Коми Республикаын медбöръя некымын тöлысьö соцсетьясын петöны норасьöмъяс Жешартса фанкомбинат вылö: йöзлы оз во сьöлöм вылас шыблас, кодi «пуксьö» посёлокö. ООО «Жешартса ЛПК»- öн веськöдлысь медыджыд директор Иван Косарев интервью сетiгöн висьталiс, кыдзи предприятие вылын мöдасны вайöдны шыблассö абуöдз.
– Мый вöсна артмö шыбласыс?
– Заводсö вöлi кыпöдöма 2003 воын сэкъя кадся технология кузя. Технология, кодi мунiс экспертиза пыр, водзвыв артыштöма сынöдö производство дырйи артмысь неыджыд пу бус юкöн веськалöм (проект кузя – артмöм пу сiысь кык процентысь не унджык: паспорт кузя уджалысь циклонъяслöн татшöм эффективность). МДФ завод öнi уджалö став арталöм нормаяс, индöд да стандартъяс кузя. Миян эм позяна шыблас вылö вынсьöдöм проект. Эм лёк веществояс вылö замеръяс, кодъясöс вöчöны ас вöляа лабораторияяс.
Пасъя, мый воддза воясö шыбласыс вöлi унджык. Бöръя воöн джынйöн ми пöртiм олöмö некымын индöм удж производствоö сi бöр пыртöмö, кодi водзсö шыбитчис сынöдö. Ми чорзьöдiм технологическöй режим дорö корöмъяс. И ми мöдiм артавны шыблассö, мый водзсö эз вöв. Бöръя кадö ме уна сёрнита посёлокын олысьяскöд. И быдöн висьталöны öти и сiйö жö: «Шыблас вöлi век!» Дерт, некод оз кöсйы аддзыны машинаяс да ывла вывса пуклöсъяс вылысь пу бус, но вежöра йöз гöгöрвоöны, мый тайö могсö «волшебнöй бедьйöн öвтыштöмöн» или тшöктöмöн он вермы пöртны олöмö. Сiдз жö оз позь сувтöдны МДФ, кодi уджалö фанера производстволöн колясъяс вылын.
Тöдчана колö гöгöрвоны, мый быд производство вылын эм кутшöмкö шыблас: тайö Сыктывкарса электростанция, кондитерскöй фабрика или весиг автомашина. Уна поизводство вылын артмöны ёна лёкджык веществояс (шуам – бенз(а)пирен), и татшöм веществосö аддзыны, фотографируйтны и пуктыны соцсетьö оз артмы. Миян заводлöн шыблас шыбитчö синмад и та вöсна сiйö экологическöй повестка топын.
– Тi шуанныд, мый водзсö шыбласыс вöлiунджык, а öнi лои этшаджык. Но норасьны йöзыс пондiсны тшöкыдджыка.
– Кадыс оз сулав öтилаын. Öнi эм соцсетьяс, смартфонъяс, позьö фотографируйтны машина и пыр петкöдлыны тайöс уна сюрс морта аудиториялы. И тайö зэв бур: миян артмис йöзкöд вочча йитöд. Тайö тэрмöдлö миянöс – веськöдлысьясöс, инженеръясöс – öдйöджык помöдз бырöдны шыблассö.
– Кыдзи завод видзöдö посёлок вылö шыблас усьöм юöръяс вылö?
– 2019 восян ми мöдiм артавны шыблассö. Уджö пыртiм регламент, кодi сетö позянлун посёлокын олысь быд мортлы сетны юöр диспетчерлы. Та бöрын миян мастер мунö сэтчö, кысянь воис юöр, фотографируйтö, босьтö образецъяс. Найöс видлалöны лабораторияын.
Ми кö аддзам, мый тайö пу сi, мастер юöртö вылöджык, производство дзöльдöдам или сувтöдам ставнас. Видлалам оборудование, весалам сiйöс. Та бöрын лэдзам выльысь, индöд сетö производствоöн веськöдлысь. Производство сувтöдöм йылысь юöртöны меным. Меным жö телефон пыр воöны юöръяс производстволöн медтöдчана параметръяс йылысь.
– Мый вöчсьö шыблас ставнас бырöдöм могысь?
– 2019 воын, кор ме пондi веськöдлыны компанияöн, ас водзын пуктiм мог бырöдны шыблас. Тайö удж дорас ми кыским экспертъясöс, проектнöй организацияяс медым корсьны выль техническöй решение МДФ-лöн шыбласъяс весалöм кузя.
