Эжва – Вежа ва

Эжва – Войвыв Двиналöн медыджыд вож. Сылöн кузьтаыс – 1130 километр. Коми Республикаын Эжвалöн берегъяс да вожъяс вылас олöны 450 гöгöр сюрс морт.

Учёнöйяс быдöн ас ногыс мöвпалöны, кыдзи артмöма сылöн нимыс. Манси кыв вылысь Вычегда вуджöдсьö кыдзи «луговая вода». А комияс пö сiйö кывсö вуджöдöмаöсь ас кыв вылас: эж – «луг», «трава», «зелень». Но коми кыв вылын луг тайö видз, трава – турун, зелень – веж. Веж кыв содтыссьö и сэк, кор гырысь гыяс вылын артмö быг – ю вылас веж гы.

Мансиысь кындзи, кодъяс Эжва бассейнын асланыс кокнидьык пыжъяс вылас уялiсны юяс кузя кыйдöс корсьöм могысь öтарö-мöдарö, Эжва да Войвыв Двина вылын олiсны коми войтырлöн матыс рöдвуж – чудь. Унаöн мöвпалöны, мый Эжва юсö найö нимтiсны Вежа ва нимöн. Комияс тайö кывсö неуна дженьдöдiсны и артмис Эжва.
Колö тöдвылын кутны и сiйö, мый коми-чудь ставыслы, мый вöлi на гöгöр, сетлывлiсны ассьыс нимъяс или объект нимъяссö шулывлiсны ас ногыс, налöн кö нимыс вöлi нин, мед кокньыджыка шусис. Манси кыв вылысь ю нимсö, дерт, вуджöдны найö эз мöдны. Артмö, мый Эжва – тайö Вежа ва, кодi уна сё во видзис и вердiс сы дорын олысь коми войтырöс.

Öнi Эжва вежсис и вежаöн сылысь васö шуны сьöкыд нин. Промышленнöй предприятиеяс, канализационнöй шыблас да мукöд няйт, кодöс сылын берегъяс вылын олысь войтыр шыблалöны ваö, ёна няйтöсьтiсны юсö и Европаын öнi сiйö лыддьыссьö кыдзи ёна няйтöссьöм ваа ю. И Гиннес книга рекордъясын сiйö сiдз жö эм, кыдзи ю, кодi Европаын медöдйö вежö ассьыс туй визьсö.

Россияын 2017 воын вынсьöдiсны программа «Чистая Волга». Программасö олöмö пöртöм могысь федеральнöй да региональнöй бюджетъясысь лоö вичмöдöма уна сё миллиард шайт. Сöмын кольöм воын тайö программа вылас бюджетъясысь вичмöдöма 304 млрд шайт сьöм. Мыйла миянлы, кöть шуам региональнöй тшупöд вылын первойсö, не лöсьöдны да вынсьöдны ассьыным пограмма «Сöстöм Эжва»? Тайöс кö оз ло вöчöма, юсö ми воштам и асьным бырам сылöн берегъяс вылысь.

АЛЕКСАНДР ЛЮТОЕВ.