Главная Кроме того Сила маминого колобка

Сила маминого колобка

5 июня 2017
Öдйö кольöны бöрö вояс. Быттьö неважöн на челядь котыркöд исласим шойччан лунъясö да арся каникулъяс дырйи лызьяс вылын джуджыд кыръяс йывсянь, коньки вылын журкъялiм кынмöм ты веркöсъяс кузя, ворслiм хоккейысь чукля бедьясысь вöчöм клюшкаясöн… Мукöд дырйи лунтыр он вöлi пыравлы гортад. Да и оз кыскы сэтчö – телевизорыд вöлi гежöд керкаын, планшетъяс, мобильникъяс да компьютеръяс эз ылöдлыны челядьöс. Ворслывлiсны найö ывла вылын, быдмисны пелькöн да тэрыбöн.
 
Сiйö кадö унаöн гырысьджык зонъяс пöвстысь вöзитчисны пищальясöн, кыйисны ур, сьöла-тар, утка. Дрöб-пороктö позьö вöлi тшупöдтöг ньöбны сельпоысь, сiдз жö и пищальтö. Эз ковлы лицензия, кыйсьöм вылö кабала. Ур куястö вöлi босьтöны сельпоса заготконтораын öти шайтысь кымын и кыйсьысьяслы тайö вöлi кивыв.

Ветлывлiм вöрö кыйсьыны и ми воккöд, кöкъямысöд-сизимöд класса велöдчысьяс. Öти арсёв лунö мöдöдчим навöлöкса вöрö. Луныс вöлi кос, шондiа. Пуяс вылысь коръяс важöн нин гылалiсны, кöдзыд дорiс тыяслысь ва веркöссö крепыд йи коркаöн. Купайка зептö сюйим нянь шöрöм гоз, некымын пöдушечка кампет, пельпом сайö шыбитiм батьлысь кык ствола «тулка», 16-öд калибра, и ризöдiм навöлöкса вöрö.
 
Миян керка сулалiс Туискерöс затонса РММ гаражъяс весьтын, пекарня дорын. Навöлöкса вöрöдз эз и вöв ылын. Вис джуджыдiн вуджöм бöрын весьтасас минут дас вит лоö Тупи ягöдз, а сэсянь лоöны веретя мышъяс да тыяс: Кос сер, Жаллян ты, Тупи ты, Сёркниа вад… Öнiя кадö тайö тыясыс ляпкалiсны да ичöтмисны, а водзсö вöлiны паськыдöсь да кузьöсь. Тыяс бокса кыдзьяс вылын пукавлывлiсны таръяс. На вылö и ылалiм. Кыдзи сöмын эг видлöй сибöдчыны – вöр пуяс костöд, пöшти кок чуньяс вылын… Пу лапъяс пöвсттi кыйкнитлан – быттьöкö ылынджыкöсь на, оз босьт пищальыд. Тiпкысь сьöлöмöн водзö сибöдчан, кылан, кыдзи мöдас котсыны стöрöжыс, кодi векджык пукалö неуна бокынджык джуджыд пу вылын, и всё, клоп-клоп швачнитасны борд шыяс и бара тар чукöр сюв-сяв лэбис ныр увсьыд.
 
И оз ылö лэбны, а пуксясны орчча веретя вывса кыдз пуяс вылö, нетшкöны-кокалöны гарсö. Да унаöн, штук кызьöдз, а то и гырысьджык котыръяс овлöны. Бара мудер руч моз дзебсясян-сибöдчан на дiнö, и бара весьшöрö. Мукöд дырйи и лыян, быттьöкö матын нин, а пöткаыс оз усь… Тадзи тар чукöр бöрся вöтлысьыгöн эг и казявлöй, кыдзи восьöма Емдiн сикт весьтö: кöрт туй поскыс мыччысис пöшти орччöн Эжва ю сайын. Гортсянь мунсьöма матö километра дас.
 
Таръяслы мый, бордтö шевгöд да лэбышт, а миянлы лунтыр пышъялöм бöртиыд дыр ковмас кыссьыны гортланьыд. Зептад пуктылöм сёянторйыд важöн нин быри, мунiгмоз вомö шыбитлывлiм лежнöг йывъяс, да туй бокысь кын юмов-шома намыр тусьяс. Недыр мысти кынöмъясын пондiс гургыны, мöдiс вугрöдлыны. Лигыш кокъяс вылын, быттьöкö код юраöсь, воим Тупи яг помö. Ичöтджык вокö дзикöдз мудзис, а сёйтöгыд кокъясыд эз мöдны восьлавны. Пуксис туй бокса пожöм улö и шуис: «Ог вермы сэсся мунны». А грездыс нин тыдалö, километрöн джынйöн колис мунны. Мый вöчны? Чегъялыштi ньыв пу лапъяс, пуксьöдi вокöс на вылö, мед мусяньыс кöдзыдыс озджык босьт, а ачим люги-леги мöдöдчи гортлань. Кузьöн жö кажитчис коляс туйыд! Воськовтi порог вомöн да дубалöм вомъясöн сöмын и верми шуны: «Мамö, вай няньтор», и кульсьытöг шлёпкыси-пукси лабич вылö. А мамлöн пöжалöма шаньги-кöлöб, абу на удитöмаöсь кöдзавнысö, небыдöсь, чöскыд дукаöсь. Йöвкöд сорöн тшыг пон моз ньылыштi кöлöб джын. Уна-ö колö том мортыдлы? Сёйыштöм бöрын пыр и ловзи. Сумкаö мамö пуктiс кöлöб гоз, йöв бутылка и ме мöдöдчи вок дорö. Нуръясьыштöм бöрын ми дзоньвидзаöн воим гортö. Вот кутшöм вöлöма небыд кöлöбыдлöн выныд!
 
ВАСИЛИЙ КОСТРОМИН.
 

 

Комментарии (0)


Противодействие коррупции



Фотогалерея
Версия для слабовидящих