Главная Общество "Тэрыб отсöг" воас ас кадö

"Тэрыб отсöг" воас ас кадö

15 июля 2019
Висьмöм морт дорö отсöг вылö воöны бурдöдысьяс, но найö оз вермыны сикт-грездъястi пышявны подöн – медым öдйö воны висьысь дорö, колö машина.
 
Машинаяс дорö, дерт, колöны шоперъяс. Кöжмудорса ФАП-ын важиник «УАЗ» машинаяс вылын шоперъясöн уджалöны Василий Туркин да Юрий Разманов.
 
 
От мыльк вылын сикт-грездъяс – Кöжмудор, Туискерöс, От, Семуково, Кырс, Ватоись, Гажакерöс, Лыаты, Эжолты, – разалöмаöсь öта-мöдсяньыс уна километра вылö. И быд грездын эмöсь олöма да висьысь йöз, инвалидъяс, челядь, кодъяслы частöкодь ковлывлö бурдöдысьяссянь отсöг. Да и пöрнöй войтырöс мукöддырйи висьöмыс топöдлывлö, вöд мортыд абу кöртысь.
 
И сэки ковмывлö шыöдчывны ФАП-ын уджалысьяс дорö: кодлы кö тырмывлöны уколъяс да таблеткаяс, а мукöдсö ковмывлö и райцентрöдз нуöдны. Тöлын, Эжва вомöн йи кузя, абу ылын, а вот тулыс-гожöм-арын туйыс Айкатыла сиктöдз нюжалö сё сайö километрöдз, кокньыджык Сыктывкарöдз воны. А мыйöн сэтчöдз нуöдан чорыда висьмöмöс, дерт «тэрыб отсöг» машина вылын.
 
Важ техникаыд – öти машинаыс уджалö 19, а мöдыс 24 во, дугдывтöг разсьö, и водительяслы пыр колö на бöрся видзöдны. Öнi кöть школа гаражын дзоньтасьöны, а кутшöмкö кад, кор Туискерöс грездын пöдлалiсны бурдöдчанiн, ковмывлiс дзоньтасьны ывлаын – лым да зэр улын. Машинаяс вылö видзöдлан боксяньыс – кузовъясыс быттьö гöль мортлöн гач – ставыс дöмасаöсь. Кузов кöртсö сёйöма кадыс да солыс, кодöс тöвнас лыакöд тшöтш киськалöны туйяс вылö.
 
Да и миян туйяслöн абу на колана шыльыдыс – сэнi гöп (асфальтыс разсьöма или вöйыштöма), мöдлаын туй веркöссö лёка шыльöдöма. Татшöм туйяс кузя нуöдны висьысьöс, мед сылы эз ло лёкджык, зэв сьöкыд. «Воан Айкатылаöдз зыркыд туй кузяыд, а висьысьыд абу – нöсилканас пышйöма», – шмонитöны водительяс.
 
Василий Туркин служитлiс пограничнöй вöйскаын, техника дорын, да и батьыс – Александр Васильевич, уна во шопералiс «Коквицкöй» совхозын. Первойсö «ГАЗ-53» самосвал вылын, а бöрыннас новлöдлiс йöзöс «КАВЗ» автобус вылын. Пиыслы гашкö сысянь и вуджис техника радейтöмыс! Василий Александрович ачыс нин уна во руль сайын и шопералан стажыс сылöн матöстчö 30 волань.
 
Юрий Разманов тшöтш уна во руль сайын: армия бöртиыс сiйö уджалiс совхозын бензовоз вылын. Совхоз сиптöм бöрын кочегаритiс Туискерöсса пекарняын, а сэсся вуджис шоперавны больничаö. Уджалан стажыс Размановлöн – 37 во.
 
Став кадсö, мый ёртъяс уджалöны «тэрыб отсöг» машинаяс вылын, накöд эз вöв некутшöм ДТП, туй вылын ветлöдлан правилöяс торкалöм – кыкнаныс аккуратнöй да кывкутана морт.
 
Быд во Сыктывкарса Стефановскöй площадь вылын бурдöдчысьясöс новлöдлысь шоперъяслы кыпыда сетлывлöны выль, заводысь сöмын на воöм «тэрыб отсöг» машинаяслысь ключьяс. Кор нö на пöвстын лоасны и миян водительяс? Вöд вермас воны кад, кор машинаяслы висьысьяскöд öттшöтш аслыныс ковмас «тэрыб отсöг».
 

ВАСИЛИЙ КОСТРОМИН.  

Комментарии (0)


Противодействие коррупции



Фотогалерея
Версия для слабовидящих