Радейтана коми журнал

Неважöн «Чушканзi» журнал пасйис ассьыс 65 во тырöм медводдза номер петöмсянь. Юбилей вылö корлiсны и Емдiн районысь Иван Баженовöс.

Иван Алексеевич важöн нин гижö, кыдзи внештатнöй сотрудник, «Чушканзi» журналö, и оз сöмын сэтчö, но и «Вперёд» да «Коми му» газетъясö. Водзсö гижлывлiс и мукöд газет-журналö.

СССР дырйи страна пасьтала петавлiс некымын дас татшöм журнал, кыдзи «Чушканзi». Сэки позьö вöлi гижны тырмытöмторъяс йылысь, но кор олöмыс вежсис, миян странаын лоис «ставыс бур» и сатира пондiс вошны. Öнi Россияын, кыдзи висьталiс Иван Баженов, петöны сöмын кык сатирическöй журнал – Комиын да Татарстанын. Миян – коми кыв вылын, Казаньын журналсö печатайтöны роч кыв вылын.

«Чушканзi» журнал вылö гижöдча важöн нин, – висьталö Иван Баженов. – Коркö и ачым босьтi киö ручка и пондi гижны. «Чушканзi» журнал быд вит во паськыда пасйö ассьыс юбилейнöй вояссö. Вот и таво журналлöн коллектив чукöртлiс ассьыс внештатнöй гижысьяссö да лыддьысьысьяссö Сыктывкар карса администрациялöн концертнöй залын. Корлiсны и менö.

Кыдзи и воддза, 60 вося юбилей дырйи, республикаса ыджыд чина йöз висьталiсны уна чолöмалана кывъяс, а сэсся республикаса национальнöй политика министерствоöн веськöдлысь Роман Носков журналлöн редактор Анжелика Елфимовалы, штатнöй да внештатнöй журналистъяслы козьналiс аттьöалана гижöдъяс да козинъяс.

Корисны сцена вылö и менö. Ме чуйми – ачыс министр киöд чолöмасис мекöд, ошкыштiс, а сэсся козьналiс аттöалана гижöд да нöшта кык дона козин! Радысла быттьö кывйöс ньылыштi, кöть водзыв и мöвпыштлi, мый колö ошкыштны Анжелика Елфимовалысь уджсö – тайö должность вылас сiйö уджалö неважöн на, а «Чушканзi» журналыс ёна нин вежсис – лои гажаджык да ёсьджык. Сцена вывсянь мыйкö дерт висьталi жö, но падмöм вöсна бурасö ог и помнит, мый.

Официальнöй юкöн бöрын вöлi ыджыд концерт: сцена вылын сьылiсны и йöктiсны, да нöшта на и серамбана сценкаяс петкöдлiсны. И ставыс сöмын коми кыв вылын – кор ещö татшöмтö аддзылан? Зэв ыджыд аттьö ставыслы, кодъяс вöчисны татшöм гажа праздник.

А тi кöсъянныд тöдмавны, мый йылысь ме гижлывлi «Чушканзi» журналад? Быдсяма серамбана гижöдъяс аслам олöмысь, йöз олöмысь, тшöтш и буртор да лёктор йылысь, мый вöчсьö ми гöгöр. Но тiянлы талун ме кöсъя висьтыштны аслам томдырся олöмын лоöмтор йылысь.

Армияöдз на вöлi тайö, жар гожöмын. Сулалiс турун пуктан кад. Верстьö войтыркöд мунiм ылi совхознöй видз вылö турун чöвтны. Сабрисö пондiм пуктыны вутшкаинö. Регыд мысти Митрей Öль – миян грездса олысь, меным кадысь кадö пондiс шуавны: «Иванö, ме тэныд сапöгад вурдысь шыбитi. Кыскы». Ме сылы лунтыр жö вочавидзи: «Шыбитiн кö – ме казялi. Эг вöд сапöгтö кульлы. Эн дышöдчи!»

Эг эскы ме Митрей Öльыдлы. Но кор вои гортö да кули сапöгтö – уси вöд зверыд: тыдалö, аддзöма ытшкöм турун увсьыс дзебсьöм вурдысьтö Митрейыд, бытшкöма лэбыннас да сюйöма звер тушасö (абу вöд ыджыд) меным бöрсянь сапöг гöльöняд. Эг и казявлы. Лунтырнад сiйö ёна лямсьöма. Сетi каньлы. Ок и чöскыда сёйис! А бöрнас ещö на корны пондiс. Час, мися, аски гашкö бара на кодöскö Митрей Öльыд шыбитас сапöгад – вая да чöсмасян, аслыд кö оз шед. Но сэсся гортö век тыртöм сапöгöн волывлi.

Тайö лоöмтор йывсьыс гижлi карын, чой ордын, да пыр и сетi сылы лыддьыны. Ок и ёна жö сiйö сералiс лыддьöм бöрад, синва петтöдзыс! Важöн нин ме эг аддзывлы чойöс татшöм гажаöн. Шуис меным: «Сет «Чушканзiад», мед йöзöдöны».

Дона ёртъяс, коми кыв радейтысьяс – гижöдчöй «Чушканзi» журнал вылö, лыддььöй сiйöс. Гашкö и тiян лов вылад лоö кокньыджык да гажаджык гижöдъяссö лыддьöм бöрас».

Миян öнiя олымын эм унатор, мый йылысь позьö гижны «Чушканзi» журналад. Вöд юмор да сатира сы вылö и эм, медым серамбан сорöн петкöдлыны тырмытöмторъяс йылысь. Водзсö тайö вöлi мукöддырйи отсалö бергöдны олöмлысь кутшöмсюрö юкöнъяс бурлань. А öнi мый – оз?

Печать кежлö лöсьöдiс АЛЕКСАНДР ЛЮТОЕВ.