Рубрики
Архив новостей
Вöйна дырся письмöяс
27 января 2021
1941 вося августын Висдiн сиктысь Гöрд Армияö мобилизуйтiсны Владимир Николаевич Борисовöс. Чужан му вылысь мунöм бöрын сiйö гижис гортас 12 письмö, нёльсö чужан кыв вылас, мукöдсö рочöн.
Таво тырö 76 во Победа лунсянь и 80 во письмöясыслы, кодъясöс гижис Владимир Николаевич и кодъясöс видзöны и öнi сылöн внукъясыс.
Кор кутан киясад вижöдöм кабала листъяс, сьöлöмыд öдйöдчö и сöдзтысьö синва. А кыдзи найöс виччысисны гортсаяс – гöтырыс да пиыс, рöдвуж чукöрыс! Письмö воöм бöрын, дерт, быдöн радлiсны – ловъя! И письмö лыддьöм бöрын мöвпалiсны, кыдзи сэнi – фронт вылын, мыйöн вердöны салдатъясöс, кöнi узьöны-шойччöны, кутшöм тышъяс мунöны вöрöгкöд.
Вöйна кадö и тылын вöлi зэв сьöкыд. Медым фронт вылын тырмöмöн вöлiны оружие да боеприпасъяс, паськöм, сёян-юан, сикт-грездъясын кольöм нывбабаяслы ковмывлiс уджавны быд лун 12-14 часöн. Сiдз жö уджалiсны и олöма йöз, шедлывлiс мырсьöмыс и челядьлы.
Письмöясын став тор йылысь некор эз гижлыны – цензура татшöм гижöдъястö вöлi оз лэдз, да и асьныс йöзыс – мый фронт вылын, мый тылын, гöгöрвоисны – вывтi лёктор йылысь гижны оз позь.
Мöвпавлiс ö саладат окопын аслас чужан сикт, керка, матысса йöз йылысь? Дерт жö мöвпавлiс! Кутшöм мелiа и радейтöмöн сiйö шыöдчö письмöясас аслас гöтыр Елена Семеновна да Алексей пи дорас, казьтылö коми му да коми кыв йылысь, ыстö чолöм рöдвужыслы.
Кор лыддян Владимир Борисовлысь гижöдъяссö, быттьö видзöдан вöйна йылысь кино: со гортсаяс колльöдöны пиянсö, верöсъяссö, батьяссö; то армияö босьтöм мужичöйяс кывтöны ю кузя пароход вылын; а то нин сулалöны салдатскöй формаын стройын...
Медводдза письмöсö гортсаяслы Борисов гижис Котласын: «1941 вося август 21 лун. Оланныд выланныд супруга Елена Семеновна, единственнöй, öтка менам муса пиöй Алёша дай Владимировичöй.
Тайö письмöсö гижа ме тiянлы Котлассянь. Кöсъя юöртны ас мунöм йылысь. Воим Котласö август 21 лунö кöкъямыс час асылын. Талун лоö öтправка водзö, Вöлöгдаö. Пока ставöн öтлаын, мунам бура. Но жаль сiйö, мый ва дорысь тiянöс эг аддзыв. Висдiнса Кырув дортi кывтiгöн казялi, кутшöмкö детинка ёна кинас öвтчис, из кö вöв Лёш. Бöрын ёна видзöдi и öвтчи вочча, кытчöдз сiйö тыдалiс. Навернö вöлi сiйö. Айкина пристаньö эз удайтчы сувтлыны.
Но сэсся олöй бура, зэв ёна ин шогсьöй, ин бöрдöй. Воа местаö, бара пыр гижа. Висьталö Öльöшсянь привет Павлаыслы, сылöн челядьлы, гижам öтлаын. Сiдз жö передайтöй привет тьöщалы, Саш гозъялы и став рöдвужлы. Коля пока жив и здоров, мунам водзö.
Супруга и муса пиöй вунлывлытöмöй менам, ин шогсьöй, ин бöрдöй, кад воас воам бöр и пондам овны важ моз.
Пока коли тiян бать и муж Володя».
Август 24 лунö пароход призывникъяскöд воис Вöлöгдаö, кöнi Комиысь воысь мужичöйяслы сетiсны салдатскöй обмундирование. Гражданскöй паськöмсö Владимир Николаевич мöдöдiс гортас пöсылкаöн. Висдiн сиктысь сыкöд öтлаын Вöлöгдаöдз мунiсны, кыдзи гижлiс гортсаяслы Борисов, «Вукöл Саш да Некрасов Миш».
Сентябрьса письмöын Борисов пасйö, мый найöс нуöдöны фронт вылö. Гортсаяслысь корö видзны дзоньвидзалун, казьтылö, мый тöв кежлö гожöмын дасьтöм сёян запас тырмас, гöтырсö корö бура видзöдны мöс бöрсяыс, пиыслы тшöктö бура велöдчыны и кывзысьны мамсö.
Ноябрьын гижö: «…Пукалам вöрын, окопъясын. Сэнi кöдзыд, ва. Шоныдiнын эг вöлöй нин быдса тöлысь. Шонтысям бипуръяс дорын. Виччысям передöвöй вылö мöдöдöм…».
Ноябрь помын Борисовöс ёртъясыскöд вуджöдiсны передöвöй вылö дорйыны Тула кар. Январь 17 лунö Владимир Николаевич усьö чорыд тышын. Извещение, кодöс йöз костын вöлi шуöны похоронкаöн, гöтырыслы воис 1942 вося март 16 лунö. Дзебöма коми салдатöс öтувъя гуö Тульскöй областьса Тепло-Огаревскöй районын.
Борисовлöн гöтырыс Елена Семёновна öтнас быдтiс Алексей писö. Вöлi сiйö дзöля да кос тушаа, но мырсис век кык морт местаö, дыр видзис мöс. Вöйна помассьöм бöрас совхоз лэптiс сылы выль керка, кыдз дöвалы (важ керкаыс сэки помöдз нин киссис). Выль керкаас вöлiны гырысь öшиньяс, куим жыр, вевтсö кышöма кöртöн. Керка бöрсяыс и öнi видзöдöны Владимир да Елена Борисовъяслöн внукыс да внучкаыс.
Ноярь тöлысьын Владимир Борисов гижис, мый аддзылiс Иван Иванович Турьевöс, Гам сиктса олысьöс, кодi корiс висьтавны сысянь чолöм Ольга гöтырыслы.
Иван Турьев – менам дед. Сiйö мунiс став вöйна пырыс, воис Австрияöдз. Демобилизуйтчис 1946 воын. Став нэмсö уджалiс конюхöн да кузнецöн.
ТАТЬЯНА МАЛАФЕЕВА.
Комментарии (0)
Оставить комментарий
