Уджвизь нёль во кежлö (ЛЫДДЬÖЙ ПОМСÖ)

ЛЫДДЬÖЙ ПОМСÖ

МИНИСТЕРСТВОЯСЛЫ ТШÖКТÖМЪЯС

Зэв уна вöзйöм съездсянь лоис республикаса правительстволöн министерствояслы. Экономика сöвмöдан, промышленность да транспорт министерстволы: пыртны коми кыв предприятиеяс да организацияяслöн быдлунъя уджö; восьтны муниципалитетъясын вузасян павильонъяс «Фермеры Коми» бренд улын; сетны отсöг предприятиеяслы, кодъяс уджалöны вöр промышленностьлöн колясяскöд; лэптыны Комиын завод, код вылын позяс перерабатывайтны тшак-вотöс.

Национальнöй политика министерстволы: дасьтыны региональнöй программа «Сохранение и развитие государственных языков РК» на 2025-2030 годы; содтыны финансöвöй отсöг общественнöй инициативаяслы, кодъяс сöвмöдöны коми культура да кыв; республикаса праздник «Коми книга» дырйи джын кадсö сетны юргыны коми кывлы; чукöртны координационнöй сöвет öтувъя удж национальнöй праздникъяс – «Василей», «Коми книга», «Лямпиада» да мукöд мероприятиеяс нуöдiгöн; паськöдны «Шуда котыр» Сыктывкарса клублысь опыт став республика пасьтала.

Строительство да жилищно-коммунальнöй хöзяйство министерстволы: водзö нуöдны удж Национальнöй музыкально-драматическöй театр стрöйтöм кузя; Емдiн да Сыктывдiн районъясын нуöдны туй вочан уджъяс «Дзöля Слуда-Студенец» туй юкöн вылын да «Язель-Семуково» туй вылын.

Природнöй ресурсъяс да вöр-ва видзан министерстволы: паськöдны коммунальнöй ёг бöрйöм да выльпöв сiйöс уджö пыртöм; сетны отсöг посни предприятиеяслы, кодъяс бöрйöны да утилизируйтöны коммунальнöй ёг; сибалана кыйсян угодиеяс сетны арендаö охото-хозяйственнöй соглашениеяс кузя; содтыны охотинспекторъяслысь лыдсö; вöр пöрöдöм бöрти быд делянка вылын пуктыны пожöм да коз пу саженецъяс.

Видз-му овмöс да потребительскöй рынок министерстволы: содтыны субсидия кукъяс ньöбöм да йöв вылö; дасьтыны республиканскöй программа борщевиккöд тыш вылö; паськöдны отсöг личнöй подсобнöй хозяйствояслы; мынтыны öтпыръя субсидия том специалистъяслы, кодъяс локтöны уджавны видз-му овмöсö – рабочöйяслы 1 млн шайт, специалистъяслы 1,5 млн шайт; содтыны республикалысь пайсö виз-му овмöсын объектъяс стрöйтiгöн 90 процентöдз; паськöдны сельхозпотребкооперациялысь уджсö картупель да мукöд градвыв пуктас сиктса олысьяслысь ньöбöм кузя; лöсьöдны удж Москваын да мукöд уна лыда йöза Россияса регионъясын республикаысь видз-му овмöс продукция вузалöм.

Цифрöвöй развитие, связь да массöвöй коммуникация министерстволы: дасьтыны мобильнöй йитöд ылыс населённöй пунктъясын, тшöтш и Емдiн районса Яг грездын, Донаёль, Казлук да Чёрный Яр посёлокъясын; вичмöдны сьöм, медым велöдны кык кыв (коми да роч) вылын сёрнитысь журналистъясöс; быд во гижöдны коми кыв вылын петысь газет да журнал вылö став культура да образование учреждениеяс; телеканал «Юрган» вылын содтыны коми кыв вылын передачаяслысь кадсö 50 процентöдз; содтыны коми кыв вылын петысь газет-журналын уджалысь журналистъяслы удждон; бöр восьтны Коми книжнöй издательство.

