Менам важ фотография

Тайö фотография вылас, кодöс ме вöчлi ачым 1972 вося февральын, менам мам Лариса Баженова да сылöн сöседкаыс Антонина Шашева.

Антонина Шашева (шуйга вылас) да Лариса Баженова

Нывбабаясöс фотографируйтлi Гажакерöсса часовня дорын – 1990-öд воясö часовняыс сотчылiс. Нывбабаяс вöлi мунöны бöрйыны картупель «Коквицкöй» совхозса овощехранилищеö. Кианыс налöн карасин лампаяс – овощехранилищеын биыс эз вöв.

Тайö нывбабаясыс важöн нин мöдар югыдынöсь, абуöсь нин Емдiн районын и совхозъяс – «Коквицкöй», «Гамскöй» да «Усть-Вымскöй». От «гöра» вылын совхозын уджалiсны витсё гöгöр морт, видзисны сюрс сайö мöс, да сы мында жö кук-öш быдтiсны яй вылö, уна дас гектар вылын быдтiсны картупель да капуста.

Совхоз сиптöм бöрын видз-му овмöс От «гöра» вылын бöрсö эз и лэптысь – видз-муяс тырöны борщевикöн да вöрöн, сикт-грездын гежöда нин кывлан мöслысь баксöм да курöглысь котсöм. Да и йöзыс пондiсны бырны – томыс мунöны овны карö, челядь лыд воысь во чинö, олöма йöз кулöны. Татшöмторсьыс синваыд ачыс пондö сöдзтысьны синъяссьыд…

ИВАН БАЖЕНОВ.