Бабушка рядышком с дедушкой…

Тайö Раймонд Паулслöн сьыланкывйыс, кодöс сьывлывлiс челядьлöн «Кукушечка» ансамбль, торйöн нин ладмö Седрисев гозъялы, кодъяс во-мöд сайын пасйисны 50 во öтлаасьöмыслы. 

Тупиордлань мунан туй бокын, Дзöля нöрыс чой вылын, зумыда сулалö кыпыд уна жыръя мича керка. Керка дорас уна куст, пуяс, пелькиник стрöйбаяс – пывсян, гожся кухня, теплицаяс, пес видзанiн. Тулыс-гожöмнас керка йöрас дзоридзалöны уна рöма дзоридзьяс. Кöзяйкаыслöн сёрни кузя позьö гöгöрвоны, мый сiйö зэв ёна радейтö ас киясöн лэптöм да уна во чöж сöвмöдöм оланiнсö.

Василий Пантелеймонович да Нина Александровнакöд ме тöдса важöн. Сёрнитчим, мый пырала гöститны, и вот ми нин пукалам кöзяиныскöд сöстöм жырйын сулалысь пызан сайын. Джоджас вольсалöма ас кыöм джодждöра, öшиньяс вылас быдмöны гортса дзоридзьяс. Панi сёрни том дырся олöм йылысь: кыдзи уджавлiм, шойччылiм, вöравлiм да чери кыйлiм. 

Нэм джын руль сайын

Василий Пантелеймонович чужлöма Победа воö, сентябрь 15-öд лунö. Батьыс кувлöма висьöмысь, кор сiйö Тамара чойыскöд вöлöмаöсь ичöтöсь на. Быдтöма да велöдöма найöс мамыс, Александра Афанасьевна, кодi уджавлöма дояркаöн. Бур уджысь сылы козьнавлöмаöсь Трудовое Красное знамя орден.

Первойсö олöмаöсь Иван дядь керкаас, а сэсся босьтлöмаöсь Тупиорд грездысь керка, разьöмаöсь да выльысь лэптöмаöсь Педь кыр вылö. Велöдчыны пырöма нолевöй класса Туис-Керöсса сизим вося школаö – сэк начальнöй школаад велöдöмаöсь вит во. Классыс вöлöма ыджыд, 20 сайö ныла-зонма, а велöдöма челядьöс Людмила Николаевна.

Сизим класс помалöм бöрын Василий 1962 вося арын мöдöдчас велöдчыны Каджеромса ФЗУ-ö тракторист вылö (тайö Печорскöй районын).

«Аддзи газетысь юöр. Сёр арын катерöн нуöдiсны Чёрнöй Ярö, сэсянь воöдчи Микуньö, сэсся поездöн. Мунi öтнам, эг тай повзьы, – казьтылö Василий Пантелеймонович. – 1963 воын ФЗУ помалöм бöрын мöдöдiсны практика вылö Каннинскöй леспромхозö, кодi Каджеромсянь 40 километра сайын. Олi общежитиеын, уджалi слесарьöн. 1964 вося тулысын военкомат пыр модöдiсны шопер курсъяс вылоö, Каджеромса жö ГПТУ-21-ö (ФЗУлысь нимсö тайö кадас вежисны). Помалi август тöлысьын. Шопер право сетöм бöрын декабрь тöлысьöдз уджалi ЗИЛ-157 машина вылын, новлi пес да мукöдсикас груз поселок кузя».

Сiйö жö воас, декабрь витöд лунö, воис пöвестка армияö. Кыдз вöеннöй водительöс, Седрисевöс мöдöдiсны автобатö Свердловск кар бердö. Служитiс куим во: машина вылын новлöдлiс быдсикас вöеннöй груз, волiс Чебаркульö, Курган карö, Вылыс Пышмаö да мукöдлаö.

Куим воыд абу ичöт кад! Бур службаысь шоперлы козьналiсны грамотаяс, юбилейнöй медаль «20 лет Победы над Германией». Но медся тöдчанаыс служба дырйи вöлi чужанiнö öтпуск, кодöс сетiсны 1967 воын. Öтпускалыгöн и тöдмасис том учительницакöд, кодi воис уджавны Туис-Керöсса школаö педучилище помалöм бöрын. Но та йылысь бöрынджык.

Армия бöрын Василий Седрисев стöч куим во мысти – декабрь витöд лунö, воис Туис-Керöсö. Но дыр шойччыны эз артмы. Январь тöлысьса медводдза лунъясö том шоперöс корисны уджавны Туис-Керöсса РММ-са автобус вылö – туйис армияын 2-öд класса право вылö сдайтöм экзамен.

