Конференциялы паныд

Рубрики

Архив новостей

апрель 2024

пон	втр	срд	чет	пят	суб	вск
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30

Главная

Общество

Конференциялы паныд

13 декабря 2018

Öшым тöлысся 14-öд лунö Емдiн сиктса культура керкаын лоö нуöдöма 29-öд районнöй коми конференция «Сöстöм оланiн – дзоньвидза йöз» медшöр мöвп улын.

Кольöм вося коми конференция вылын резолюцияö вöлi пыртöма 25 юалöм да мог, кодъяс медъёна майшöдлöны Емдiн районса олысьясöс. Резолюциясö вöлi мöдöдöма Коми Республикаса Правительствоö, Каналан Сöветö, районса да меставывса администрацияясö.

«Кольöм вося конференциялöн резолюцияысь 16 юалöм да мог артмис вöчны ставнас либö кутшöмкö налысь юкöн, – висьталiс Емдiн районса коми представительствоöн веськöдлысь Елена Мокрушина. – Содтöд сьöмöн могмöдöма этно-культурнöй методическöй велöдан комплектъяс да небöгъяс лэдзöм. Мунö удж проектно-сметнöй документация лöсьöдöм школа-сад Мадмас посёлокын стрöйтöм могысь. Микунь карын дзоньтавсьö культура керка. Помалöма Зöвсьöрт посёлокса культура керка дзоньталöм вылö проектно-сметнöй документация лöсьöдöм. Локтан воö Айкатыласа культура керкаö корам экспертъясöс, медым найö видзöдлiсны, мый сыкöд водзö позьö вöчны.

Зöвсьöрт посёлокса Молодёжнöй да Емдiн сиктса Севернöй уличаяс вылын лöсьöдöма пода йöзлы вуджанiнъяс да машинаяслы öдсö чинтан мылькъяс. Илья-Шор посёлокын сувтöдöма МЕГАФОН сотöвöй операторлысь неыджыд станция. Дасьтöма республикаса телеканал «Юрган» трансляция спутник да цифрöвöй йитöд пыр быд сикт-грездын да посёлок-карын.

Ыдждöдöма квота «Народнöй бюджет» проектъяс олöмö пöртöм могысь. Вöрзис места вылысь гортса ёг посни грездъясысь чукöртöм. 2019 воын лоö дзоньталöма районса гортса ёг чукöртан полигон вылö туй. Емдiн районса шöр бурдöдчанiнö ньöбöма диагностическöй аппарат «Маммограф». Аукцион пыр Зöвсьöртса поликлиникаö регыд лоö ньöбöма выль рентгенологическöй установка. Мунö удж Илья-Шор посёлокын выль ФАП стрöйтöм кузя.

Ыджыд удж нуöдöма Емдiн районлöн армöм кадпас стöчмöдöм кузя. Кольöм вося öшым тöлысьын районнöй Сöветса депутатъяс ёнмöдiсны районлысь выль чужан лун, кодöн лоис 1922 вося ода-кора тöлысьлöн мöдöд лун».

– Елена Владимировна, вöр-ва видзöм, кöинъяслöн бöръя воясö ыджыдалöм лэптылiсны и кольöм вося конференция вылын. Артмис-ö мыйкö вöчны во быдöн тайö туй визь вылас?

– Некымын во сайын районын збыль вылысь ёна кöзяйничайтiсны кöинъяс: джагöдлiсны кыйсьысь да гортса понъясöс, фермеръяслысь ыжъяссö. Но бöръя кык вонас районса охотобщество вöчис ыджыд удж кöин лыд чинтöм могысь и öнi вöрса рöзбойникъяс ёна гежöдджыка пондiсны пыравлыны сикт-грездъясö да вöрса посёлокъясö. Районса кыйсьысь-вöралысь пыр кыйöдöны тайö зверъяссö и артмö кö – кыйöны.

Вöръяс, юяс да тыяс, кытчö медъёна волывлöны районын олысь да бокöвöй войтыр: öктыны тшак, вотöс, кыйны чери да пöтка, шойччыны, вöр-ва видзан ведомствояс пыр ёнджыка кутöны тöд вылас да видзöны. Но медым вöр-ва видзан уджыс бура мунiс, колöны вочча воськовъяс и йöзсянь. Тайö кö оз ло, вöр-ваным восянь во мöдас гöльмыны, вöд сылöн озырлуныс абу быртöм.

