Российскöй армияö, служба вылö

Быд во От «гöра» вылысь Российскöй армияö мунöны служба вылö том йöз, медым видзны чужан мулысь мирнöй олöм.

Роман Матвеев

Россияса президентлöн индöм сьöрти Коми Республикаын арся призыв пансис ноябрь медводдза лунсянь. Том войтырöс таво мöдöдiсны служитны сухопутнöй войскöвöй юкöнъясö, национальнöй гвардияö, ВДВ, ВКС да ВМФ войскаясö.

От «гöра» вылысь таво армияö мунiсны кык зон. Первойсö пöвестка воис Семуково грездса олысь Роман Матвеевлы, а ноябрь 27-öд лунö армияö коллялiсны От грездса Николай Нефедовöс.

Талун кöсъя висьтыштны Роман йылысь. Сiйö чужис да быдмис уна челядя семьяын. Батьыс, Виктор Геннадьевич, öнi уджалö Кöжмудорса пöжарнöй юкöнын. Мамыс, Татьяна Александровна, Семуково турбазаса уджалысь. Гозъя быдтiсны куим зонмöс: медыджыдыс, Владислав, во-мöд сайын служитiс нин армияын – Войвыв флотса морскöй пехотаын, öнi уджалö кöрт туй вылын машинистлöн отсасьысьöн; медiчöтыс – Илья, коймöд во велöдчö Сыктывкарса колледж сервиса и связиын.

Тöдчöда, мый зонъяслöн прабабушкаыс, Глафира Дмитриевна Матвеева, Великöй Отечественнöй вöйна вывса ветеран. Сiйö служитiс Гöрд армияын 1943 вося май тöлысьсянь 1945 вося май тöлысьöдз. Вöлi санитаркаöн 35-öд торъя танковöй бригадаын, Белорусскöй фронт вылын. Бригада вöюйтiс Белоруссияын, Польшаын, босьтiс Берлин. Командование Глафира Дмитриевнаöс наградитiс уна боевöй наградаöн. Вокъяслöн дедыс, Геннадий Ильич, том дырйиыс служитiс пограничнöй войскаын, батьыс – Виктор Геннадьевич – ВДВ-ын.

Семуково грезд ас кадö нимöдiс генерал-полковник Александр Иванович Одинцов, кодi мунiс став Великöй Отечественнöй вöйна пыр. Сылысь боевö\й туйсö пасйöма уна наградаöн, на лыдын Красное знамя да Красная звезда орденъяс.

От «гöраса» том войтырлы шедлiс вöюйтны и Великöй Отечественнöй вöйна бöрын – Афганистанын, кыкысь Чечняын, а öнi – специальнöй военнöй операция вылын. И ставöн на пиысь вöлiны вернöйöсь присягалы.

Роман Матвеев чужлiс 2005 вося апрель нёльöд лунö. Кöжмудорса шöр школаын помалiс öкмыс класс. Велöдчигас ёна сöвмöдiс асьсö физкультура урокъяс да волейбол секция вылын. Физкультура велöдысь Владимир Петрович Туркин уна вын да кад сетö челядьлы, медым найö быдмисны пелькöн, ёнöн да винёвöн. Рома век вöлi школаса волейбольнöй командаын, котралiс лыжи вылын районнöй соревнованиеяс дырйи, дорйис школалысь честь «Юный защитник Отечества» вермасьöмъяс дырйи, бура ворсiс настольнöй теннисысь. Ёртасис ас тшöтшъяскöд, эз ышнясьлывлы.

Велöдчис шöркодя. Ичöтсянь радейтiс ноксьыны техникакöд, кужис сiйöс дзоньтавны. Велöдчис веськöдлыны мотоциклöн, бöрынджык легкöвöй автомашинаöн да тракторöн.

Бать-мамыс пиянсö ичöтсянь велöдiсны повтöг вöчны быдсикас удж, отсасьны и видз-му овмöсын, и пес заптiгöн. Бать-мамыскöд да вокъясыскöд Рома ветлывлiс вöрö тшак-вотöсла, ёртъясыскöд – чери кыйны. Семуковоад и вöрыд орччöн и Эжва юыд, кöнi позьö кыйны и сын, и ёдi, и сир. Школаын велöдчыгöн уджавлiс трудöвöй бригадаын – уджысь эз дзебсьывлы йöз мыш сайö.

2021-öд воын, öкмыс класс помалöм бöрын, Роман пырис велöдчыны Сыктывкарса кооперативнöй техникумö, право да социальное обеспечение специальность факультет вылö. Велöдчыгöн эз эновт спорт – ветлывлiс секция вылö, каникул дырйи волывлiс школаö, медым ворсны волейболысь.

Тайö лунъясö Роман Матвеев служитö Луга кар бердын, мотострелковöй подразделениеын. Öнi прöйдитö сiдз шусяна курс молодого бойца, примитiс присяга да тырвыйö пондiс кыскыны солдатскöй лямка.

Сиам Романлы да став салдат-матрослы крепыд дзоньвидзалун, кокниа мунны став мытшöд пыр да лоны Ай-мам мулöн дорйысьысьöн.

ВАСИЛИЙ КОСТРОМИН.