Здравоохранение министерстволы: водзö лэптыны кар-районъясын модульнöй ФАПяс; нуöдны ремонт да реконструкция поликлиникаясын да больницаясын; стрöйтны керкаяс да квартираяс «Земский доктор» программа кузя; ньöбны медицинскöй оборудование (Емдiн районлы – компьютернöй томограф); бурджыка нуöдны диспансеризация; том специалистъясöс велöдчöм помалöм бöрын разöдны республика пасьтала.

Культура да архивнöй делö министерстволы: быд во нуöдны заказ-конкурс драматическöй да музыкальнöй уджъяс вылö республикалöн история, сэнi олысь войтыр, Коми мулöн легендаяс да мифъяс кузя; водзö вöчны коми сьыланкывъяслысь фонограммаяс, вöчны коми пьессаяслысь сборникъяс; вичмöдны сьöм коми кыв вылын документальнöй, художественнöй да мультипликационнöй фильмъяс вöчöм вылö; восьтны Национальнöй музыкально-драматическöй театр подув вылын аканьяслысь театр; культура отделъясöн да учреждениеясöн веськöдлысь должностьяс вылö индыгöн кутны тöд вылын мортлысь коми кыв тöдöм; «Алöй лента» небöг фестиваль вöчны финно-угорскöй гижысьяслысь фестивальöн; ыждöдны коми спектакльяслысь репертуар, петкöдлыны найöс телевизионнöй каналъяс вылын; отсавны уджын любительскöй театръяслы, нуöдны на пöвстын конкурсъяс.

КОЛÖ ТÖДНЫ КОМИ МУ

Образование да наука министерстволы: лöсьöдны Коми Республикаын став арлыда челядьöс этнокультурнöй велöдöм концепция; лöсьöдны «Краеведение» велöдан небöгъяс 2-4 классъяслы, «История и культура Коми края» 5-9 классъяслы; дасьтыны квалифицированнöй коми кыв велöдысьясöс; паськöдны образовательнöй учреждениеясын коми кыв вылын нуöдан удж; содтыны субвенцияяс школаяслы, кöнi велöдöны предмет «Родной коми язык»; вичмöдны сьöм детскöй сад да школаяс стрöйтöм вылö (Емдiн районын – Мадмас да Студенец посёлокъясын); отсавны образованиелöн районса да карса управлениеяслы восьтны школаясын классъяс коми кыв, кыдзи чужан кыв, велöдöмöн.

Физическöй культура да спорт министерстволы: дасьтыны подпрограмма «Физическая культура и спорт на селе»; пыртны лямпаяс вылын пышъялöм ордйысьöмъяс öтувъя календарнöй планö; водзö ёнмöдны материально-техническöй база спортивнöй учреждениеяслысь; видзöдлыны, позяс ö республикаын вöчны спортивнöй инвентарь; стрöйтны Айкатыла сиктын спортивнöй комплекс универсальнöй спортивнöй залöн; капитальнöя дзоньтавны Жешартын «Дом спорта», Микуньын «Центр спорта и туризма»; сетны муниципальнöй районъяслы ратракъяс, медым бурджыка дасьтыны лыжнöй трассаяс.

Молодёжнöй политика комитетлы: дасьтыны да нуöдны коми кыв вылын том йöзкöд мероприятиеяс; молодёжнöй центръясын информационнöй стендъяс, вывескаяс, реклама гижавны кык кыв вылын.

Туризм агентстволы туристическöй маршрутö пыртны Сыктывкарысь сувенирнöй магазин «Ордым».

Районса да карса администрацияяслы: паськöдны коми кыв вылын удж муниципальнöй учреждениеясын; дзöля архитектурнöй формаяс, выль стрöйбаяс лэптiгöн пыртны сэтчö национальнöй колорит; öдйöдны удж войтырöс лёкмöм оланiнысь выльö вуджöдöм; нюжöдны детсадъяслысь уджсö сизим час рытöдз.

Съездлöн резолюция подув вылын лöсьöдiс

АЛЕКСАНДР ЛЮТОЕВ.