– А кутшöм тöдчана мог эз артмы вöрзьöдны места вывсьыс?

– Артмис эз ставыс. Айкатыла сиктын öнöдз эз артмы вöрзьöдны выль КОС стрöйтöм кузя удж. Та вöсна канализационнöй стокъяс колана весавтöг веськалöны Нёмыд да Шежам юясö, а сэсся Эжваö. Сiдз жö та вöсна райцентрын уна квартираа джын керкаыс öнöдз сулалöны ватöг да шöр канализациятöг.

– Кыдзи районса войтыр пыртöдчöны общественнöй да культурнöй уджö?

– Емдiн районса олысьяс окотапырысь участвуйтöны поселенческöй да районнöй мероприятиеясын. Медыджыд праздникъясысь öти – ода-кора 9 лун. Таво тайö лунас район пасьтала сöмын «Бессмертнöй полк» акцияын уаствуйтiсны 3 сюрс гöгöр морт. Тайö петкöдлö öнiя олысь войтырлысь дед-прадедъясыслысь вöйна кадся подвиг донъялöм.

Регионкост фестиваль «Пелысь гаж» кежлö дасьтысигöн и праздник нуöдiг дырйи зэв ёна отсасисны волонтёръяс, предприятиеясын да организацияясын уджалысьяс, районын став олысьяс, кодъяс йитiсны асьнысö праздниккöд. Фестиваль нуöдiгöн театрализованнöй представлениеясын участвуйтiсны сюрс сайö самодеятельнöй артист. Мастеръяс да киподтуя йöз шензьöдiсны гöстьясöс асланыс уджъясöн. Районса поселениеяс паськöдiсны ассьыныс подворьеяс.

Регионкост эко-фестиваль вöлi дасьтöма Коми Республикалöн 97-öд во кежлö и чукöртiс водзсö та мында вöвлытöм участникöс да гöстьясöс. Гаж сценарийö вöлi пыртöма Емдiнса му вылын историческöй вöвлöмторъяс.

– А мый вöчсьö районын коми кыв да культура видзöм да сöвмöдöм могысь?

– Емдiн районса МОД «Коми войтыр» представительствоса член, Айкатыла сиктса олысь Снежана Исакова, öтнас Комиысь петiс регионкост конкурс «Красавица в стиле этно» финалö. Тайö конкурсыс мунiс народнöй творчестволöн международнöй фестиваль «Окно в небо» рамкаясын Удмуртияын. Снежанаысь кындзи тайö конкурс вылас вермасьны локтiсны 13 ныв став Россия пасьталаысь. Нывъяс петкöдлiсны ассьыныс талантъяссö «Национальное достояние» дефилеын, висьталiсны ас народъясыслысь мойдъяс, петкöдлiсны асьнысö творчествоын. Снежана Исакова лои вермысьöн «Этноколорит» номинацияын.

Мöдöд во урасьöм тöлысь 21 лунö, международнöй Чужан кыв лунö, район пасьтала школаясын да библиотекаясын МОД «Коми войтыр» активистъяс гижöны «Коми диктант». 2018 воын квайтымын сайö морт видзöдлiсны ассьыныс тöдöмлунъяссö коми кыв правописание кузя. Зэв бура уджсö вöчисны Елизавета Пархачева, Вера Онькова, Ия Овчинникова, Александр Лютоев, Нина Петрова, Валентина Огнева, Валентина Седрисева да мукöд.

Районса «Вперёд» газет некымынысь вонас лэдзлывлö коми кыв вылын листбокъяс.

Уна во нин миян районса библиотекаяслы отсалö гижöдчыны коми газет-журналъяс вылö Россияса Федеральнöй Сöветса депутат Валерий Петрович Марков.

Ставыслы, кодi видзö ассьыс чужан кыв, висьтала таысь ыджыд аттьö. Сiдз жö колö видзны да сöвмöдны коми культура, кодi топыда йитчöма коми кывкöд. Унаöн öтдортчöны коми кывсьыс сы вöсна, мый торъялöмаöсь аслас народлöн культураысь, обычайясысь да традицияясысь.

Лöсьöдiс АЛЕКСАНДР ЛЮТОЕВ.