Чистая природа

Рубрики

Архив новостей

апрель 2024

пон	втр	срд	чет	пят	суб	вск
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30

Главная

Общество

Чистая природа

7 июня 2017

Видз-му овмöс киссьöм, сикт-грездъясын да посёлокъясын важ керкаяс шыблалöм да пöжарнöй правилöяс видзтöм вöсна быд во Емдiн районын биын сотчöны овтöм да олан керкаяс, керка дор стрöйбаяс, пармалöн юкöнъяс.

Медым чинтыны биысь воштöм, вöр видзысьяс да би кусöдысьяс нуöдöны быдлунъя удж районын олысьяскöд. Тулыс-гожöмын налöн медшöр мог – тöдмöдны йöзöс оланпас кывкутöм нормаяскöд кос турун да ёг правилöяс торкалöмöн сотöмысь, вöрын бипуръяс öзтöмысь. Та вöсна жö май витöд лунö Коми Республикаса Юралысьлöн Емдiн районса öтувъя приёмнöйын чукöртчылiсны государственнöй учреждениеясöн веськöдлысьяс, кодъяс водзын пуктöма мог видзны кар-сиктъясын стрöйбаяс да вöр биысь: Валерий Боле, Емдiн районса надзорнöй да профилактическöй уджöн веськöдлысь, Андрей Колобов, ГУ РК «Айкатыла лесничествоöн» веськöдлысьöс вежысь да Артём Микличев, Емдiн районса вöр-ва видзан комитетöн веськöдлысь.

Сёрни мунiс векся юалöмъяс гöгöр: шыбитöм стрöйбаяс да му участокъяс, сикт-кар гöгöрса вöръяс ёгöн тыртöм, кос турун да ёг правилöяс торкалöмöн сотöм йылысь. Ыджыд тöжд воысь-во содö шыбитöм да дöзьöртöм стрöйбаяс гöгöр, кодъяс сулалöны олан керкаяс да муниципальнöй учреждениеяс дорын. На бöрся некод оз видзöд, öшинь-öдзöсъяс унджыкыслöн восьсаöсь, гöгöрыс кос турун да ёг. Кык во сайын Айкатла грезд шöрын сотчис нин кык судтаа вöвлöм быт керка. Би кусöдысьяс öдва вермисны дорйыны орччöн сулалысь олан керкаяс. И татшöм шыбитöм стрöйбаыс эм быд грездын, сиктын да карын. Бöръя кадö налöн лыдыс ёна содiс йöзöс важ да киссян керкаясысь выль оланiнö вуджöдöм бöрти. Тыртöм керкаяс, дерт, колö разьны, но сьöмыс муниципалитетъясын оз тырмы. Оз тэрмасьны разьны важ керкаяссö и эмбур кутысьяс. Но танi бöръя кадö тыдовтчисны вежсьöмъяс: эм нин оланпас, код кузя эмбур кутысьясöс мöдасны штрапуйтны му лёка видзöмысь да ёг-борщевикöн тыртöмысь. Мöд мог – кодi тайö оланпассö пöртас олöмö сикт-грездъясын?

Ыджыд профилактическöй удж, кодi быд во нуöдсьö районын, сетö ассьыс результат: кос турун да ёг сотöмысь тшын век гежöдджыка мыччысьлывлö керкаяс дорын. Тшöтш и челядь торйöдчöны биöн ворсöмысь. Тайö зэв бур и тадзи кö водзö мöдас мунны уджыс, регыд вöтöдам финнъясöс: Финляндияын кос турун сотöмысь да бипур кусöдтöг кольöмысь пöжаръяс пöшти оз овлывлыны.

А вот вöр-ва ёгöн тыртöмкöд тышкасьны ог на вермöй. Некодысь яндысьтöг унаöн шыблалöны олан коляссö быдлаö, кытчö шедö: канаваясö, туй бокъясö, вöрö, ваö… И оз гöгöрвоны йöзыс, мый став лёкыс, сiйö жö пластик шондi водзын сiсьмöмсьыс, бöр воö налы: сынöд, ва да сёян пыр. И таысь некытчö он пышйы. Вöр-ва няйтöсьтöм да ковтöм вöлöга сёйöм вöсна районын ёна паськалöны онкологическöй висьöмъяс. И висьöны оз сöмын олöма, но и том йöз, и весиг кык-куим арöса кань-понъяс.

Веськыд йитöд вылын сёрнитысьяс помас вöчисны кывкöртöд, код йылысь колö помнитны быдöнлы: оз позь керкаяс да стрöйбаяс дорын матын сотны кос турун, ёг да чаг-лöп; ва дорын, вöрын öзтылöм бипур мунiгад колö бура кусöдны, артмöм няйт-ёгсö колö сотны или босьтны сьöрсьыд, медым бöрас шыбитны ёг чукöртан машинаö. Аддзинныд кö öзйöм, колö звöнитны матысса би кусöдан юкöнö тайö телефонъяс кузя: Айкатылаын – 01, 21-7-42; Микуньын – 31-0-01, 32-0-01; Зöвсьöртын – 46-3-60, 47-0-01; Емдiнын – 22-9-11; Кöжмудорын – 24-4-81; Мадмасын – 43-5-39. Вöр öзйöм йылысь колö юöртны Айкатыласа лесничествоö 21-5-38 телефон кузя, либö Сыктывкарö – 8(8212) 39-00-90, 88001009400 (юöрыс мунö дон босьттöг). Медым öдйö корсьны колана телефон номер, бурджык гижны найöс асланыд телефонö.

АЛЕКСАНДР ЛЮТОЕВ.