Миян медводдза воськов – нуöдiм некымын мероприятие, медым матöдны технологическöй схема проектнöй решениеяс дорö: на лыдын сi юкöн, кодi водзсö шыбитчис сынöдö, бöр пыртiм производствоö. Унатор ми вöчим асьным проектированиетöг, дзöля донысь. Сiдз жö чорзьöдiм технологическöй режим бöрся видзöдöм. Став бöръя восö ми видзöдiм производстволöн медшöр технологическöй параметръясысь вешйöм бöрся. А татшöм параметрыс абу öти сюрс. Босьтчим автоматизируйтны технологическöй удж и тайö проектыс абу öти во кежлö.
2020 во быд корсим шыблас весалан технология. Видлалiм вит пöлöс технология. Бöрйим öтикöс. Кольöм во помын кырымалiм проектирование вылö сёрнитчöм, та вылö мунiс квайт тöлысь. Март 31 лунö миянлы сетiсны проект.
Öнi миян эм ясыд, гöгöрвоана туй карта, быд вежонся гижалöм удж. Кыдзи и кутшöм оборудование ми ньöбам, кыдзи сiйöс йитам öнiя технологическöй структураö, медым бырöдны шыблассö миян и посёлок олöмысь.
Содтöд ми водзö пондам корсьны мукöдпöлöс шыблас весалан технология.
– Кутшöм технологияяс тi видлалiнныд?
– Миян вöлi некымын вöзйöм, код бöрын ми лöсьöдiм техническöй мог и пондiм корсьны тайö уджсö вöчысьясöс.
Миян фанернöй завод вылын сулалö система аспирации. Тöдам став оборудование вöчысьсö, шыöдчылiм на дорö. Кодкö шуис: «Да, позьö видлыны». Кор воим сёрнитчöм кырымалöмöдз, ми корiм петкöдлыны, кöнi сулалöны аспирация системаяс МДФ заводъяс вылын. Корим тайöс сы вöсна, мый шлиф бус и пу сi неуна торъялöны öта мöдсьыс. Пу шлифовальнöй бус улö эм уна пöлöс аспирация конструкция. Сiйö мöд ногöн чукöртчö. Артмис сiдз, мый оборудование вöчысьяс эз вермыны петкöдлыны ни öти установка, и ми таысь дугöдчим.
Мöд технология, кодöс ми видлалiм – сiдз шусяна ваöн весалöм, кор циклонысь петысь шыблас сора сынöд петö ва пыр. Сöстöм сынöдыс васьыс петö, а сiыс кольö и пуксьö ва пытшкас.
Тайö уджалысь технология, ми сiйöс аддзылiм. Но кор воим технологиялöн юкöнъясö, гöгöрвоим, мый миян вермас артмыны мытшöд ва весалöмкöд. Поект арталöма бергöдчана ва вылö, кодöс колö век весавны парафинысь да сирысь, кодi неуна эм сi пытшкын. Но миян ва весалан оборудование, кодi уджалö кольöм нэмсян, абу арталöма содтöд уж вылö.
Таысь ми эг бöрынтчöй, но медводз колö вöчны технико-экономическöй обоснование и ва весалан сооружение вылö проект, и сöмын та бöрын косны тайö технология дорас.
Сiдз жö ми мöвпалiм содтыны уджалысь PAL циклонъяс дорö ещö кыкöс или вежны найöс мöд модельяс вылö. Танi миянöс конъялiс пандемия: оборудование вöчысьяс и проектировщикъяс – итальянецъяс, кодъяс эз вермыны дескöдöмъяс пыртöм вöсна волыны ми дорö вöчны обследование. Сiдз жö, кыдзи и «ва» весалöмöн, мöвпсö ковмис пуктыны «пызан пытшкö». Кыдз сöмын пондасны лэбавны самолётъяс Италияö – тайö уджсö нуöдам водзö.
Дыр корсьöм бöрын миян шедiс колана оборудование Барнаулысь. Öти предприятие вылын эм патент циклон конструкция вылö, сэнi жö вöчöны тайö паныдасьлывтöм оборудованиесö. Ми нуим некымын мешöк сi налöн лабораторияö. Сiйöс лэдзисны пилотнöй установка пыр, кодi петкöдлiс бур бöртас. Тайö техническöй решение вылас ми сувтiм, вöчим проект. Ми арталам, мый öнiя неыджыд шыблассö тайö циклонъясыс содтöд чинтасны сё пöв.
