Найö видзöны дзоньвидзалун (ПАНСЬÖМ)

От «гöра» Емдiн районлöн мукöд кар-сикт-грездысь торйöдö паськыд Эжва ю. Медым воöдчыны райцентрса больницаö, колö вöчны ыджыд катш Сыктывдiн район пыр.

Вера Туисова, Наталья Козлова (пукалöны), Вера Политова, Татьяна Яранова, Дарья Осипова, Александра Нефедова (сулалöны – шуйга вывсянь веськыдвылö)

Та вöсна Кöжмудор сиктса врачебнöй амбулаторияын век эм йöз, кодъяс локтöмаöсь корны отсöг: кодлöнкö висьмöма горшыс, мöдлöн лыбöма давление, коймöдöс майшöдлö пиньыс…

СЫЫСЬ БУРДЖЫКЫС ЭТША

Шуда сiйö морт, кодi аслас олöмын эз тöдлы пинь висьöм. От «гöра» вылын дыр эз вöв пинь бурдöдысь врач и сикт-грездын олысь войтырлы ковмывлiс терпитны пинь висьöм или кыдзкö воöдчыны райцентрö, мый абу кокни. Тайö мытшöдсö лои венöма, кор Кöжмудор сиктö воис уджавны том специалист-стоматолог Татьяна Георгиевна.

Татьяна чужлiс Студенец посёлокын, сэнi жö помалiс 1994 воын шöр школа и мöвпалiс лоны начальнöй классъясын велöдысьöн – мöдöдлiс Коми пединститутö документъяс. Но велöдчыны эз артмы – ёна висьмис мамыс и ковмис босьтны академическöй öтпуск.

Ныв вöлi абу велалöма овны весьшöрö: мам бöрсяыс видзöдöмысь кындзи сiйö пырис уджавны санитаркаöн Студенецса ФАПÖ. Уджалiг костiыс Татьяналöн олöм вылö мöвпъясыс вежсисны. Сергей Николаевич Разманов, Емдiн сиктса пинь техник да врач ышöдiс нылöс бöрйыны пинь бурдöдысь врачлысь профессия. Ассьыс пай пуктiс и Емдiнса районнöй больницаöн сэкъя кадö веськöдлысь Надежда Сергеевна Павлова – велöдчöм бöрти пыр жö кöсйысис мöдöдны сiйöс Кöжмудор сиктö.

Пинь бурдöдысьясöс сiйö кадас велöдiсны коммерческ\й подув вылын. 1995 воын Татьяна пырис велöдчыны Сыктывкарса медицинскöй колледжö стоматолог вылö. Велöдчöм сетчис нывлы кокниа, да и вöлi мöвп лоны бур специалистöн. 1999 воын Татьяналы сетiсны диплом и сiйö локтiс уджавны Кöжмудорö, кöнi сiйöс виччысисны Енмöс моз.

От «гöра» вылын варов да тöлка специалист öдйö воис öти кывйö амбулаторияын уджалысьяскöд да сикт-грездын олысьяскöд. Татьяна Георгиевна петiс верöс сайö. Недыр мысти верöсыскöд – Анатолий Ярановкöд, ньöбисны керка, вöчисны сэнi ремонт, лэптiсны керка дорас колана хöзяйственнöй стрöйбаяс, лöсьöдiсны град, пуктiсны вотöс сетысь кустъяс, уна пöлöс дзоридз.

Татьяна Ярановалöн пи да кык ныв. Владислав пиыс ыджыд нин, олö карын, уджалö фабрика нетканных материалов вылын, гöтыра, быдтö нылöс. Ыджыдджык нылыс – Алина, велöдчö техникумын. Дзöляджыкыс – Ника, велöдчö öкмысöд классын.

Став гортгöгöр уджсö Татьяна Яранова вöчö нывъясыскöд (верöсыс кувсьылiс ДТП дырйи). Ёна отсасьö пиыс. Кöжмудор сиктысь позьö аддзывлыны туй вылысь кияснас кутчысьöмöн мунысь Татьяна Георгиевнаöс аслас нывъясыскöд.

Татьяна збой нывбаба: некымын во сайын сiйö велöдчис ДОСААФ курсъяс вылын веськöдлыны легкöвöй автомашинаöн да мотоциклöн. Öнi журъялö машина вылын, а коляскаа мотоциклöн нывъясыскöд ветлывлö вöрö тшак-вотöсла. Прöст кадö радейтö кысьыны, лыддьыны художественнöй литература.

Татьяна Георгиевна век выльмöдö ассьыс тöдöмлунъяс – велöдчöкурсъяс вылын, лыддьö научнöй литература. Уджалан стажыс сылöн – 26 во, 25-ыс на пиысь – стоматологияын. Уна бур кыв сылы да сылöн отсасьысь Александра Алексеевна Нефедовалы гижöма амбулаториялöн книга отзывовын. Бура уджалöмысь эм уна грамота да аттьöалана гижöд.

Татьяна Яранова – зэв бур специалист. Сiйö бурдöдö пиньяссö йöзлысь От «гöра» вылын да Емдiн сиктын. Частö сы дорö пинь бурдöдны волывлöны Айкатыла сиктысь да Сыктывдiн районысь.

