Коми мусса солдатъяс

От «гöраса» сикт-грездö выль во водзвылын служба вылысь дзоньвидзаöн воисны став призывникъяс, кодъяс мунлiсны Российскöй армияö да флотö служитны 2021 вося арын.

Алексей Политов 

Водзвыв некор он тöд, кытчö вермас шыбитлыны тэнö олöм туйыд. Дерт эз чайтлы Давпи грездса коми зон Алексей Политов, мый служитны мöдас Балтийскöй флотса флагманскöй эскадреннöй миноносец «Настойчивый» вылын.

Эжваса целлюлозно-бумажнöй техникум техник-технолог специальность кузя помалöм бöрын Леша неуна вевъялiс уджыштны, а сэсся ноябрь тöлысьса 21 лунö сылы военкоматысь воис пöвестка. Военкоматса уджалысьяс тöдвылын кутiсны зонлысь дзоньвидзалун да специальность, и мöдöдiсны служитны Войвыв флотса Северодвинск карса велöдчан шöринö. Тадз новобранец Политов мукöд Коми Республикаса зонъяскöд веськалiс велöдчан юкöнö, кöнi дасьтiсны корабльяс вылö трюмнöй машинистъясöс.

Лун бöрся лун матросъясöс тöдмöдiсны корабльяс вылын уджалысь механизмъяскöд, нуöдiсны тренировкаяс. Грездса зонмыдлы татшöмыд эз вöв дивööн – батьыс, Николай Михайлович, ичöтдырсяньыс велöдic писö уджавны быдсикас гортгöгöрса техника вылын. Уна сикас механизмъяскöд тöдмöдöмысь кындзи том йöзöс велöдiсны кусöдны би корабльлöн пытшкöссьыс и ортсысьыс, дугöдны ва пырöм, письтас кö сылöн пыдöсыс или бокыс. Велöдiсны пасьтавны гидрокостюм, вартчыны сiйöс пасьталöмöн. Уна кад велöдчыгöн торйöдлiсны физическöй да стрелковöй подготовка вылö. Учебкаын велöдчыгöн Политов вöлi КПП-са нарядын, «Антитеррор» операцияса тренировкаяс вылын.

Кадыс мунiс лун бöрся лун, матросъяс содтiсны тöдöмлунъяс, пондiсны гöгöрвоны, кыдзи уджалöны корабльяс вылын уна сикас механизмъяс, ёнмисны, велалiсны вöдитчыны уна пöлöс оружиеöн. Матыстчис тулыс, помассис вит тöлысьса трюмса машинистö велöдчöм. Тöдчис, мый том морт служитiс показательнöй ротаын – офицеръяс да мичманъяс бура велöдiсны матросъясöс, и Алексей став зачёт-экзаменсö сдайтiс «отлично» вылö.

Апрель 15-öд лунö сiйöс ёртъясыскöд мöдöдiсны Кронштадтö. «Перекоп» велöдчан корабль вылын матросъясöс вайöдiсны боевöй корабльяс вылö. Леша веськалiс эскадреннöй миноносец «Настойчивый» вылö.

«Тадзи завöдитчис менам корабль вылын служба, – казьтылö Алексей. – Корабльса командир индiс миянöс командаясö: ме да ещö куим зон Сыктывкарысь, Сосногорскысь да Яренскысь веськалiм витöд боевöй юкöнса (БЧ-5) командаö. Корабльса командир миян вöлi стрöг, но веськыд мортöн. Сiйöс пыдди пуктiс став экипаж, босьтiс сы вылысь пример. Офицеръяс, мичманъяс да старшинаяс отсалiсны миянлы, том матросъяслы, бур кывйöн да сöветöн.

Корабль вылын менö индiсны пöжарнöй командаö, а сiдзжö «Антитеррор» группаö, кöнi ме вöлi стрелокöн блокировка группаын. Тайö вöлi менам содтöд обязанность. Вердiсны бура, торъя нин кажитчис борщ да макароны по-флотски. Петавлiм Балтийскöй мореö, вуджим Кронштадтысь Балтийск карö – сiйö Калининградскöй областьын. Восьса море вылысь аддзылi НАТО блоклысь корветъяс да истребительяс. Мореыд зэв мича, меным, войвывса зонлы, нэм кежлö сутшкысис сьöлöмö. Да и матрослöн службаыс тшöтш – сiйö велöдiс венны сьöкыдлунъяс олöмын». 

Алексей демобилизуйтчис 2022 вося ноябрь 21-öд лунö. Вокзал вылын матросöс виччысисны сылöн Маша да Лида чойясыс. Неуна шойтчыштöм бöрын зон бöр пырис уджавны Монди СЛПК-ö. 

