Морской пехота век мунö водзын

Великöй Отечественнöй вöйна дырйи немецкöй салдатъяс шуисны морскöй пехотинецъясöс сьöд смертьöн, ёна полiсны, и эз весьшöрö.

Сергей Богданов

Заполярьеын сiйö кадас капитан морской пехоты званиеын служитiс Василий Павлович Кисляков, Печора ю дорса Шöр Бугаево сиктын чужлысь морт. Войвыв флот вылын сiйö медводдзаöн лоис Сöветскöй Союзса Геройöн.

Сы бöрын Войвыв флот вылын нуисны служба Коми муысь уна сё зон, тшöтш и Емдiн районса От «гöра» вылысь том войтыр. Вот и кольöм вося ноябрьын сэтчö шедiс ещö öти миян том морт – Сергей Богданов.

Армияö мунтöдзыс Сергей помалiс Кöжмудор сиктса шöр школа. Велöдчыгöн ёна радейтiс физкультура урокъяс, ветлöдлiс волейбольнöй секция вылö, бура петкöдлiс асьсö районнöй да республиканскöй соревнованиеяс вылын. Век сьö-лöмсяньыс уджавлiс школьнöй трудöвöй бригадаын. Да и гортас эз дышöдчы – кыдзи вермис, отсасис бать-мамыслы. Батьыс – Валерий Юрьевич, сiдз жö том дырйиыс служитлöма Войвыв флотын, но корабль вылын матросöн. Мамыс уджалö магазинын вузасьысьöн.

Сергей Богданов – зэв пельк да öвсьытöм зон. Босьтöм удж пыр зiльö помавны да вöчны бура. Школа бöрын пырис велöдчыны Сыктывкарса сервис да связь колледжö, электромонтёр охранно-пожарной сигнализации специальность кузя. Содтöд велöдчис и водитель вылö.

Войвыв флотлöн 61-öд торъя Киркинесскöй Краснознамённöй морскöй пехоталöн бригада, кытчö мöдöдiсны Сергейöс, öнi базируйтчö Спутник нима неыджыд посёлок дорын, кöнi олöны кык сюрс гöгöр морт. 120 километра сайын Мурманск кар. Неылын Норвегиякöд граница. Медматыс ыджыд йöзлöн оланiн – посёлок Печенга.

Салдатъяс олöны нёль судтаа казармаын. Öти этаж вылас вöчöма перепланировка – ыджыд узьланiнъяс юкисны сiдз шусяна кубрикъяс вылö. Быд жырйын öнi олö квайт морт. Крöватьясысь кындзи эмöсь тумбочкаяс, пызан. Öти душ блок вылö. Мукöд этажъяс вылас, кыдзи и водзсö – казармаяс, кöнi сулалöны уна кык судта крöвать.

Подразделениелöн историяыс завöдитчö 1943 воын, кор вöлi формируйтöма 67-öд морскöй бригада. Сiйö мездiс фашистъясысь норвежскöй Киркинес кар. Таысь бригадаыслы и сетiсны Киркинесскöй ним. Вöйна бöрти бригадасö вуджöдiсны полкö, кодöс пыртiсны сухопутнöй вöйскаяс лыдö. Сэки жö вуджöдiсны полксö Спутник (водзсö Какури) посёлокö. 1966 воын полксö бöр вуджöдiсны Войвыв флотö и сiйö лоис 61-öд морскöй пехоталöн торъя бригадаöн.

Бригадалы ковмис мунны чорыд тышъяс пыр и öнiя кадö – кыкнан чеченскöй кампания дырйи. Медым морскöй пехотинецъяс вöлiсны дасьöсь быдсикас лоöмтор дорö, наянöс велöдöны чеччавны парашютöн, öдйö пышъявны да сяммыны дзебсьыны быдсикас рельеф вылын, бура лыйсьыны стрелковöй оружиеысь. Сiдзжö велöдöны устав, строевöй подготовка, сетöны том йöзлы и теоретическöй тöдöмлунъяс.

ВАСИЛИЙ КОСТРОМИН.