Ыджыд виччысьöмъяслöн кад (ПАНСЬÖМ)

1991-öд воын, январь 11-13 лунъясö, Сыктывкарын мунiс коми войтырлöн медводдза съезд.

Емдiн районса I коми съездса делегатъяс

КОМИ МУ САДЬМÖ

Районъясысь да каръясысь съезд вылö локтiсны 441 делегат. Первой луннас кызвын делегатыс сёрнитiсны сы йылысь, мый найöс майшöдлö öнiя олöмас.

Видз-му да сикт-грезд киссьöм: воысь-во отсöг государствосянь чинö, выль техника да оборудование совхозъясö оз во, том войтыр мунöны каръясö корсьны бурджык олöм. Тайöс колö сувтöдны, вöд сикт-грездын коми войтырлöн вужъясыс, сэнi сёрнитöны коми кыв вылын, олöны коми йöзлöн культура да традицияяс.

Коми муын, кыдзи и 1930-öд воясö, зэв уна йöзöс дзескöданiн. Мукöд районас сэтшöм учреждениеыс нёль-витöдз, мыжа йöзöс сэтчö вайöдöны став страна пасьталаысь. Пукалысь йöзыс дзескыдiнысь петöм бöрын унаöн кольччöны Комиö, вöчöны выль преступлениеяс. Тайö системасö колö вежны.

Вöр-ва видзöм. Бöръя 30-40 вонас Коми пармаысь лоис пöрöдöма да петкöдöма уна миллион кубометр вöр. Пöрöдöм коз да пожöм местаö öнi кызвыннас лыбис да быдмö коръя вöр. Та вöсна юяслöн вежсис гидрологическöй режим и найö гожöмъяснас пондiны зэв ёна ямны, чинöны чери запасъяс, торкассьö судоходство.

Странаын завöдитчис унджык войтырлы гöгöрвотöм приватизация. Государственнöй эмбур донтöм донысь вуджö писькöс йöз да криминал киясö. Зэв öдйö содöны донъяс, сьöм донтöммö. Мый Сöветскöй Союзын йöзыс чукöртiсны уна во – вошö.

Делегатъяс уна сёрнитiсны сы йылысь, мый оз позь сетны торъя йöзлы киас национальнöй озырлун – из шом, биа ару, му сир, вöр экономика юкöнъяс, гырысь предприятиеяс. Сiдз жö лыблiс сёрни сы йылысь, мый колö нуöдны референдум Коми-Пермяцкöй да Ненецкöй национальнöй округъясын, медым öтлаöдны куим регион, кöнi олöны коми йöз. Тайö вермис бы ёна отсавны паськöдны регионлысь экономическöй асшöрлун да öдйöджык петны кризисысь.
Коми кыв да культура. 1970-öд воясö Коми АССРын школаясын пондiсны чинтыны коми кыв велöдöм, торйöдны коми челядьöс коми да роч классъяс кузя, ёна чинтiсны коми национальнöй школаяслысь лыдсö. Коми кыв пондiс вошны сёрниысь. Сiйöс тöдысь войтырлöн лыдыс воысь во чинö, национальнöй культура жебмö.

Емдiн районсянь трибуна вывсянь сёрнитiс Айкатыла школаса история велöдысь Валентина Ильинична Сбоева. Сiйö вöзйис пыртны школьнöй велöдан программаö юöр сы йылысь, кытысь да кор артмисны коми йöз, кидзи олiсны, мыйла коми топонимъяс эмöсь Онега юсянь Уралöдз, Войвыв саридзсянь Удмуртияöдз, а коми йöзыс унджык территория вылас абу, Гулаг йылысь.

МЫЙ ВÖЧСИС СТРАНАЫН

Медводдза коми съезд мунан лунъясö СССРö пырысь республикаясын эв вöв лöнь. Закавказьеын ёнмис зык Карабах гöгöр, Шöр Азияын лыбис шум сэнi олысь народъяс костын. Январь 11-öд лунö Литвалöн столицаö, Вильнюс карö, пырисны Сöветскöй армиялöн юкöнъяс, босьтiсны Печать керка, телевизионнöй шöрин, мукöд объектъяс. Январь 13-öд лунö армия штурмöн босьтiс Вильнюсын телебашня. Штурм дырйи пöгибнитiс 15 морт, некымын дас морт доймалiсны.

СЪЕЗДЛÖН РЕШЕНИЕЯС

Аслас медбöръя уджалан луннас съезд вынсьöдiс некымын резолюция. Казьтыштам налысь медтöдча юкöнъяссö. «Коми ССРлöн каналан суверенитет» резолюцияын вöлi пасйöма, мый республикаын колö вöчны кык юкöна парламент – öтикас пондасны уджавны районъясысь да каръясысь бöрйöм депутатъяс, мöдас – коми войтырсянь, кодъяслöн лыдыс республикаын сöмын 23%.

«Коми ССРлöн социально-экономическöй сöвмöм» резолюцияын съезд тöдчöдiс, мый став му пытшкöсса да вöр-валысь ресурссö колö кольны республикалы. Коми мулы оз позь водзö кольны федеральнöй шöринлöн сырьевöй юкöнöн. Съезд пасйис, мый регионын колö сöвмöдны промышленность да видз-му овмöс, матöдны сикт-грездъясын олöмсö каръясын олöм дорöдз.

«Национальнöй политика кыв да культура юкöнын» резолюцияын вöлi пасйöма коми национальнöй школа выльысь кыпöдöм йылысь. Делегатъяс корисны лэдзны унджык газет-журнал коми кыв вылын, вöчны документальнöй да художественнöй фильмъяс коми кыв вылын, восьтны национальнöй шыла-драма театр.
Съезд, ассьыс уджсö помалiгöн сiдз жö пасйис, мый медшöр могыс, кодöс лоис пуктöма «Коми войтыр ловзьöдан» комитет водзын – тайö öтувтны республикаын став олысь народъяслысь вынъяссö мытшöдъяс венöмö, видзны мир да öтсöглас олöм.

ЛОÖ ВОДЗЫН