Вöеннöй кинохроника

Век радейта видзöдны Великöй Отечественнöй вöйна дырся кинохроника – сюся кыйöда и мöвпала аддзыны сэтысь тöдса чужöмъяс.

Гöрд армиялöн парад Брандербургскöй ворота дорын, май тöлысь

Öтпыр, а вöлi тайö кöнкö комын во сайын, телевизор кузя петкöдлiсны, кыдзи Гöрд армия 1945-öд вося май медводдза лунъясö штурмуйтiс Берлин. Чорыд тыш мунiс Рейхстагсянь неылын, Брандербургскöй ворота дорын. Фронтöвöй кинооператор снимайтiс, кыдзи салдатъяс мунöны атакаö. Киноаппарат объективö шедiс том салдат – киас автомат, мыйкö горзö. Друг сiйö бергöдчис чужöмнас кинооператорлань. Меным кажитчис, мый салдатлöн мыгöрыс тöдса. Сюсьджыка видзöдлi морт вылас – да тайö жö Студенец посёлокса олысь Алексей Иванович Козлов!

Пасьтаси да пыр пышйи сы дорö. Сiйö кадас Алексей Иванович вöлi пенсия вылын нин и суи сiйöс гортас. Пыр юалi: – Аддзылiн, телевизор кузя петкöдлiсны, кыдзи босьтiнныд Брандербургскöй ворота!

– Вöлi татшöмыс, – вочавидзис Алексей Иванович, – ёртъяскöд босьтiм Берлин. Аддзылi ачымöс, да и Галина ныв пыр менö тöдмалiс.

– Мый нö сэтшöм öдйö бöр бергöдчин, эн дырджык видзöд оператор вылас? – нуöдi сёрнисö водзö.

– Некор сы вылö вöлi видзöднысö, – шуис ветеран. – Сылöн аслас удж – снимайтны вöйна, медым сiйöс вермисны аддзыны локтан поколениеяс, а миян – öдйöджык помавны фашизмкöд, босьтны Берлин, кусöдны вöйнылысь биа тыш. Сiйö бой бöртиыс регыд менö ранитiсны сьылiö – петкöдлiс доймöм местасö. Шрамыс нэм помöдз колис, но коли ловйöн. Берин штурмуйтöмысь козьналiсны медаль – «За взятие Берлина».

А мöдысь аддзи, кыдзи Гöрд армиялöн юкöн пырö кытшöмкö карö: карса олысьяс сулалöны тротуаръяс вылын да шыблалöны салдатъяслы кокъяс улас дзоридзъяс. Водзас мунö салдат и кутö киас Гöрд знамя: зумыда восьлалö, крепыда кутö знамялысь древкосö и неуна нюмъялö. И чужöмыс бара кажитчис тöдса. Вöлöмкö, тайö Зимино грездса олысь Нафанаил Давыдович Зиновьев. Нафанаил Давыдович вöйна бöрас воис гортас старшина званиеын, морöс тырыс медаль и кык орден Славы. 

ВИКТОР КРУГЛИКОВ.