«Кöжмудрын колö выльджык пинь бурдöдан установка, кодл\н эм дуль отсос, ва матöдан аппарат. Дерт жö колö рентген. А инструмент да пломбировочнöй материал тырмöмöн», – пасйыштiс сёрни помын Татьяна Яранова.

СТОМАТОЛОГЛÖН ОТСАСЬЫСЬ

Татьяна Ярановалы уна во отсасьö Александра Нефедова – сiйö стоматологическöй медсестра.
Александра чужис Пальтыдор грездын, уна челядя семьяын. Бать-мамыслöн вöлi нёль ныв да öти пи. Уджалiсны найö «Коквицкöй» совхозын: батьыс, Алексей Васильевич, трактористöн, мамыс, Елизавета Николаевна, веськöдлiс полеводческöй бригадаöн.

Школа помалöм бöрын Александра Нефедова сiдз жö, кыдзи и ыджыдджык чойыс, пырис велöдчыны Сыктывкарса медучилищеö. 1982 воын помалiс велöдчöм, сылы сетiсны медицинскöй сестралысь диплом. Уджавны мöдöдiсны Туискерöсса участковöй больницаö медсестраöн. 1993 воын сiйöс индiсны старшöй медсестраöн. Тайö должность вылас уджалiс 2002 воöдз, кытчöдз эз сиптыны больницасö.

Удж вылас Александра Алексеевна ветлöдлö то подöн, то велосипед вылын. Татьяна Георгиевнаöс гöгöрвоö кыв джынсянь. Олö бать-мам керкаас. Быдтiс Юля нима нылöс, кодi верöсыскöд да пиыскöд олöны Эжваын.

Колян нэмас коми сикт-грездын олысьяс видзлiсны уна гортса пемöс. Öнi сэтшöм войтырыс ёна чинiс, но Александра Алексеевналöн мамыс, Краснöй знамя ордена кавалер, век на видзö мöс да кук, оз вермы весьшöрö овны…

ВЕРА ТУИСОВА

Вера Константиновна чужлiс Пальтыдор грездын. Батьыс – Константин Иванович, Великöй Отечественнöй вöйнаса участник. Мамыс – Мария Дмитриевна, От грездса пекарняын уна во чöж пöжалiс чöскыд нянь. Семьяын быдмис куим челядь, Вера вöлi медичöтöн.

Кöкъямыс класс сiйö помалiс Кырув школаын, сэсся кык во велöдчис Туискерöсын, дас класс помалiс 1982 воын. Профессия бöрйыгöн примерöн лоис Манефа чойыс, кодi уджалiс Емдiн сиктса амбулаторияын медсестраöн. Тадзи ныв лоис Сыктывкарса медучилищеын студенткаöн.

Велöдчыны вöлi кокни и коми грездса ныв окотапырысь босьтiс тöдöмлунъяс, медым лоны бур специалистöн. Медучилищеын велöдчöм вояс öдйö лэбисны. Кор Вера Константиновналöн ки вылас лоис диплом, сiйö бöр воис чужан От «гöра» вылö, пырис уджавны Туискерöсса участковöй больницаö процедурнöй медсестраöн. Том специалист öдйö лоис коллективын ас мортöн, уджалiс сьöлöмсянь, кывзiс индöдъяс ыджыд опыта уджалысьяслысь. Сiйö и öнi уджалö аслас специальность кузяыс.

Вера Константиновна быдтiс кык нылöс – найö уджалöны и олöны Сыктывкарын, и Иван пиöс, кодi уджалö кöрт туй вылын машинистлöн отсасьысьöн. Гожöмнас прöст кадö ёна радейтö ноксьыны градвыв пуктасъяскöд. Верöсыскöд öнöдз видзöны мöс-кукань.

ВЕРА ПОЛИТОВА

Вера Анатольевна чужлiс Эжов грездын, кодi дзебсьöма вöр пöвстö. Вералöн батьыс уджавлiс полеводческöй бригадаын, бöрынджык – трактор вылын. Алефтина Федоровна мамыс водз кувсьылiс. Семьяын быдмисны куим зон да ныв.

Туискересса школа 1986 воын помалöм бöрын Вера кöсйис пырны велöдчыны торгово-экономическöй техникумö, но олöмыс бергöдчис мöдарö и ныв пырис уджавны Кöжмудор сиктса детсадйö. Сэнi уджалiс куим во, сы бöрын мырсис соцработникöн. Петалiс пенсия вылö, но олöмыс бара мöдöдiс удж вылö. Кор воссис Кöжмудорса врачебнöй амбулаторияын санитаркалöн вакансия, пырис уджавны сэтчö.

Вера Анатольевна Михаил версыскöд быдтiсны кык пиöс да нылöс. Нылыс уна челядя мам, уджалö школаын. Öти пиыс уджалö Архангельск карын рыбзавод вылын. Мöдыс, Яша, кодi помалiс школасö зарни медальöн, квайтöд во велöдчö врач-терапевт вылö Войвыв государственнöй медицинскöй университетын, Архангельскын.

Политов гозъя лэптiсны кыпыд керка, быдтöны градвыв пуктас, видз\ны кролик да курöг, радейтöны ветлывлыны вöрö тшак-вотöсла.

(ЛОÖ ВОДЗЫН)

ВАСИЛИЙ КОСТРОМИН.