Александр Вокуев            

 2022 вося декабрь тöлысьын служба помалöм бöрын бать-мам дорас бöр воис Александр Вокуев. Сiйö мунiс армияö От «гöра» вылысь 2021 воын медбöръяöн, выль вося праздникъяс водзын. Зонмöс военкомат мöдöдiс Архангельск областьса Мирнöй карö, код дорын эм военно-космическöй вынъяслöн велöдчан юкöн.

Сы вöсна, мый Саша армияöдзыс помалiс ДОСААФ-лысь Сыктывкарса автошкола, сiйöс мöдöдiсны велöдчыны МАЗ-543-М механик-водитель категория вылö. Велöдчöм сетчис кокньыа, вöд зон ичöтсянь кужö вöлi веськöдлыны трактор-машинаöн, мотоциклöн. Учебка помалöм бöрын салдатöс да ещö дас сылысь ёртсö мöдöдiсны Подольск кар бердö, противовоздушнöй оборонаcа юкöнö. Сэнi служитiс радио-техническöй батареяын апрельсянь август тöлысьöдз.

Тайö частьын вöлi торъя чорыд дисциплина, вöд ракетчикъяслöн подразделениеяс видзöны миянлысь енэж. Но грездын быдмöм зонлы тайö службаыс вöлi вермöмöн. Недыр мысти Сашаöс мöдöдiсны Московскöй областьö, Дедовск кар бердса Лобаново сиктö. Выль местаын службасö помалiс авторемонтнöй взводын.

Александр абу уна сёрниа морт, ёнджык радейтö кывзыны. «Кыдзи помалi служба, пыр жö «лэби» гортлань», – нюмъялö зон. Ёна жö гажыс бырöма чужан мусьыс, бать-мамсьыс да Валерия чойсьыс.

Öнi Александр сетiс документъяссö Росгвардияö, прöйдитiс комиссия, полиграф да профотбор, виччысьö результат. Чайта, мый татшöм зонъясыд мöдасны и водзö бура служитны. 

Роман Прошев 

Роман Прошев чужис да быдмис Лыаты грездын, помалiс Кöжмудорса школа 2018 воын. Романкöд öтлаын велöдчисны Алексей Политов, код йылысь гижöма вылынджык; Яша Политов – сiйö öнi велöдчö Архангельскöй мединститутын; Андрей Туисов велöдчö Санкт-Петербургса МВД академияын.  

Классыс вöлi ичöт, но дружнöй. Велöдчысьяс пырöдчисны быд спортивнöй да школьнöй мероприятиеö – классöн веськöдлысь Ирина Васильевна Одинцова кужис матöстчыны быд зонка дорö. Зонъяс велöдчан во помалöм бöрын кык сезон уджалiсны школьнöй бригадаын, вöлiны школаса командаын «Юный защитник Отечества» районнöй ордйысьöмъяс вылын.   

Школа помалöм борын Роман пырис Эжваса ЦБТ техникумö, велöдчис техник-технолог вылö, но мыйкö эз кажитчы, да эновтiс. Уджтöг эз ов: мырсис асшöр строительнöй фирмаын, сэсся «Луза лес» предприятиеын. Армияö мунан воас, арнас, пырис велöдчыны Сыктывкарса автодорожнöй техникумö «Мастер по ремонту грузовых автомобилей категории «С» специальность вылö. Тыдалö, ичöтдырсянь техникакöд ноксьöмыс – Роман радейтiс дзоньтавны важиник мотоциклъяс, кодъяс вылын тöвзьывлiс Таркама ягö öктыны тшак-вотöс.

Но воис пöвестка и ковмис босьты академическöй öтпуск. 2022 вося ноябрь 30-öд лунö Роман мунiс карса военкоматö, кысянь ciйöс мöдöдiсны войскöвöй юкöнö. Комиысь некымын зонкöд сiйö веськалiс Ленинградскöй областьö, Всеволжскöй районö, 53167-«У» юкöнö, кодi пырö Балтийскöй флотö.

Лун бöрся лун пондiс мунны матрослöн служба: физическöй нагрузкаяс грездса зон венö кокниа, орччöн Ромакöд служитöны Коми Республикаясь дас сайö земляк. Гижö, мый вердöны бура, оланiн бур, велöдöны воинскöй специальностьö. Романлöн да сылöн ёртъясыслöн бöрö колины пöшти куим тöлысь служба. Тайö каднас зонъяс ёнмисны, примитiсны присяга.

Роман Прошевысь кындзи 2022 вося арын Лыаты грездысь армияö тшöтш мунiс и Кирилл Туркин. Сiйö нуö служба танкöвöй велöдчан юкöнын Каменка карын.

ВАСИЛИЙ КОСТРОМИН.