Уджвизь нёль во кежлö (ПАНСЬÖМ)

Таво сора (июль) 4-6 лунъясö Сыктывкарын уджалiс XIII-öд коми съезд, код вылын вöлi вынсьöдöма резолюция, кытчö лои пыртöма могъяс да юалöмъяс, кодъяс вылын колö уджавны локтан нёль воö.

Съезд помассьöм бöрын: ми ставöн бура уджалiм

Съезд вылын делегатъяс пасйисны, мый найöс öнi медъёна майшöдлö: коми войтырлöн лыдыс öдйö чинöм – дас öти воöн, кык медбöръя йöз лыд арталöм коластын, коми войтырлöн лыдыс чинiс 37% вылö – 228 235 мортсянь 143 516 мортöдз. Эм мытшöдъяс образованиеын: коми кыв велöдöмын поколениеяс коластын абу вуджöм; абу бать-мамыслöн да велöдан учреждениеяслöн коми кыв велöдöмын мотивациялöн механизм; оз тырмыны коми кывъя специалистъяс, велöдчан небöгъяс, коми кыв вылын велöдчан да ворсан пособиеяс детсадъясын. Эм республикаын и уна мукöд мытшöд – та йылысь пасйöма съездлöн резолюцияын.

ИСПОЛКОМЛЫ ДА ПРЕДСТАВИТЕЛЬСТВОЯСЛЫ

МОД «Коми войтыр» исполком водзын пуктöма мог паськöдны удж том войтыркöд, дасьтыны кадрöвöй резерв на пöвстысь. 2025 воö районнöй да карса Сöветъясö, Госсöветö бöрйысьöм дырйи колö вöзйыны кандидатъясöс коми войтыр пöвстысь да отсавны налы бöрйысьыгöн. Сiдз жö колö пырöдчыны общественнöй самоуправлениеö, дасьтыны законодательнöй инициативаяс Коми Республикалöн Госсöветö.

Ыджыд удж колö нуöдны, медым лэптыны коми кывлысь престиж, паськöдны коми кыв велöдöм детскöй садъясын да школаясын (кыдзи чужан и государственнöй). Сiдз жö колö паськöдны öтувъя удж МОД «Коми войтыр» представительствояскöд да комияслöн общественнöй организацияяскöд, кодъяс эмöсь Санкт-Петербургын, Ленинградскöй областьын, Москваын, Крымын, Ненецкöй, Ханты-Мансийскöй да Ямало-Ненецкöй округъясын, Мурманскöй областьын.

Колö паськöдны уджсö и МОД «Коми войтыр» представительствояслы: паськыдджыка пасйыны коми кыв да письменность лун; информируйтны йöзöс аслас удж йылысь; корны культура да образование учреждениеяс, медым найö асланыс быдлунъя уджас пыр-тiсны национально-региональнöй компонент.

ЮРАЛЫСЬЛЫ ДА ГОССÖВЕТЛЫ

Съезд корис Коми Республикаса Юралысьöс сины 2025 во сиктлы. Быдöн тöдöны, мый сикт-грездъясын кызвын олысьыс – коми. Пондас кö овны да сöвмыны сикт-грезд, сiдзкöи коми войтырлöн олöмыс нюжалас водзö, а оз помассьы матысса некымын дас воö.

Уна корöм (быдса 17) коми съездлöн лоис Госсöвет дорö. Пасъям некымынöс. Бюджетнöй сьöм вылö велöдчысь том войтырöс делегатъяс корöны разöдны республика пасьтала, медым найö уджалiсны босьтöм квалификация кузяыс куим во, и сöмын сы бöрын вермисны вуджны мöд удж вылö. Медым тайö корöмсö пöртны олöмö, колö пыртны вежсьöмъяс «Об образовании в Российской Федерации» Федеральнöй законö. Сиктса олысьяс сiдз жö корöны сетны налы заптыны вöр сьöм босьттöг. Корöны делегатъяс косöдны пенсия вылö петан арлыд: нывбабаяслы – 50 во, мужичöйяслы – 55 во. Медым бурджыка видзны республикаын олысь войтырлысь здоровье, бурджыка дасьтыны спортсменъясöс, регионын колö лöсьöдны да вынсьöдны закон «О физической культуре и спорту».

РЕСПУБЛИКАСА ПРАВИТЕЛЬСТВОЛЫ

Медуна тшöктöм лои регионса правительстволы. Медым пöртны олöмö съездлысь резолюция да секцияяслысь рекомендацияяс, колö топыда уджавны Российскöй Федерацияса правительствокöд, воысь во содтыны регионса бюджетлысь ыждасö, кутны топыд йитöдъяс организацияяскöд, кодъяс уджалöны Коми му вылын.

Бöръя некымын дас воö му вылын ёна содiс пластикысь вöчöм упаковочнöй шыблас, кодi няйтöсьтö му, ва да сынöд. Та вöсна уна рытыввыв государствоын вуджöны сэтшöм упаковка вылö, кодi öдйö сiсьмö. Колö и Россияын мунны тайö туй кузяыс.

Быд пöлöс туй бöрся, медым сiйö бура уджалiс, колö видзöдны. Ва туй бöрся тшöтш. ХХ-öд нэмын ва туй Коми муын вöлi медтöдчана. Но кор парма кузя нюжалiсны кöрт да автомашина туйяс, ва туй шыбитiсны. Юяс пондiсны пись-кöдны аслыныс выль туйяс, налöн руслоясыс уналаын ляпкалiсны да дугдiсны туйны ветлöдлыны гырысь суднояслы. А ва туй колö видзны – шоныд кадö сiйö век дась нуны ас вылас кöть кутшöм груз.

Майшöдлöны коми войтырöс Серёговса санаторий, коми кывъя газет-журналъяслöн сöвмöм, автомобильнöй туйяслöн качество. Делегатъяс корисны быд во содтыны «Народнöй бюджет» программа финансируйтöм, дугдыны öдйö вежлавны министерствоясын да ведомствоясын уджалысьясöс, республикаса Москва карын представительствоö босьтны уджавны коми кыв вылын сёрнитысь, коми культура, история да тридицияяс тöдысь йöзöс. Унатор вöзйöма том войтырлы да видз-му овмöслы отсöг сетöм да сiйöс паськöдöм йылысь, и зэв уна мукöдтор.

(ЛОÖ ВОДЗЫН)

Съездлöн резолюция подув вылын лöсьöдiс

АЛЕКСАНДР ЛЮТОЕВ.