– Кутшöм уджъяс и кор пондасны вöчсьыны?
– Проектыс сьöкыд. Тайö медводдза образец: татшöм технология пондас первойысь уджавны МДФ вöчигöн. Эм уна юалöм, кодöс колö видлавны. Апрель помöдз проект видлаласны заводса профильнöй специалистъяс, кодъяслы ковмас уджавны выль оборудование вылын и кывкутны шыблас весалöмысь. Медуна кад босьтас оборудование вöчöм: сёрнитчыгöн барнаулса завод корис та вылö квайт тöлысь.
Оборудование ньöбиг косттi мöдам нуöдны монтажнöй уджъяс: ньöбны колана кöрт, чукöртны конструкцияяс. Сёрöнджык сувтöдам циклонъяс, йитам найöс трубопроводъясöн PAL циклонъяскöд, электрика да автоматикакöд, пондам лöсьöдчыны пуско-наладочнöй уджъяс дорö, кодъясöс мöвпалам нуöдны 2022 вося мартын.
Тайö миян приоритетнöй проект, менам быдлунъя видзöдöм улын. Менам абу бункер, ме сiдз жö, кыдзи и ставыс, ветлöдла ывлатi. И ме ог кöсйы, кыдзи и мукöд жешартса олысь, лолавны шыбласöн няйтöссьöм сынöдöн.
– Мыйта сувтас модернизация?
– Модернизацияыслöн доныс – 300 млн шайт. Миян абу бур дядь сьöм мешöкöн. Тайö проектсö ми вöчам сiйö сьöм вылö, мый нажöвитам асьным.
Кöсъя кежавны соцсетьяс дорö. На пыр бöръя кадаö няйтöн «кисьталöны» и менö, и мекöд уджалысь ёртъясöс, и акционеръясöс… Менö тайö оз увтырт, а сöмын ышöдö. Ме тöда, мый ми уджалам шыблас бырöдöм вылын. Водзсö та ыджда уджсö и татшöм вынъясöн некор эз нуöдлыны.
Мытшöдыс сыын, мый лёк сёрниыс оз отсав миян уджлы проект вылын, а мöдарö – вермö нюжöдны сiйöс некымын тöлысь, а то и во кежлö.
Комментарий гижысьяслöн абу колана вöзйöм. Став сёрниыс воö сэтчö, мый директор нинöм оз вöч, а акционеръяс сьöмсö «чукöртöны зырйöн». Тайö – пöръясьöм. И содтöд век мунö сёрни комбинат сувтöдöм йылысь. А Жешартын олö сизим сюрс морт и быд семьяын кодкö уджалö комбинатын. Комбинат сувтöдöм – абу сöмын модернизация сувтöдлöм, но и удждон вылö сьöм нажöвитны позянлун воштöм. Удждон бöръя воясö ми век мынтывлiм ас кадö.
Ми аддзам, мый шыблас тема век ёнджыка лыбö соцсетьясын бöрйысьöмъяс водзын. Унаöн, кодъяс «кисьталöны» няйтöн заводöн веськöдлысьясöс, оз овны Жешартын или волывлöны сэтчö кадысь кадö. Комментарийяс найö гижöны асланыс пиар вылö.
Ме кора ставсö, кодöс майшöдлö заводлöн шыблас – локтöй приём вылö, быд вежонся веськöдлысьяслöн чукöртчылöм вылö, öтлаöдчöй профсоюзнöй активкöд, код водзын ме кыв кута быд тöлысь проект олöмö пöртöм йылысь. Ме дась висьтавны быдöнлы, кыдзи мунö уджыс шыблас бырöдöм могысь. Тi пöвстын кö эмöсь тöдысь инженеръяс, кодъяс вермасны öдйöдны модернизация кöть вежон вылö, ме босьта тiянöс удж вылö. Но колö гöгöрвоны: соцсеть пыр шыбласкöд мытшöд бырöдны оз артмы. Танi колö инженеръяслöн быдлунся удж. Та вöсна кора найöс, кодi ме моз жö кöсйö аддзыны Жешарт посёлок сöстöмöн: сетöй миянлы уджавны!
.jpg)
улджин батын укрок кумыс балты