Радейтöны ассьыныс уджсö

Уна километра сайсянь быд лун колö вайöдны велöдчысьясöс Эжвалöн шуйга берег пöлöн сулалысь грездъясысь Кöжмудорса шöр школаö.

Локны кö Сыктывкарсянь, От «гöра» вылын медводз воччаасяс Эжов грезд, сы бöрын Давпи, Лыаты, Назар да Ипа. Слобода шор вуджöм бöрын воас Кöжмудор. Водзö туйыс нуöдö Сюлатуйö, сы бöрын – Отса грездъясö. Пöлавъя бöрын Эжва вöчö кытш, мöдар берегас кольöны Студенеч, Вогваздино, Емдiн, Чёрнöй яр да Оквад.  Оквадлы вочча сулалö Туис-Керöс грезд (ог нин мöдö артавны посни грездъяссö – Ончепиорд, Закорд да Ненинорд), улынджык ва кузя Поп Керöс, сэсся мыччысяс Семуковса Николай Чудотвореч нима вичколöн крестыс. Семуковсянь некымын километра мысти воасны Ватойысь да Кырс грездъяс. Подöн кö кытшовтны став грездсö, некымын лун оз тырмы и тэрыб кока мортлы. 

Вот тайö маршрутъяс кузяыс лунысь-лун колö вайöдны велöдчанiнö да бöр нуöдны гортас Кöжмудор шöр школаса велöдчысь котырöс. Тайö тöдчана уджсö вöчöны школьнöй автобусъясöн веськöдлысь шоперъяс – Николай Мальцев, Александр Изнобов да Александр Седрисев. Неуна висьтышта тайö кывкутана йöз йылысь.

Медыджыдыс на пиысь Николай Мальцев. Чужлiс сiйö 1960-öд воын Сыктывкарын. Школа помалöм бöрын, кыдзи и уна зон, пырис велöдчыны автошколаö, кодöс помалiс 1979-öд воын. Сэсся армияын служитiс Тюмень кар бердын, веськöдлiс УАЗ вездеходöн, новлöдлiс частьса командирöс. Служба помассьöм бöрын уджалiс машина вылын. Гöтрасис Лыатыса ныв вылö да вуджис овны Лыаты грездö, пырис уджавны «Коквицкöй» совхозö шоперöн автобус вылö, код вылын асывнас новлöдлiс совхозсса уджалысьясöс, а та бöрын – школьникъясöс. Кор 2015 воын ковмис школаö автобус вылын уджалысь, вуджис сэтчö. Николай Сергеевич олö Лыатыын, удж вылö волывлö аслас машина вылын. Неважöн, кольöм вося велöдчан во завöдитчыгöн, пуксис выль «Газель» автобус вылö. Мальцев – первой класса категорияа водитель.

Александр Изнобов уджалö шоперöн 1981-öд восянь. Сыöдз, СПТУ-1 автошколаса курсъяс помалöм бöрын, армияöдзыс уджыштiс «Коквицкöй» совхозын, кыскалiс молоковоз машинаöн йöв. Служитiс первойсö Елань учебкаса авторотаын, сэсся мöдöдiсны Германияö, ГСВГ-са группаö. Сэнi служитiс авторотаын, весиг мöдöдлiсны командировкаö Украинаö отсавны идравны нянь. Ичöтсянь ноксьö машина да техника бердын. Батьыс уджалiс молоковоз вылын, сысянь и велалiс Саша техника бердö. Армияын служитöм бöрын уджалiс совхозын «Зил-157» машина вылын, бöрынджык велöдчис автобус веськöдлан категория вылö да мöдiс новлöдлыны совхозса уджалысьясöс да челядьöс – садикö, школаö. Уджалан стажыс сылöн нелямын во. Александр Васильевич тшöтш 1-й класса шопер. Неважöн участвуйтiс районса школьнöй автобус шоперъяс костса соревнованиеын, кодöс нуöдiсны ГИБДД да ДОСААФ, босьтiс 1-й места ПДД конкурсын.

