Олöмлöн вабергач

Быд поколениелы, кодi олiс Россияын ХХ нэмын, ковмывлыс мунны вир кисьтана тышъяс пыр. Неминуча суис миянöс и ХХI нэмын.

И бара мужичöй войтырлы ковмис пасьтавны салдатскöй форма да босьтны киас автомат. Веськалiсны подразделениеясö, кодъяс öнi нуöны боевöй вахта, и коми зонъяс.

Туис-Керöсса зон Василий Седрисев чужлiс 1995 воын февраль 13-öд лунö. Велöдчис чужан грездса школаын. Медрадейтана предметъясöн вöлiны труд да физкультура, кокниа сетчис черчение. 2010 воын, öкмыс класс помалöм бöрын, пырис велöдчыны Микунь карса техникумö, строитель вылö. Специальность босьтöм бöрын армияöдз вевъялiс неуна уджыштны.

2013 воын воис пöвестка армияö. Мöдöдiсны Ленинградскöй областьö, Каменка посёлок дорса частьö. Коми Республикаысь сэнi служитiсны уна том войтыр. Служитiс торъя гвардейскöй мотострелковöй бригадаын 2014 вося арöдз. 2015 вося февраль тöлысьын кырымалiс контракт, пондiс служитны водитель-гранатомётчикöн РВСН (ракетные войска стратегического назначения) частьын Тейково кар бердын. Салдатлысь лямкасö кыскис куим во, а сэсся бöр локтiс гортас. Уджалiс Монди СЛПКын водительöн, мукöд удж вылын.

2022 вося ноябрьын ме воччааси сыкöд Эжваса «Светофор» магазинын. Менам юалöм вылö Василий вочавидзис, мый танi сылöн содтöд удж. Ещö висьталiс, мый горвоенкоматысь воис пöвестка, некымын лун мысти колö мунны индöм кадö.

Во джын мысти Васялöн Татьяна чойыс, кодi помавлiс Кöжмудорса шöр школа, а öнi велöдчö Сыктывкарса государственнöй университетын, висьталiс, мый воксö мöдöдöмаöсь Луганскöй областьö. И со апрель 25-öд лунö салдат пыралiс чужан школаас. Панiм сёрни – кыдз да мый?

Республикаысь мукöд мобилизованнöй мужичöйкöд сiйöс нуöдiсны Ленинградскöй областьса Каменка посёлок дорса вöеннöй частьö, кöнi Василий нуис срочнöй служба. Недыр мысти наöс вуджöдiсны группаö, кодöс тренируйтiсны морскöй пехотинецъяс программа кузя. Кык тöлысь тренировкаяс, лыйсьöм… Кадыс лэбис öдйö. Подразделениеö волiс Коми Республикаса юралысь Владимир Уйба, козьналiс салдатъяслы рюкзакъяс да амуниция, сиис ставыслы воны дзоньвидзаöн гортас.

Индöм кадö подразделениесö вуджöдiсны Луганскöй областьö, Сватово посёлок дорö. Пырисны колоннаясöн, но тöд вылас кутiсны, мый на вылö вермасны уськöдчыны противниклöн диверсионно-разведывательнöй группаяс. Колана местаöдз воис бура, дзоньвидзаöн, мöдiсны лöсьöдны база: кодйисны окопъяс, лöсьöдiсны блиндажъяс, землянкаяс, стрöйтiсны блокпост… Серамсорöн салдат казьтылö, мый землянкаас, кöнi олiсны, войнас берцыясас шыръяс вöлi кыскалöны семечки. А войясыс сэнi зэв пемыдöсь, ныртö син коластсьыд он аддзы.

Подразделение водзö сувтöдiсны мог видзны посъяс, нуны караульнöй служба, бырöдны националистъяслысь диверсионно-разведывательнöй группаяс… Öнi салдатъяс олöны нин ёна бурджыка – эновтöм керкаясын.

«Кызвыннас меснöй йöзыс ми дор, но вöлi и сэтшöмтор, мый салдатъясöс орчча частьысь гöститöдiсны отравитöм пöжасöн, – висьталiс Василий Седрисев. – Оружие и боеприпас миян тырмöмöн, вердöны бура. Некымынысь миян оборона пыр видлiсны йиджтысьны противниклöн неыджыд диверсионно-разведывательнöй группаяс, но ми эг сетöй.

Коми Республикаысь частö волывлö гуманитарнöй отсöг, кызвыннас кöм-паськöм. Но öнi колöны тепловизоръяс, бинокльяс, АК-74 дорö глушительяс, квадрокоптеръяс, уджалан инструмент…»

Василий час сайö висьтавлiс миянлы аслас служба йылысь. Öнi сiйö взводса командирлöн отсасьысь. Кык вежон шойччöм бöрын бöр мунiс водзö нуöдны сьöкыд служба. Тайö кадас сiйö эз сöмын воччасьлы матысса йöзкöд, но и вевъялiс гöтрасьны.

Ми ставöн кевмысям, медым öдйöджык помассис тайö вир кисьтана тышыс и пуксис мир. А Васялы сиам ловйöн да дзоньвидзаöн бöр локны гортас, Виктория гöтыр да матысса войтыр дорö.

ВАСИЛИЙ КОСТРОМИН.