Главная Общество Сьöкыд, но шуда олöм

Сьöкыд, но шуда олöм

25 ноября 2020
Кызьöд нэмся первой юкöнын Россияса олысь войтырлы ковмис мунны уна неминуча пыр, и век жö и налы вичмисны шуда лунъяс, радейтчöм, радлун…

Победа лун – Россияса народъяслöн медтöдчана праздник, кодöс некыдз оз позь вунöдны.Колö улöдз копыртчыны налы, кодъяс олöм жалиттöг дорйисны чужан му вöрöгысь, кодъяс сьöкыд уджöн тылын дасьтiсны фронтлы оружие, боеприпасъяс, снаряжение да сёян-юан. Ассьыныс пай Победаö пуктiсны и Висдiн грездса олысьяс – Василий Иннокентьевич да Галина Александровна Лютоевъяс.

 Василий Лютоевöс армияö босьтiсны 18 арöсöн 1943 вося январь тöлысьын. Киров карын сiйö велöдчис младшей комаднöй состав школаын. Боевöй туй сылöн завöдитчис 1-ой Украинскöй фронтын. Фронт чорыд тышъясöн вуджис Днепр ю, мездiс оккупантъясысь Киев. Житомир кар дорын Василийöс ранитiсны, бурдöдчис Ленинградын, госпитальын. Бурдöм бöрын сiйöс мöдöдiсны 191-öд стрелковöй полкö Карельскöй перешеек вылö. 1944 воын Войвыв фронт завöдитiс наступление. Матилла грезд дорын частьыс шедi окружениеö, кытысь петiсны ловйöн сöмын некымын морт. На лыдын вöлi и Василий, но начальство вевъялiс нин гижны и мöдöдны мамыслы извещение, мый пиыс усис.
1944 воын Гöрд Армия вöлi нин ёна вынаджык финъясысь. Выль наступление дырйи Василий Лютоев автоматысь бырöдiс противниклысь квайт салдатöс. Регыд мысти Финляндия петiс вöйнаысь. Лютоевлысь частьсö вуджöдiсны Прибалтикаö, кöнi коми салдат ёртъясыскöд вöтлiсны фашистъясöс Эстонияысь, Латвияысь да Литваысь. Победа лун сiйöс суис Прибалтикаын. Сылöн боевöй заслугаяс пасйöма уна медальöн да орденöн «Отечественной войны первой степени».
Демобилизуйтiсны Василий Иннокентьевичöс гвардии сержант званиеöн армияысь 1948 воын. Сiйö жö вося март 30 лунсянь пырö уджавны Печораса кöрт туйлöн Княжпогостскöй юкöнса Висдiн станция вылö стрелочникöн. Кöрт туй вылын уджалö 1971 воöдз. Сэсся уджалö «Гамскöй» совхозын, Айкатыла сиктса кооппродторгын. Бур уджысь Василий Лютоевлы унаысь сетлiсны Почёт грамотаяс, благодарностьяс да премияяс, сiйö – уджвывса ветеран.
 Галина Александровна чужлiс уна челядя семьяын 1929 воын. Öкмыс чой-воксьыс квайтыс кувлiсны дзöляöн на. Батьыс Галиналöн вöлi бур кыйсьысьöн и семьялöн пызан вылын век вöлiны вöр-ваысь кыйöм пöтка да чери. Но батьыс 1943 воын кувсис и семья пондiс тшыгъявны. Эз вöв и кöм-паськöм. Öти валеги гоз Галина тöвнас новлiс Клава чойыскöд.
Висдiн школаын куим класс помалöм бöрын Галиналы ковмис мунны уджавны: отсасьны нуöдны гортса овмöс налы, кодъяс вермисны вичмöдны нывкалы сёянтор – нянь, картупель… Неуна быдмыштöм бöрын пондiс уджавны колхозын: шырис ыжъясöс – нормаыс вöлi лун кежлö дас юр, дöзьöритiс мöс-кукань, вöчис мукöд удж.
Уджач да тöлка нылöс некымын во мысти пуктiсны градвыв пуктас дöзьöритысь звеноöн веськöдлысьöн. Быдтiсны капуста, кык план вöчлывлiсны. Волiсны районса веськöдлысьяс, аттьöалiсны бур уджысь.
1948 воын гортас воис фронтовик Василий Лютоев, локтiс корасьны Галина дорö. Сылы вöлi на сöмын дас кöкъямыс арöс и верöс сайö мунны эз тэрмась, дзебсис керка гöлбöчас. Но колхозса председатель Михаил Иванович Малафиев аддзис сiйöс, кыскис кöсаясöдыс да шуис: «Сiйö озырджык. Овны тэ сыкöд мöдан бура». Верöс саяд ковмис петны. Том гозъя пондiсны овны Василий Иннокентьевич керкаын, кöнi тшöтш олiс сылöн пöрысь мамыс.
1957 воын, кор Лютоевъяс семьяын вöлi нин кык челядь, Галинаöс пуктiсны нянь пöжалысьöн пекарняö, кодi сулалiс налöн керкасянь туй вомöн. Вит во сiйö пöжалiс Висдiнса да мукöд матiгöгöрса грездса олысьяслы чöскыд нянь.
1962 воын Галина Александровнаöс пуктiсны уджавны магазинö вузасьысьöн. Тайö удж вылас сiйö мырсис 1984 воöдз. Кöть сiйö кадас странаын унатор эз тырмы, Галина Лютоева век зiлис вайны магазинö унджык да колана промышленнöй да продовольственнöй тöвар. Ачыс ветлывлiс тöварла базаясö, бöрйылiс грездса олысьяслы коланатор. Выручка кузя век тыртлiс и вевтыртлiс план.
Галина Лютоева уджвывса ветеран, сiйöс унаысь бöрйылiсны сиктсöветса депутатöн, уджсö донъялöма Роспотребсоюзса да Коми АССР Верховнöй Сöветса Президиумлöн почётнöй грамотаясöн, медальясöн – «За доблестный труд в Великой Отечественной войне 1941-1945 годов», «50 лет Победы», «За трудовое отличие», морöсвывса пасъясöн – «Победитель социалистического соревнования», «Ударник 9-ой пятилетки», «Ударник коммунистического труда», «Отличник советской потребкооперации».
Галина Александровна олöм помöдзыс юрнуöдiс Висдiн грездса ветеранъяслöн организацияöн, участвуйтiс художественнöй самодеятельностьын, век вöлi олöм радейтысь, варов, уджач, кывкутысь мортöн. Верöсыскöд Висдiнын лэптiсны керка, быдтiсны куим челядьöс, видзисны мöс, кукань, ыжъясöс. Ыджыд праздник лунъяс кежлö пулывлiс коми тагъя сур, пызан вылас век вöлi чöскыд пöжас – кöлöбъяс, шаньгияс, черинянь.
Галина Александровна да Василий Иннокентьевич олiсны сьöкыд, но век жö шуда олöм – найö пуктiсны ассьыныс пай Победаö, быдтiсны челядьöс, радейтiсны олöм и орччöн олысь йöзöс.
 
 

ТАТЬЯНА МАЛАФЕЕВА.

    

 

Комментарии (0)


Противодействие коррупции



Фотогалерея
Версия для слабовидящих