Спортыд отсалö дыр овны

 Весьшöрö оз шуны – спортыд ёнмöдö, дисциплинируйтö, отсалö венны олöмын воччаасьлысь сьöкыд лунъяс, нюжöдö мортлысь олан туйвизьсö.

Василий Панюков

Сыктывкарса видз-му овмöс техникумын велöдчигöн менö мöдöдiсны «Коквицкöй» совхозса От юкöнö практика вылö. Коквицкöй совхозын сэки вöлi нёль юкöн. Быд юкöнын вöлiны фермаяс, кöнi видзисны мöс-кукань. Муяс вылö кöдзлывлiсны зöр сора анькытш силос вылö, пуктывлiсны картупель да капуста.

Кöжмудор сиктын вöлi шöр мастерскöй, кöнi дзоньталiсны трактор-машина да видз-му вылын уджалан техника. Уджалiс АВМ, кöнi турунысь вöчлывлiсны турун пызь, пилорама.

Т\в и гожöм совхозын пуис удж. Гожöмын меджар кадыс вöлi турун да силос заптiгöн, арнас – куртупель чукöртiгöн. Тöвнас ылыс видзьяс вылысь совхозын уджалысьяс ваялiсны турун, петкöдiсны муяс вылö куйöд, заптiсны вöр.

Онi на син водзö сувтлывлöны лунъяс, кор ме вöлi практика вылын совхозса От юкöнса гаражын. Сэнi уджалiсны дас гöгöр механизатор. Помнита Иван Туркинöс, Инокентий Гановöс, Пантелеймон Полинöс, Владимир Кузнецовöс, Михаил Гановöс, Василий Панюковöс, Владимир Тринцöс, Алексей Козловöс да Иван Яруковöс. Дортчысьöн уджалiс Филипп Тринц.

Механизаторъяс унатор тöдiсны и сяммисны, окотапырысь юксисны мекöд, том морткöд, тöдöмлунъяснас. Босьтам кöть татшöмтор: тракторъяс сулалiсны ывла вылын и медым ловзьöдны налысь моторъяссö кöдзыд тöлын, колö вöлi шонтыны картеръяссö паяльнöй лампаöн, а сэсся радиаторас кисьтны пым ва, код сетлiс шоныдсö моторлы. Удж помалöм бöрын васö колö вöлi бöр кисьтны: радиаторсьыд ваыд жургöмöн киссьывлiс, а блокад неуна кольлывлiс. Войбыднад ваыс сэнi кынмывлiс и кран дорас артмывлiс йи ёкмыль, кодi другöн эз сывлывлы, кор мöд асывнас кисьтан пым ватö. А ывла вылад тöла, кызь вит-комын градус кöдзыд. Ваыд блок краник пырыд оз пет, чорыда кынмöма! Медым шоныштiс моторыд, колö вöлi лэдзны сы пыр кык-куим ведра ва.

Отса механизаторъяс и татысь аддзасны петан туй – кран розяс вöлöмкö сюйöны кыз турун идзас, код пыр блоксьыс вöлöм петö став ваыс. Артмö, мый йиыслы блокад артмыны вöлi нинöмысь.

Ещö öти сюсьлун, мый ме тöдмалi – кöдзыд кадö куйöд сöвтöм водзвылын телега кузов пыдöсас колö вöлöм киськавны минеральнöй удобрение. Сэки куйöдыд кöрт бердас оз кынмы. Тайöс кö он вöч, кöрт дорас сибдöм куйöд сöковмас дыр шедöдлыны.

Торйöн нин юрö йиджтысис татшöмтор. Коркö сорассьöмаöсь и совхозö тöвнас вайöмаöсь гожся солярка. Ывлаын кызь вит градус кöдзыд. Тракторъяс ловзьöдны он вермы – топливоыс бакас кисель кодь. А куйöдтö фермаяссьыд колö петкöдны, турунтö видзьяс вывсьыд вайны. И со мунö туй кузя гусеничнöй трактор ДТ-75, кабинаас пукалö Василий Панюков (грездса йöзыс сiйöс вöлi шуöны Вась Васьöн). Ме шензя – кыдзи сiйö ловзьöдiс тракторсö? Кор аддзи тракторыслысь мышсö, казялi, мый бак улас, кытi трубка пыр петö топливоыс, консерв банкаын öзйö битор, код шонтö да кизьöртö гожся соляркатö. Бур, мый топливопроводъястö сэки вöлi вöчöны ыргöнысь, а оз пластикысь, кыдз öнi.

ЧУЖАН МУАД ВЕК КЫСКÖ

Василий Панюков йывсьыс кöсъя висьтыштны торйöн. Чужлöма сiйö 1937 воын ноябрь 27-öд лунö Нёбдiн сиктын, кöнi чужлiс да быдмылiс нималана коми поэт да драматург Виктор Савин (Нёбдiнса Виттор).

Василий Васильевич бура помнитö челядь дырся кадсö, кыдзи сы кодь жö кöмтöм да дöмаса гача челядькöд котравлiс вуграсьны, а сэсся сэнi жö, ю дорас, пöртйын пулывлiсны юква, купайтчыв-лiсны. Арланьыс ветлывлiсны вöрö вотны тшак, чöд, чöдлас, бур пув да турипув. Вöрса козинъяс отсавлiсны пöтöсаджык тöвйыны.

Тöдлывлiс тшыгъялöм. Помнитö, кыдзи тулыснас ёртъясыскöд ветлывлiсны колхознöй картупель видзанiнö, бöрйывлiсны шыбитöм сiсьмöм да кынмöм картупель бугыльяс пöвстысь бурджыкъяссö да бипур вылын пöжав-лiсны.

Воис кад мунны армияö. Служитны мöдöдiсны Белоруссияö, Минск кар бердö, спортивнöй ротаö. Тыдалö, военкоматад казялiсны ён да винёв сиктса зонтö, öд школаын сiйö öдйö котравлiс лызь вылын. Служитiс куим во – 1957-öд восянь 1960-öдз. Ёртъясыскöд öтлаын ёна тренируйтчис, унаысь ветлывлiс соревнованиеяс вылö.

Служба бöрас кольтчис Белоруссияад, пырис уджавны «Правда» колхозö. Колхозын велöдчис уджавны трактор да комбайн вылын. Тöдмасьлöма белорусскöй нывкöд, дыр ёртасясны, но гöтрасьтöдз абу воöмаöсь. 1978-öд воын Василий Панюков бöр локтiс чужан Коми му вылö.

Локтiс От «гöра» вылö, кöнi Пальдорын (От грездлöн юкöн) сiйö кадас олiс Галина чойыс. Пырис уджавны совхозö трактористöн. Сямлуныс, кодi чукöрмис Белоруссияын уджалiгöн, ёна отсалiс турун заптiгöн, гöра-кöдза кадö да урожай идралiгöн.

Василий Васильевич важöн нин пенсия вылын. Таво арнас сылы тырис 86 во. Арлыд вылö видзöдтöг сiйö пыр мыйкö вöрö-уджалö. Тöвсö колльöдö Сыктывкарлöн Эжва районын, водз тулыссянь да сёр арöдз, быттьö лунвыв лэбач, От грездын. Торъя нин радейтö сiйö вöр-ваын кад колльöдны. Томджык дырйиыс кыйлiс зверь-пöтка, но пöрысьлань синъясыс слабмисны. А вот чери кыйö öнöдз, кö