Главная Общество Ровесник районной газеты

Ровесник районной газеты

2 июня 2017
Таво миян районнöй «Вперёд» («Водзö») газет пасйис 85 вося юбилей. Тайö кад коластас редакция пыр мунiс уна журналист, на лыдын вöлi и Леонид Огнёв, кодi сетiс газетлы ас олöмсьыс кызь сайö во.
 
 
Чужанiнö Леонид Огнёв, Изьва районса Кельчиюр грездса велöдчанiнын школьникъясöс дыр велöдöм бöрын, воис сюрс öкмыссё квайтымынöд вояс помланьыс. Пырис уджавны редакцияö корреспондентöн видз-му овмöс юкöнö.
 
Сiйö кадö районын асфальт туйяс эз вöвны, машина вöлi этша. Сэк жö видз-му овмöс ужалiс тыр вынöн: районын вöлi куим ыджыд совхоз, пöшти быд ыджыд предприятиелöн – отсöг сетан овмöс. Эз дышöдчыны видзны мöс-порсьтö да кролик-курöгтö и сиктса олысьяс. Став тайö сиктса олöмсö колö вöлi петкöдлыны лыддьысьысьяслы районса газет пыр.
 
Редакцияын вöлi важиник «Уазик», но сiйö ёнджыкасö сулалiс: запчастьяс судзöдны вöлi сьöкыд, а лёк туйяс вылад важ машинаыд вöлi век жугалö. Медым чукöртны информация, ковмылiс уна ветлöдлыны подöн, корсьны попутнöй машинаяс. Бур, мый водительяс сэки век вöлi босьтöны туйö петöм войтыртö, тшöтш и журналистъясöс. И сьöмтö нуöдöмсьыд некор вöлi оз корны. Отсавлiс и сiйö, мый журналистъясöс унаöн вöлi тöдöны чужöм вылас.
 
Леонид Огнёв редакцияын öдйö лоис ас мортöн. Сибöс да зiль уджалысь, некымын тöлысьöн сiйö тöдмасис эз сöмын став редакцияса да типографияса уджалысьяскöд, но и уна механизатор, доярка да мукöд видз-му овмöс специалистъяскöд. Шоныда и сьöлöмсянь сiйö гижис сикт-грездъясын олысь да уджалысь войтыр йылысь. Быдöнлысь сяммис аддзыны кыпыд да югыд бокъяссö и уджалысь морт, кодöн кöть сiйö эз вöв – дояркаöн, трактористöн, конюхöн, тöдiс, мый сiйö колана и пыдди пуктана.
 
Район пасьтала ветлöдлiгöн, Леонид Степанович öдйö чукöртiс внештатнöй корреспондентъясысь актив. Гижан уджö пырöдчисны зоотехникъяс, агрономъяс, учительяс... Та вöсна сиктса удж да олöм йылысь газетын век вöлiны тöдчана да быдсикас юöръяс. Видз-му овмöс специалистъяскöд öтувъя вöчöм гижöдъяс öшöдлывлiсны фермаяс вылын да контораясын гöрд пельöсъясö.
 
Аслас удж кузя Леонид Огнёв вöлi репортёрöн: уна ветлöдлiс, öдйö гижис да сетлiс печатьö гижöдъяссö. Но вöлiны кад коластъяс, кор журналист ланьтлывлiс аслас пельöсын, и быдöн тöдiсны, гижö сэтшöмтор, мыйысь лыддьысьысьяс мöдасны ваксьыны, а сэсся звöнитны и гижны письмöяс. Сылöн ручка улысь петлывлiсны гиперболическöй чужöмъяс гусясьысь вузасьысьяслöн, дыш да сямтöм уджалысьяслöн. Но унджык йöзыс, кодъяс асьнысö тöдмавлiсны фельетонъясысь, эз кутны лöг журналист вылö. Мыйла? А сы вöсна, мый сылöн сатира да юмор вöлiны кокниöсь, велöдтöг, но «переч» и серам сорöн. Лыддьысьысьяс фельетонöн газетнöй номеръяс лыддьывлiсны розьясöдз и виччысисны выль гижöдъяс.
 
Газетö уджавны Леонид Степанович локтiс нин тырвыйö атмöм гижысьöн. 1960-öд воын сылöн петiс медводдза повесть челядь йылысь «Татчö быдмасны дзоридзяс», 1963-öд воын сылöн висьтъяс пырисны «Гажа сёрни» небöгö, 1967-öд воын «Нюм» торъя небöгын петiсны серамбана висьтъяс. Таысь кындзи сiйö век топыда уджалiс «Войвыв кодзув» да «Чушканзi» журналъяскöд, «Югыд туй» газеткöд. Сылöн висьтъяс да повестьяс йöзöдöма ещö кык небöгын, а куим во мысти, кулöм бöртиыс, 1994-öд воын петiс висьтъяслöн сборник «Пöсь кöлöбъяс».
 
Кодi вермис мöвпавны, мый Леонид Огнёв пырас куим тома «Республика Коми» энциклопедияö? Восьтöй мöд том небöгсö и 360-öд листбок вылысь тi аддзанныд тöдса чужöм.  

Печатьö лöсьöдiс АЛЕКСАНДР ЛЮТОЕВ.  

 

Комментарии (0)


Противодействие коррупции



Фотогалерея
Версия для слабовидящих