсна шöр олан арлыдыс йöзыслöн миян районын сöвмöм государствояс дорын ёна дзöляджык.

Юалöмъяс да вочавидзöм

Емдiн сиктса олысь Юрий Исаков корис дзоньтавны тулыснас нуöм плотина да туй, кодi йитлiс сиктлысь кык юкöн. Ёна нин разсьöма Шöр улича, тшöтш и сылöн Емва юлань леччан юкöныс. Колö нин думыштны выль врачебнöй амбулатория стрöйтöм йылысь. Юрий Александрович висьталiс и сы йылысь, мый сентябрьын квартираясын вöлi зэв кöдзыд, кöть котельнöй и уджалic нин.

Юалöмъяс вылö вочавидзисны Галина Плетцер да Валентина Исакова. Галина Яковлевна висьталiс, мый 2019 воö плотина да туйыс сы кузя лоö дзоньталöма. Сiдз жö лоö вöчöма ремонт шöр площадь вылын. Коммунальщикъяскöд сiдз жö лоö нуöдöма сёрни, медым найö тырвыйö нуöдiсны ассьыныс уджсö. Валентина Алексеевна шуис, мый медводз врачебнöй амбулатория колö лэптыны Илья-Шор посёлокын, а сы бöрын нин Емдiн сиктын.

Микунь карысь Владимир Соловьёв корис пыртны резолюцияö коми кыв велöдöм да сыöн паськыдджыка вöдитчöм йылысь юалöм. Сiдз жö корис бöр восьтны автобус сувтан местаяс Айкатыла сикт шöрын и сетны райцентрын öти выль уличалы Дмитрий Иванович Балинлысь ним.
Строительство да туй хöзяйство кузя министрöс вежысь Эдуард Слабиков вочавидзис, мый Айкатыласа автобуснöй остановкаяс кузя уджыс мунö, лöсьöдчöны проектъяс.
Микунь карысь Елена Киселёва висьталiс, мый кыв – народлöн ловыс. Оз ло кыв и народ вошö. Республика пасьтала уналаын, кöнi комиыс зэв этша, велöдöны коми кыв, а Емдiн районын, кодi исторически коми йöзлöн уна сё во вöлi медшöр оланiнöн, торйöдчöны чужан кывйысь, и мый тöдчана – оз челядь да том войтыр.

МОД «Коми войтыр» президиумса членъяс Сергей Габов да Алексей Конюхов та вылö висьталiсны: Россияын öнi быд аскывъя народ, рочысь кындзи, вочаасис татшöм проблемакöд. И сыкöд нинöм он вöч. Та вöсна медыджыд уджыс öнi усьö велöдчысьяслöн бать-мам вылö. Налы колö ужавны школаяс администрацияяскöд, асланыс ныв-пияныскöд, медым найö велöдiсны коми кыв, кыдзи чужан кыв.

Олöмыс Коми Республикаын бöръя комын вонас ёна вежсис. Республикаын олысь йöз пыр чинö. Весиг Сыктывкарын да Сыктывдiн районын, кöнi бöръя воясöдз олысьыс пыр содiс, ситуацияыс вежсис. А коми кыв вылын сöстöма сёрнитысьыс öнi республикаын колис сöмын куим гöгöр процент.

Айкатыласа делегатъяс юалiсны – кор сиктлöн Жижева улича кузя нюжöдасны водопровод, кор райцентрын лоö выль канализационно-очистнöй станция, а ёг чукöртан «полигон» лоö збыль вылö полигонöн?

Галина Плетцер та вылö висьталiс – Жижева уличаö водопровод нюжöдасны 2020 воын. Выль канализационно-очистнöй станция стрöйтны колö и ёг чукöртан полигон колö паськöдны. Уджыс тайö объектъяс кузя мунö, но матысса воясö ыджыд вежсьöмъяс оз на лоны – та вылö колö уна сьöм.
Зöвсьöртысь Николай Огнёв корис тэрмöдны лыжнöй база стрöйтöм, код йылысь сёрниыс лыбис öкмыс во сайын на.

Тайö юалöм вылö районса администрацияысь вочавидзисны – уджыс мунö, тшöтш и посёлокын уджалысь предприятиеяскöд. Матысса воясö позьö виччысьны посёлокын выль лыжнöй база стрöйтöм.

Вöлiны и мукöд юалöмъяс, кодъяс вылö вочавидзисны районнöй администрацияын уджалысьяс, республикаса министерствоясысь да ведомствоясысь представительяс.

Резолюциялöн медтöдчана пасъяс

2018 вося коми конференциялöн резолюцияö лои пыртöма 22 юалöм. На пиын тшöтш и Россияса правительство дорö шыöдчöм – сувтöдны Шиес станция дорын ёг чукöртан полигон вылын стрöительнöй уджъяс проектнöй документация лöсьöдтöдз, государственнöй экологическöй экпертиза да общественнöй слушаниеяс нуöдтöдз.

Вöр-ва видзан тема кузя резолюцияö лоис пыртöма ещö куим юалöм – Мадмас посёлокын ёг недыр видзöм вылö площадка стрöйтöм, Айкатыласа ёг чукöртан полигон вылö туй дзоньталöм да Эжва ю бассейнын чери рöдмöдöм.

Сiдз жö резолюцияö лои пыртöма юалöмъяс: Мадмасын школа-сад стрöйтöм, Зöвсьöртын культура керка дзоньталöм, Айкатылаын культура керка дзоньталöм вылö проектно-сметнöй документация лöсьöдöм, Микуньын спорткомплекслысь мöд юкöн – универсальнöй спортивнöй зал стрöйтöм, проектно-сметнöй докуметация Зöвсьöртын лыжнöй база вылö лöсьöдöм.

Эз ло вунöдöма и туйяс йылысь. Республикаса строительство да туй хöзяйство министерствоöс корöма пыртны республикаса туйяс капитальнöя дзоньталан программаö «Вогваздино-Яренск» туйлысь 29-34 километръяс юкöн (Айкатыла сиктсянь Вомын грездлань чукыль сайöдз). Сiдз жö корöма лöсьöдны программа меставывса туйяс, керка доръясысь площадкаяс да тротуаръяс сикт-каръясысь дзоньталöм вылö.

Медым помöдз бырöдны проблема мобильнöй йитöдкöд Илья-Шор посёлокын, Арабач грездын, Эжва юлöн шуйга берегын, конференция корис водзö нуöдны удж Висдiн грездын мобильнöй йитöдлысь вышка стрöйтöм.

Видз-му овмöс министерствоöс корöма организуйтны пöрысь мöс ас хöзяйствоясысь ньöбöм, а тшöтш и меставывса администрацияяслы му вылын уджалан техника сетöм.

А вот коми кыв, культура да традицияяс видзöм – ми сайын. Дерт, отсасьны мöдас и культура, и образование. Но медыджыд уджыс – миян. Оз позь сетны вунöдны чужан кыв челядьлы да внукъяслы. Ловъя лоö кыв, ловъя коляс и народ.

АЛЕКСАНДР ЛЮТОЕВ.