Важиник автобусыс вöлi ГАЗ-51 машина база вылын. Уджалiсны кык сменаöн Бызов А.М. напарникыскöд. Новлöдлiсны вöр пöрöдысьясöс делянка вылö, а удж помалöм бöрас - гортас. Недыр мысти Княжпогостысь капремонт бöрын воис ЗИЛ-157 фургон. Фургоннас сiдз жö новлöдлiсны вöрын уджалысьясöс, майбыр уджалысьыс сiйö кадас РММ-ын вöлi тырмöмöн.

Тöвся сезонö заптылiсны не öти сюрс кубометр вöр. Василий вевъялiс уджыштны и МАЗ-501 да выльджык МАЗ-509 лесовозъяс вылын. Вöрсö вöлi петкöдöны кык сменаöн. Напарникнас вöлiны ас грездса Козлов Н.М. и Леонид Запорожец Зöвсьöртса лесобазаысь. Вöрыс матiгöгöрсьыс уна во чöж пöрöдöмысь чинiс и пöрöдчыны ковмывлiс Туис-Керöссянь 60 километр сайысь. Куш туй вылас вöлi мунö кык час гöгöр, а тулыс-арнас и нöшта унджык. РММ-ын удж мöдiс вочасöн кусны.

1974 воын Василий Пантелеймонович вуджö уджавны Чёрнöй Ярса «Сельхозтехникаö» автомеханикöн. Уджалiс сэнi во джын сайö: удж вылö колö вöлi воöдчыны мотора пыж вылын, а рöспута кадö овны общежитиеын. Семейнöй мортыдлы, да ещö кор кöзяйствоад видзан скöт, сьöкыд тадзитö овны. Кор воссис производственное объединение «Связь» организацияын шопер вакансия, возйысис сэтчö удж вылö.

Асфальта туйяс сэки эз вöвны, прамöя ковмывлiс песны-нырны машинатö. 15 во чöж связьын уджалiг вежис нёль машина. А кор вольсалiсны асфальт, морттö сократитiсны – öнi пö карса шоперыд татшöм туй кузяыд кужас рулитны-новлыны пошта грузтö.

Уджась мортыд дыр весь эз ов – бур шоперыдлы уджыд пыр шедö! Корисны Василий Пантелеймоновичöс От гöраса сельпо кустö. Веськöдлiс вузасян предприятиеöн Эрик Иович Козлов. Сiйö тöдмöдiс шопертö выль уджкöд. Седрисев новлöдлiс гöраса лавкаясö тöвар. Ас пöжалöм няньыс вöлi озджык тырмы и вежоннас кыкысь сiйö калывлiс карса пекарняö. Арнас чукöртлывлiс картупель, кодöс сдайтлывлiсны сикт-грездъясын олысь йöз. Тадз руль сайын колины олöмлöн воясыс. 2000 воын петiс пенсия вылö, шопералан стажыс катовтiс 50 во сайö.

Василий Пантелеймонович весьшöрö овны абу велалöма: дöмлiс-лöсьöдiс важиник МТЗ-52 трактор, важ кöртысь гöр, трактор вылö прицеп. Лöсьöдöм техникаыс отсалiс кутны керка дорса кöзяйство: вель дыр гозъя видзисны мöс, кукань, порсь, öти кадö – дзодзöгъясöс. Василий Пантелеймоновичлöн готырыс, Нина Александровна, казьтылö, кыдзи матысса школаысь челядькотыр вöлi волывлöны видзöдлывлыны татшöм дивö вылас. Гожöм-арын заптiсны пияныскöд тшак-вотöс, чери öнöдз кыйöны.

Öтчыд, во-мöд сайын, водз тулыснас кыясьны мунiгöн Василий Пантелеймонович «Буран» снегоходнас веськавлöма лым увса юкмöсö. Мортыд аслас 70 ар вылö видзöдтöг вермас юкмöссьыд кайны крепыд йи вылö, дажö насмöка абу босьтлöма крепыд мужиктö. А «Бурансö» дыркодь кошкаалöмаöсь и лэптöмаöсь йи вылö, майбыр абу джуджыд ваыс вöлöма.

Нелямын во школаын

Нина Александровна Савельева чужлöма 1946 вося сентябрь первой лунö Висдiн сиктын уна челядя семьяын. Батьыс, Александр Иванович, фронтовик, ёна ранитчывлöма. Сiйö квайт арöсöн кольлöма сирöтаöн, быдтöма тьöтыс – батьыслöн чойыс. Сiйö ичöтысянь, медым корсьны кынöмпöт, уджавлöма быдсяма удж вылын.

Бать-мамыс Ниналöн уджавлöмаöсь колхозын: мамыс дояркаöн да тшöтш и ыжъясöс дöзьöритöма, а батьыс быдсяма удж вöчлöма. Семьяас вöлöма сизим челядь, но тшыглы олöмысь да висьöмысь нёльыс кулöмаöсь – кольöмаöсь Нина да сылöн кык вок.

