Рубрики
Му вылын олысьыс уна
27 января 2020
Атеистъяс мöвплöны, мый му вылын и космосын эм сöмын материальнöй мир, а став мукöдторйыс – мойдъяс. Но тадзи ö тайö?
.jpg)
«Бур лун, «Вперёд» газет лыддьысьысьяс! – гижö Аквад грездса олысь Иван Баженов. – Колян воö юркарын мойвиис аддзысьлыны öти тöдчана чиновниккöд. Дыркодь пукалiм кабинетас, казьтылiм челядьдырся Туискерöсса школаын велöдчöм да том олан кад. Сёрнитыштiм и сиктса öнiя да воддза олöм йылысь, казьтыштiм рöдвужöс. Сэсся вомъёртöй и шуис: «Дед меным коркö висьтыштлiс öти лоöмтор йылысь. Ме ичöт на вöлi, но висьталöмсö помнита бура. Зэв важöн тайö вöвлöма, сёр арын. Кык чой, дедлöн нывъясыс, думыштöмаöсь верöс сайö петны Попкерöсса (öнi Гажакерöс) кык вок сайö. Бура тöда – тайö кык вокыс тэныд мам кузяыд рöдняöн лоöны.
Кöлысьсö мöвпаласны вöчны Попкерöсын, öти лунö. Рöдвуж чукöрмас уна – öтарсянь и мöдарсянь. Сöмын абу локтöма вокъяслöн зэв матыс да дона воча вокыс Емдiнысь. Зэв ёна виччысьöмаöсь, но сiйö колана кад кежлас абу воöма и кöлысьсö завöдитасны сытöг.
Арнад пемдö водз и вот пемыдас Эжвалöн мöдар берегас югъёвтас ыджыд бипур, а сы дорын мыччысяс мортлöн мыгöр. Кык жöник-вок дыр мöвпавтöг чеччасны пызан сайысь – тайö пö муса вокным, колö сiйöс вуджöдны. Рöдняыс öлöдöма найöс таысь – ывла вылас пемыд, тöлыс кок йывсьыд пöрöдö, ю вылас веж гыяс.
Но весьшöрö. Кык вок пуксясны пыжö, мöдасны вуджны, но кор воасны ю шöрöдзыс, кöнi вöлi медгыа, пыжыс путкыльтчас. Кыкнан вокыс вöясны. Шог вылад абу и сюрлöмаöсь, кöть вöйöмаясöс корсясны йи сувттöдзыс.
А мöд луннас, кор бушковыс лöняс, кодъяскö гöстьясысь вуджасны Эжвалöн веськыд берегас – гашкö пö вокъяслöн воча вокыс век на сэн. Но берегсьыс некодöс абу аддзöмаöсь, и бипур местаыс абу шедöма. Бöрнас нин воча вокыс чуймöмöн висьталöма, мый лёк поводдя вöсна керкасьыс абу петалöма, кöть и окота вöлöм вокъяслöн кöлысь вылö ветлыны».
Кысь нö бипурыс да мортлöн мыгöрыс ю берегас? Кöлысь вылын гажöдчысьясысь унаöн тайöс аддзылiсны. Гашкö ачыс Ортыс волiс том йöзöс мöдар югыдас нуöдны? Но мыйла найöс, кодъяс сöмын на босьтчисны лöсьöны ассьыныс олöмнысö? И нывъяс, кодъяс, гашкö, тырвыйö весиг эз на лоны гöтыръясöн, колисны дöваясöн.
Тайö висьтсö кывзöм бöрын веж нилöмваö шыбитiс. Дыркодь чöв олiм, мöвпалiм, мый гöгöрвотöмыс миян мирын зэв на уна».
Редакциясянь: Збыльысь, унакöд олöмас овлывлöны гöгöрвотöмторъяс. Кодкö татшöмтор вылас öвтыштö кинас, кодкö казьтылö Енмöс или мöдарö – сюраöс. Но унаöн кöнкö пыдын, пытшкöсас, гöгöрвоöны, мый му вылын миысь кындзи эм и мöдпöлöс олöм, а гашкö и олöмъяс. Та йылысь вермисны висьтавны коми муын водзсö вöвлöм вына тунъяс, но христианство найöс бырöдiс, колана тöдöмлунъяс вошисны.
Учёнöйяс, кодъяс öнi туялöны му вылын гöгöрвотöмторъяс, мöвпалöны, мый ми гöгöр эм некымын энергетическöй сфера, кöнi эм аслыспöлöс олöм, кодi мукöддырйи öтлаасьлывлö миян олöмкöд. И сэки ми гöгöр артмывлöны чуймана торьяс – и лёк, и бур.
Комментарии (0)
Оставить комментарий
