Салдатъяс воисны гортас

Емдiн районö срочнöй служба вылысь гортас воисны том йöз, кодъясöс босьтлiсны армияö 2022 вося октябрь-декабрьын.

Кирилл Туркин

Век, кор ме воччаасьлывла аслам велöдчысьяскöд, кодъяс воöмаöсь гортас Россияса армияысь срочнöй служба бöрти, син водзö сувтлывлö аслам армияö мунöм да бöр гортö воöм.

Босьтiсны менö армияö 1974 вося ноябрьын. Оти кöдзыд арся асылö менö да Афанасий воча вокöс локтiсны колльöдны чужан грездын олысьяс, ёртъяс, кодъяскöд öтлаын велöдчим школаын. Эжва юлöн веськыд берегас, Оквад грездлань, миянöс вуджöдiсны «Казанка» пыжöн кывтысь йи палакъяс костъясöд.

Паметьö коли и службалöн медбöръя луныс: плац вылын ме кутыштлi ёртъясöс, кодъяс менö колльöдiсны ДМБ вылö. Помнита синва войтъяс, кодъяс асьныс друг визувтыштiсны банб\къяс кузя. Кык вося служба ёна йитiс том йöзöс, кодъясöс сэки босьтлывлiсны армияö СССР-лöн быд пельöсысь.

2023 вося ноябрь тöлысся öти рытö, кор вöлi пыртöда гаражö автомашина, аддзи туй вылысь том мортöс, кодöс пырсö эг и тöд. Матöстчис ме дорö. Аддзис менсьым чуймöмöс да шуыштiс: «Кирилл ме». И збыль Кирилл Туркин – нюжалöма, паськалöма пельпомъясас… Он и тöдмав! Школа помалiгас вöлi косiник, дзöля тушаа зонкаöн, а öнi багатыр. Или миянöс нин олöмыс му дорас личкыштiс?

Сёрнитыштiм. Армияö сiйöс босьтöмаöсь 2022 вося арын Роман Прошевкöд öтлаын. Кыкнаныс Лыаты грездысь. Кыкнаныс школа помалöм бöрын пырöмаöсь велöдчыны Сыктывкарса техникумъясö. Кирилл помалöма Сыктывкарса лесотехническöй техникум, диплом кузяыс сiйö электроприборъяс обслуживайтысь да вочысь электромонтёр. Армияöдз вевъялöма неуна уджыштны.

Призывнöй комиссия тöд вылö пуктöма сылысь гражданскöй специальностьсö, неыджыд тушасö и мöдöдöма велöдчыны учебнöй шöринö, кöнi дасьтöны Т-72 танк вылö наводчик-операторъясöс. Кирилл велöдчис сэнi пöшти вит тöлысь. Велöдчöм коми грездса зонкалы сетчис кокниа. Техникакöд сiйö вöлi тöдса, сяммис веськöдлыны легкöвöй автомашинаöн.

Велöдчан подразделениеын лунъяс лэбисны öти бöрся мöд. Наводчик-операторлысь специальность освоитöм бöрын Кирилл Туркинöс вуджöдiсны Александр Матросов нима гвардейскöй мотострелковöй полкö, кöнi сiйö служитiс 2023-öд вося апрель 20-öд лунсянь ноябрь 20-öд лунöдз.

Полклöн подразделениеяс отсалiсны пограничникъяслы видзны граница Брянск\й областьса Климово да Стародуб каръяс дорын, медым не лэдзны сэтчö Украинаысь диверсантъясöс. Сюся видзöдiсны и енэж вылö: öнiя кадö боевöй действиеяс мунöны оз нин важ ногöн – разведка нуöдсьö квадрокоптеръяс отсöгöн, насянь же вермас воны и «гöстинеч» – граната или мина.

Колö пасйыны, мый Кирилл Туркинлöн эз вöв кокни и челядьдырся олöмыс. Артмис сiдзи, мый ёнджыкасö быдтiс сiйöс бабыс – уджвывса ветеран Лидия Васильевна Туркина. Зонка век отсасис бабыслы, а грездад олiгад уджыд век тырмö. Лидия Васильевна öнi абу нин ловъя и зонлы отсавны бöрйыны водзö мунан туйвизь ковмас аслыс. Специальность сылöн бур, квалифицированнöй уджалан кияс Россияын век колöны.

Сиам Кириллы и мукöд том войтырлы, кодъяс локтiсны армияысь, бур олан туй, дзоньвидзалун да ыджыд шуд!

ВАСИЛИЙ КОСТРОМИН.