Архив новостей
понвтрсрдчетпятсубвск
    123
45678910
11121314151617
18192021222324
25262728293031
       

Главная Кроме того Медводдза лымлöн козин

Медводдза лымлöн козин

26 ноября 2020

Олöма йöз висьтавлывлöны – дона гобыд пö и лым улысь шедлывлö. Эскыны сьöкыд, но, вöлöмкö, овлывлö.

Тöдлытöг лэбис дженьыдик войвыв гожöм. Таво сiйö вöлi шоныд и сетiс верстьö йöзлы да зонпоснилы пöттöдз шонтысьны, гожъявны да купайтчыны. Вель бура быдмисны градвыв пуктасъяс, вöр козьналiс тшак-вотöс.

Но войвыв гожöмыд, быттьö пышкайлöн ныр, дженьыд – эг и казявлöй, кыдзи воис кöч (сентябр) тöлысь. Лун-войыд грездад öдйö кольö: удж вылö ветлан, керка гöгöрыд гаровтчан, картупель кодйыштан, вöрö ли ва дорö ветлан – луныд и кольöма. Тадзи тöлысьыс и катовтчис мöдар юкöнланьыс, воис суббöта, кöч 19 лун.
Садьми водз асывнас, видзöдлi ывлаö – лым сапкö-усьö гырысь чиръясöн. Юрö воисны школа кадся кывбурлöн кывъяс: «… ывлаыс вежсьöма, шемöсöн тырöма … бобувöн, дзодзöгöн, кöчöн енэжсянь кодiкö кöдзö … Столб вылö пуксьöма кöч – жуйвидзö, нинöм он вöч…»

А лым пыр усис и усис. Вевттис сэтöр, сьöд пелысь, жов да градвыв пуктас – капуста да морков, кодъяс неыджыд кынталöмъясысь да медводдза лымсьыд оз повны. Енэжтi рытыв-лунвывлань лэбисны неыджыд дзодзöг котыръяс – тыдалö Войвыв саридз дорса тундраад гöрд сапöга лапаясыс пондiсны кынмыны. Ывлаас вöлi шоныд, но лунтырöн лымйыс сiдз эз и сыв.

Шойччан лунö садьми водз, вöлi рöмыд на. Войбыднас лымйыс сылыштöма – еджыд эшкын увсьыс град вылын тыдовтчисны сьöд чутъяс. Чай юыштöм бöрын думыштi ветлыны вöрö, Креста туй сайö. Прöстö сiдз, пальöдчыштны да лолыштны вöрса сынöднас. Гаражысь машина петкöдiг, син улö уси кöрзина. Шыбитi пуклöс вылö, гашкö мыйкö и шедас…

Недыр мысти машина, гöгыльяснас лым сора ва резiг, тöвзис Креста туйлань, кодi нюжалöма От «гöрасянь» Нюмлöд, Сöпью да Кочмöс юяс вомöн Зöвсьöт посёлоклань, матö 60 километр. Сувтöдi машинаöс тöдса местаö, восьтi öдзöс, кывзысьыштi. Гöгöр чöв-лöнь, шыч ни рач. Сöмын неылын кылö нюр вылысь петысь шорлöн сёльгöмыс. Лымъявтöдз, лунöн водзджык, сутки чöж сявгис-зэрис, вöр кыскалан туй дор канаваяс тырöмаöсь ваöн, быттьö тулысын.

Восьлала Тикöн канавалань, апала-лолала ныр-вомöн вöрса сöстöм сынöд, пöтны ог вермы. Канаваыс километра куим сайын. Мыйла Тикöн канава? Кывлi, мый Вöркутаса политзаключённöйяс пöвстысь Тикöн Степановичöс мöдöдлöмаöсь миян местаясö, а гашкö и ачыс кольччылöма. Водзсö вöлöм тöлка, но лагерад юр вежöрыс кежыштöма. Ыджыд тушаа, сьöд юрсиа, ар 30-35-а ён мужичöй. Татшöм канаватö öти мортыд, дерт, кодйыны эз вермы, техникаöн писькöдöмаöсь, медым тулыс-арнас нюр вылысь петысь шоръяссö туй вомöн öтилатi веськöдны. Канава вомöн вöчлöмаöсь пос. Öнi поссьыс кольöмаöсь сöмын «ордлыясыс» – канава бокас куйлöны кер помъяс, а туй вомöныс визувтö шор. Вöр петкöдан техника лойöма туйсö, колеяыс коскöдзыд лоö.

Кер кузя кос бедь отсöгöн вуджи шор мöдарö. Муна водзö. Туй бокас лымйыс этша нин кольöма, но вöр пытшкöсас, торъя нин нитшка местаясын, ёнасö абу и сылöма. Муна ньöжйöник, кывзыся вöрлöн шыясö. Чöв-лöнь… Быттьö тöрытъя лымъялöм бöрын став вöрса олысьыс шöйöвошöма-падмöма. Но вот том козъяинысь жбыркнитiс сьöла, кутшöмкö посни лэбачьяс чипсасьöмöн чеччалöны коз пу лапъяс вылын, корсьöны дзебсьöм гагъясöс. Мыччысис ыджыд кодзувкоткар, кодöс арнас нин пасьвартлöма ош.

Со и медводдза тшак. Туй бокас тыдалö гоблöн коричневöй юрыс. Крепыд, зумыда сулалö яя кок вылас, вундiгас пурт улас дзуртыштлö, сэтшöм топыд. Некымын воськов вöчöм бöрын веськалiс кöч гоб – васöд, кöть пыдзрав, но абу сiсь, косьтыны туяс. Туйсянь неылын пуяс костын лымъя нитш вылын тыдовтчис гöрд бугыль – гöрд гоб! Кузь кок вылын, сiйöн и мыччысьöма лым пытшкöссьыс. Тадз ньöжйöник и чукöрмис тшакыс кöрзинаö. Эски масленник шедöм вылö, но местасö, кытчö сiйö ёна петлывлö, тулыснас на ставсö бергöдлöма ош аслас гыжъя лапаяснас.

Пуксьыштлi катовтчöм пипу вылö. Видзöдлi гöгöр, думыштчи… Кымын во чöж сулалö миян парма, вердö-юкталö коми войтырöс. Со тайö туй кузяыс водзсö тöвбыд журъялiсны «ЗиС», сэсся «МаЗ» машинаяс, вына пельпомъяс вылас петкöдiсны уна сюрс кубометр хлыст. Помнита, прицепъясас гöгыльяс местаö вöлi кöлалöма пожöм-коз пуясысь вöчöм лыжияс, резина гöгыльяс тырмытöм вöсна. Вылыс складын, Туискерöсса РММ-ын пуис быдлунъя удж: сэнi хлыстъяс вундалiсны керъяс вылö, чукöртiсны пуръяс, кодъясöс кылöдiсны Эжва кузя Лесобазалöн склад бердö. «Коквицкöй» совхозын вöлi нёль юкöн, быд отделениеын вöлiны скöт видзан фермаяс, а тшöтш и пилорамаяс. Став сикт-грездса олысь уджалiсны, школаын велöдчис куимсё сайö морт. Онi олöмыс лоис дзик мöд пöлöс.

Машиналань бöрсö локтi важ туйöд. Тырмас, мый Енмыс сетыштiс. Бара бедь отсöгöн вуджи Тикöн канава шор вомöн. Аттьö тэныд, коми парма, мый уна нэм чöж вердан-юкталан да шонтан коми мортöс!

ВАСИЛИЙ КОСТРОМИН.
 

Комментарии (0)


Противодействие коррупции



Фотогалерея
Версия для слабовидящих