Найö видзöны дзоньвидзалун (ЛЫДДЬÖЙ ПОМСÖ )

(ЛЫДДЬÖЙ ПОМСÖ)

От «гöра» Емдiн районлöн мукöд кар-сикт-грездысь торйöдö паськыд Эжва ю. Медым воöдчыны райцентрса больницаö, колö вöчны ыджыд катш Сыктывдiн район пыр.

ДАРЬЯ ОСИПОВА

Дарья Алексеевна чужлiс Сыктывдiн районса Придаш грездын 1994 воын – Кöжмудорса врачебн\й амбулаторияын уджалысьяс пöвстысь сiйö медтом. Челядь кадö велöдчис öкмыс класса школаын, 11-öд класс помалiс Зеленец сиктын. Бать-мамыскöд сёрнитöм бöрын мöвпыштiс пырны велöдчыны медколледжö лечебное дело юкöн вылö. Велöдчис нёль во, а сэсся пырис уджавны Лыаты грездса ФАПÖ.

«Лыаты грездса ФАПлöн стрöйбаыс зэв важ: тöвнас сэнi кöдзыд, вевт пырыс век виялö ва. Дзоньтавны тöлкыс абу. Колö лэптыны выль амбулатория», – висьтал Дарья Алексеевна.

Та вöсна сiйö уджалö Кöжмудорын, уджалö сьöлöмсяньыс, тэрыб отсöг машина вылын ветлывлö висьмöм войтыр дорö, пыр сьöлöмсянь отсалö налы кыдзи вермö. От «гöра» вылын уджалö квайт во, олö Лыаты грездын. Йöзыс сiйöс ошкöны. Бур бы вöлi, вужъясис кö Дарья Осипова От «гöра» вылö.

АМБУЛАТОРИЯÖН ВЕСЬКÖДЛЫСЬ

Сюлатуй грезд дорö матöстчыгöн туйлöн шуйгадор бокас зумыда сулалö выль керка, сы дорын мукöд стрöйба, качай. Тайö керкаас олöны Наталья Евгеньевна да Юрий Константинович Козловъяс. Гозъя тöдсаöсь школасянь, кöть и быдмисны разнöй грездъясын. Быдтiсны кык нылöс: найö верöссайынöсь, олöны Сыктывкарын.

Наталья Евгеньевна чужлiс Туискерес грездын. Батьыс уджавлiс ремонтно-механическöй мастерскöйын, мамыс – фермаын, мöс-кукань дорын. 1988 воын помалiс Туискересса шöр школа. Кытчö пырны велöдчыны водзö – некод эз ышты. Ныв мöвпыштiс и сетiс документъяссö Сыктывкарса медучилищеö.

Велöдчис сьöлöмсяньыс, кыдзи и школаын. Тöдлытöг бöрö колины кык во. Распределение кузя Наташаöс мöдöдiсны Детскöй республиканскöй больницаö. Сэнi уджалiс во, но сьöлöмыс кыскис чужанiнö. От «гöраса» участковöй больницаын местаыс эз вöв и нывлы ковмис во уджавны Туисересса детсадйын.

Больницаын индiсны уджавны врачлöн общей практика медсестраöн. Тайö удж вылас мырсис 2021 вося июнь тöлысьöдз. Июньсянь Наталья Евгеньевна уджалö фельдшерöн Кöжмудорса врачебнöй амбулаторияын (сiйö содтöд велöдчис фельдшер вылö).

Öнi сылöн пельпомъяс вылас тöдчана удж веськöдлыны став коллективнас, кöнi сыысь кындзи уджалöны нёль специалист, санитарка да кык водитель.

«Кöть От «гöра» вылын олысь йöзыс абу уна, быдторйыс овлывлö. Гожöмъяснас йöз лыдыс ёна содö, дерт содö и миян удж. Но ми ог майшасьöй. Öнi миян выль машинаяс – некымын во сайын вежисны, водительяс ыджыд стажаöсь, быдтор сяммöны. Врачебнöй амбулаторияын дзоньталiсны вевт, ва эм орччöн, коллектив опытнöй. Вежоннас öтпыр ми дорö волывлö нуöдны приём врач-терапевт Татьяна Булышева», – висьталiс меным Наталья Евгеньевна.

Ми сёрни костi звöнитiс нывбаба, корис отсöг. Наталья Козлова юасис, мый лоис, кöсйис мöдöдны машина фельдшер Дарья Осиповакöд отсöг вылö пыр жö, кор сiйö воас Кырс грездысь.

«…Вечный подвиг – он вам по плечу.

Ваши руки надёжны и святы.

Низко вам поклониться хочу –

Люди в белых халатах…»

Тайö кывъясыс сьыланкывйысь, кодöс ме некымынысь кывлi радио пыр. И тайö кывъяснас ме кöсъя помавни висьт От «гöра» вылын еджыд халата уджалысьяс йылысь.

ВАСИЛИЙ КОСТРОМИН.