Медся томыс шоперъясысь Александр Седрисев. Сiйö сiдз жö мунiс бать коктуйöдыс. Василий Пантелеймонович став уджалан олöмсö руль сайын. И армияын шопералис, сэсся Туис-Керöсса РММ-ын «ЗиЛ-157» кунга машинаöн вöр заптысьясöс новлöдлiс, бöрынджык «МАЗ» лесовоз вылын вöр петкöдiс. Шоперавлiс и почта вылын. А кор ковмис школаса автобус вылö водитель, шыöдчисны сы дорö, и Василий Пантелеймонович уна во уджалiс автобус руль сайын, кöть волi пенсия вылын нин.

Вот и пиыс, Александр, школа помалöм бöрын пырис велöдчыны Сыктывкарса СПТУ-20-ö шопер курсъяс вылö, сдайтiс право вылö, сэсся армия. Служитiс ВДВ-ын, учебкасö помалiс Каунас карын, гöтовитiсны сiйöс кыдз специалистöс ВДВ-са сьöкыд техника вылö. Учебка помалöм бöрын мöдöдiсны Подмосковьеö, сэн тшöтш служитiс десантын. Армияын служитiг сдайтiс экзамен автобус веськöдлан категория вылö. Новлöдлö велöдчысьясöс 2009 восянь.

Школаса директор Александра Никонова тадз висьталö аслас уджалысьяс йылысь: «Зэв кывкутана, дисциплинированнöй водительяс. Частö колö öти машина мöдöдлывлыны сёян-юанла, ГСМ-ла, то велöдчысьясöс соревнование да олимпиада вылö нуöдны. Кольлывлö велöдчысьясöс новлöдлыны кык автобус, но миян водительяс кыдзкö вермывлöны вöчны ассьыныс уджсö, век отсалöны ёрта-ёртыслы. Автопарк выль, 2020 воö воис кык выль автобус – «ПАЗ» да «Газель». Кольöм во воис ещö öти «Газель». Уджалöны окотапырысь, коть удждонъяс миян водительяслöн абу ыджыд».

2022 вося февраль тöлысьын Кöжмудорса шöр школа мöдас пасйыны неыджыд юбилей – 10 во сайын велöдысьяс да велöдчысьяс пырисны выль школаö. Школакöд öттшöтш стрöйтiсны гараж, кöнi видзöны автобусъяс. Öнi оз нин ков водз асыв тöв шöрын ён кöдзыдъясö уявны автобус улын паяльнöй лампаöн, медым завöдитны мотор. Водзсö, кор школаыс вöлi Туис-Керöсын, автобусъясыд «Коквицкöй» совхоз сиптыссьöм бöрас сулалicны ывлаын. Да и туйястö февраль-март тöлысьясад турöбъясыд прамöя вöлi нöбавлöны. Öнi школаса автобусъясöн веськöдлысьяслы уджавны ёна кокньыджык. Автобусъяс шоныд гаражын, туйяс дöзьöритöны ёна бурджыка. Колö висьтавны аттьö предприниматель Василий Иванович Козловлы да сылöн организацияса трактористъяслы – Михаил Мироновлы да Денис Козловлы туйяс лымйысь бура весалöмысь. А школаса автобусöн веськöдлысьяс быд асылö ас кадö вайöдöны школаын велöдчысьясöс, кöть колö найöс «öктыны» быд вожысь, От «гöраса» став грездысь.

Водзсö, кольöм нэмся 70-90-öд воясö, кутшöм керкаö он пыр – сэн тракторист или шопер. Том йöз школа помалöм бöрын окотапырысь вöлi мунöны велöдчыны СПТУ-ö, Выльгортса видз-му овмöс техникумö. Öнi оз тырмыны бур шопер-трактористыд, да и автобусöн веськöдлысьяс. Миян школаса кык водитель пенсионер, вежны найöс некодлы. Татшöм жö проблема пöшти став миян районса школаын.

ВАСИЛИЙ КОСТРОМИН.