Нина челядь пöвстысь вöлöма медичöтыс. Сизим арöсöн сiйö пырас велöдчыны Висдiн сиктса сизим класса школаса нолевöй классö. Кöкъямысöд класс помалiс Айкатылаын. Сы бöрын пырис велöдчыны Сыктывкарса №1 педучилищеö, кöнi велöдчис нёль во. Велöдчис ныв радпырысь, сентябрь первой лунö чужöмыс лоис тöдчана пасöн – педучилище помалöм бöрын сылы сетiсны начальнöй класса велöдысьлысь диплом.

Олöмыс лöсялiс бы мöд ног, том велöдысьöс кö мöдöдiсны Зöвсьöртса школаö. Но сы вöсна, мый учительница тöдiс чужан коми кыв, Нина Александровналöн туйыс нюжалiс Туис-Керöсса начальнöй школаö.

Сэкся кадö том учительястö вöлi овмöдöны öтка олысь бабъяс дорö, кодлöн керкаас вöлi торъя жыр. Тадз Нина Александровна овмöдчис менам мам кузя бабордö Манефа Степановна олiс öтнас, верöсыс, менам дед Пантелеймон Фёдорович, усьлöма вöйна вылын 1942 вося арын Нева ю вомöн вуджигöн.

Мелi гöлöса, сиктса коми ныв пыр жö воис баблы сьöлöм вылас. Телевизор сылöн эз вöв и кыкнад вöлi гажаджык коллявны кузь тöвсёв рытъястö, да и отсöг век вöлi уджась нывсянь. Колö пасйыны, мый баб ордын частö овлывлiс менам ичöтджык вок Саша, церебральнöй параличöн чужöмсянь инвалид. Нина Александровналöн терпеньеыс тырмылiс лунтыръя челядь шум-гам бöрын велöдны вокöс лыддьысьны да артасьны-гижны. Тшöкыда петкöдлывлiс сiйöс гуляйтны моски кузя грездö. Зэв ыджыд аттьö öнi висьталам таысь!

Школаын Нина Александровна уджалiс 40 во сайö, пыр вöлi бур велöдысьяс лыдын. Уджалiс эськö радейтана удж вылас дырджык, но пондiс висьöдчыны. Пенсия вылö петöм бöрын бара на корiсны вежны том учительницаöс, кодi пырис велöдчыны Коми пединститутö. Содтöд уджалiс школаын куим во сайö.

Школаын уджалiгöн Нина Александровна зiля нуöдiс общественнöй удж, участвуйтiс художественнöй самодеятельностьын. Бур уджысь сылы козьнавлiсны уна грамота, эм «Отличник народного просвещения», «Почётный работник общего образования» морöс выв знакъяс, «Ветеран труда» медаль, «Старший учитель» звание. Медводдза грамотасö сетлöмаось 1967 воын октябрь 28-öд лунö. Нина Александровна – Кöжмудор сиктса поселениелöн почетнöй гражданин (свидетельствосö сетлöмаöсь 2013 воын).

Öтувъя олöм

Кор Василий Седрисев служба дырйи волiс гортас öтпускö, Нина – мича том ань, пырысь-пыр воис сылы сьöлом вылас. Армия бöрын том йöз öтлаасисны. Первойсö олiсны кык судтаа 12-квартираа керкаын. Олiсны сэнi матö 15 во, а сэсся мöвпыштiсны лэптыны ас оланiн. Василий Пантелеймонович, кодi ичöтысянь кужис уджавны чер-пилаöн да техника вылын, ёртъясыскöд заптiсны вöр, пилитiсны пилорамаын брус вылö. Недыр мысти Дзöля нöрыс бокын лыбис кыпыд уна жыръя керка.

Гозъя быдтiсны кык пиöс, отлаын олöны 50 во сайö – кöлысьыс вöлi 1970 вося март тöлысьын. Юбилей бöрын гозъялы козьналiсны «За любовь и верность» медаль да грамота. Тайö наградаясысь кындзи Таня внучкасö быдтöмысь да воспитайтöмысь Василий Пантелеймоновичлы да Нина Александровналы козьналiсны «За добросовестное воспитание» грамота. Öнi Таня внучкаыс, колледж культуры помалöм бöрын, пырис велöдчыны Институт культуры и искусстваö, кодöс восьтiсны Сыктывкарын 2021 воын. Велöдчö сiйö художественной культура и дополнительное образование факультет вылын.

Гозъя олöны-вылöны ёрта-ёртсö пыдди пуктöмöн, öтсöгласын. Гажа да кыпыд керка дорас, кодысь меставывса администрация козьнавлiс грамота «За лучшее подворье», тшöкыда кывлывлö Юля внучкаыслöн дзольгöм-сералöм. Волывлöны и Саша пиыслöн ныв-зонмыс, оз вунöдлывлыны дона дед-бабсö.

Сиктса олысьяс пыдди пуктöны Нина Александровна да Василий Пантелеймоновичöс, кодъяс вылысь позьö босьтны пример том йöзлы.

ВАСИЛИЙ КОСТРОМИН.