Ыджыд юбилей

Таво Емдiн районлы тырö 100 во. Татшöм вель ыджыд лоöмторсö Коми Республикаын пасйыны сöмын некымын район.

Тадзи артмис сы вöсна, мый 1922 воын ода-кора (май) тöлысьса мöдöд лунö ВЦИК РСФСР-са декретöн «Об административном делении Автономной области Коми» вöлi лöсьöдöма нёль ыджыд уезд: Емдiн (Усть-Вымский), Кулöмдiн (Усть-Куломский), Сыктывдiн (Усть-Сысольский) да Ижмо-Печорскöй.

Емдiн мулöн историяыс пырöдчö бöрланьö сюрс воысь унджык вылö, но сё во пасъям районлы, кыдзи административно-территориальнöй юкöнлы.

Кыдзи и быд юбилей пасйöм дырйи, 2022 во вылö планируйтöма зэв уна удж: машина туйяс да тротуаръяс дзоньталöм, киссьöм керкаяс разьöм, «народнöй бюджет» проектъяс олöмö пöртöм, выль объектъяс лэптöм, а сiдз жö быдсяма да аслыспöлöс культурнöй, спортивнöй да образовательнöй мероприятиеяс.

Пасйыштам медтöдчана мероприятиеяс йылысь, кодъясöс кутасны дасьтыны культура учреждениеяс: районöн веськöдлысь кубок вылö велöдчысьяс костын конкурс «2021-2022 велöдчан вося медся лыддьысьысь класс»; краеведческöй лыддьысьöмъяс, кодъясöс нуöдöны районса музейлöн юкöнъясыс – «Мой край. История населенных пунктов Усть-Вымского района», «С гордостью о земляках».  Тайö лыддьысьöмъясыс зэв тöдчанаöсь, öд мукöд сиктъясыс да грездъясыс бырöмаöсь нин, а чужан мулысь историятö колö тöдны.

Оз позь вунöдны и йöз йылысь, кодъяс аслас уджöн бурмöдiсны да вöчисны шудаöн олöмсö. Емдiн му уна общественнöй да политическöй веськöдлысьлöн, мывкыда уджалысьяслöн да енбиа йöзлöн чужанiн, кодъясöс тöдöны оз сöмын Коми Республикаын, но и суйöр сайын. Тайö татшöм нималана йöз, кыдзи Питирим Сорокин, Зосима Панев, Дмитрий Батиев, Галина Лыткина, Адольф Туркин, Серафим Попов, Николай Щукин. 

2022 во Россияын лоö йöзлöн культурнöй наследие воöн. Емдiн районлы сё во тырöмлы да Россияса йöзлöн культурнöй наследие волы сиам коми йöзлöн традиционнöй культура «Емдiнса югöр» фестиваль, кодöс ми нуöдам 1985-öд восянь. Танi позяс кывны мыла коми сьыланкывъяс, петкöдлыны кужанлунтö киподтуя йöз мастер-классъясын, мастеръяс кутасны вузавны ас киöн вöчöмторъяс.

Мöвпалiм нуöдны проект «До100яние Усть-Вымского района», кытчö пырасны татшöм мероприятиеяс: муниципальнöй уджалысьяс костын фестиваль «Про100 звёзды», аддзана сьыланкывлысь районса фестиваль «Мы вы100яли эту Победу», районса йöктан фестиваль «И100ки творчества».

Öнi районнöй администрация лöсьöдö документъяс, медым пыртöдчыны республикаса юралысь грантö. Грантлöн сьöм вичмас кö миян районлы, мöдам нуöдны «Радлун» межрегиональнöй йöзкост творчествоса фестиваль.

ВЕРА ФОМИНА.