Рубрики
Кöдзыд саридз бердса му видзысьяс
25 января 2021
Таво арся призыв От «гöра» вылын эз вöв воддза вояс кодь озыр: Россияса армияö да флотö служитны мунiсны сöмын куим зон – Виталий Одинцов, Дмитрий Турбылев да Иван Туисов.
Миян артмис нин бур традиция – тöдмöдны районса «Водзö» газет пыр том йöзкöд, кодъяс служитöны армияын. Медводдзаöн тайö котырсьыс армейскöй «лямка» ас вылас öшöдiс Виталий Одинцов.
Сылöн бать-мамыс От «гöра» вылысь, но öнi уджалöны и олöны Сыктывкарын. Виталий помалiс Киров карын авиационнöй техникум. Мам-батьыслöн чужанiнас коллявлывлiс быд гожöм, танi сылöн эм уна ёрт. Служба вылö мунiс юркарсянь.
Мöдöдöн видзны чужан му мунiс Дима Турбылев, кодi помалiс Кöжмудорса шöр школа. Тайö зон йывсьыс ме верма висьтыштны унджык. Дима велöдчигас ёна занимайтчис спортöн: волейболöн, радейтiс ворсыштны гираясöн, тэрыба котралiс. Унаысь ветлывлiс районнöй вермасьöмъяс вылö: сиктса ворсöмъяс, кокни атлетика, безопаснöй гöгыль, юный защитник Отечества, Орленок… Торъя нин сылöн паметьö тшупсис республикаса «Зарница» военно-патриотическöй ворсöм вылö ветлöм. Спортивнöй вермöмъясысь Димаöс козьналöма уна грамотаöн да медальöн. Ыджыдджык классын пыртiм школаса ДОСААФ организацияö, кодi новлö генерал-полковник А.И.Одинцовлысь почетнöй ним. Зонка вöлi зэв зiль да киподтуя отсасьысьöн.
Школа помалöм бöрын Димаöс военкомат мöдöдiс Сыктывкарса ДОСААФ автошколаö вöеннöй шоперъяс дасьтан курсъяс вылö. Велöдчöм сылы сетчис кокниа, öд сыöдз Дима помалiс районса ДОСААФ школа «В» категория вылö, уна журъялiс-ветлöдлiс бать машина вылас.
Шоперлысь право босьтöм бöрын Дима арöдзыс отсасис бать-мамыслы, а сэсся мöдöдчис армияö. Крепыд дзоньвидзалун вöсна зонмöс мöдöдiсны Войвыв флотса морскöй пехота подразделениеö, аслас специальность кузя.
Служба вылö мунiгöн поезд вель дыр сулалiс öти станция вылын и Дима сэнi воччаасис аслас сиктса ёртыскöд – Максим Виноградовкöд, кодi сiдз жö служитöма Войвыв флотын морскöй пехотаын, Мурманскса Щукозеро бердса войскöвöй юкöнын. Дивö! Оти морпех локтö дембель вылö, а мöд мунö сiйос вежны! Кыдзи фотоснимок «Встреча на Эльбе» вылын. Дерт жö тайö бур примета. Во мысти и Дима тадз жö мöдöдчас аслас чужанiнö. Кыдзи сьывсьö тöдса дембельскöй сьыланкывйын: «Ты не грусти, салага, срок отслужишь свой, и, как я, поедешь ты домой!»
Некымын кыв Дималöн бать-мам йылысь. Батьыс, тожö Дмитрий, но Иванович, служитлiс погранвойскаын Таджикистанын, граница вылын связистöн. Сэки Таджикско-Афганскöй граница вылын и граница дорас кадысь кадö öзйывлiсны конфликтъяс. Сiйö öнi уджалö связистöн Кöжмудор грездын. Мамыс, Ираида Владимировна, уджалö посни челядь видзанiнын. Ичöтджык чойыс, Антонина, велöдчö дасöд классын. Гортсаяс виччысьöны Димаöс и кутöны лача, мый сiйö мунас став сьöкыдлунъяс пыр да лоас бур морскöй пехотинецöн. И миян учительскöй коллектив ёна надейтчö сы вылö, мый Дмитрий вылын кутас миян От «гöраса» салдат-матросъяслысь кыпыд традицияяс и бöр дзоньвидзаöн воас чужанiнö.
А коймöд призывник, Иван Туисов йылысь, висьтыштам бöрынджык, сöмын юöртам, мый веськалiс ciйö ВКС частьясö, служба кыскö Архангельскöй областьын.
ВАСИЛИЙ КОСТРОМИН.
Комментарии (0)
Оставить комментарий
