Ыджыд виччысьöмъяслöн кад (ЛЫДДЬÖЙ ПОМСÖ)

1991-öд воын, январь 11-13 лунъясö, Сыктывкарын мунiс коми войтырлöн медводдза съезд.

 МЫЙ АРТМИС, А МЫЙ ЭЗ

Медводдза коми съездса делегатъяс, коми войтырлöн актив унатор кöсйисны вöчны, медым петкöдны чужан мусö социально-экономическöй гуысь, сöвмöдны видз-му овмöс да промышленность, паськöдны коми кывлысь вежöртас, дугöдны вöр-ва пасьвартöм, бурмöдны республикаса йöзлысь олöмсö. Но могъяссö, кодöс лэптiс съезд, пыдди эз пуктыны ни Верховнöй Сöветса депутатъяс, ни республикаса правительство, ни федеральнöй центр.

Медводдза проект рыночнöй экономикаö вуджöм, социалистическöй эмбур массöвöй приватизация нуöдöм пыр, лöсьöдiсны Станислав Шаталин юрнуöдöм улын экономистъяс 1990-öд воын (программа «500 лун»). Мöвпыс вöлi сэтшöм – йöзыс, кодъяслöн эм Сберкассаясын чукöртöм сьöм, мед ньбасны предприятиеяслысь активъяс, а эз сöмын олöмын колана тöваръяс. Тайö бы отсалiс кутны инфляция и уна миллион морт лоисны бы акционеръясöн.

Но тайöс эз ло вöчöма – Ельцин-Гайдарлöн правительство первой лэдзис донъяс. Галопирующöй инфлация (1991 воын – 168%, 1992 воын – 2608%) «сёйис» йöзлысь чукöртöм сьöмсö. 1990-öд воын йöзлöн Сберкассаясын чукöртöм сьöмыс вöлi СССРлöн пытшкöс воловöй продуктысь (ВВП) коймöд юкöныс, 1992-öд во помын – сöмын 2%.

Государственнöй корпорация развитиелöн (ВЭБ.РФ) экономистъяс пасйöны, мый Россияын йöзлысь олöм торъялöмсö öнi позьö öткодявны сöмын латиноамериканскöй странаяскöд, а оз Европакöд. Тайö сы вöсна, мый Россияын 1% олысь вылö воö 20% национальнöй доход и 40% национальнöй озырлун. Россия öнi мирын медводдза имущественнöй неравенство кузя (ми бöрын мунöны ЮАР да Бразилия).

Воысь во чинö коми войтырлöн лыдыс. 2002-öд вося перепись петкöдлiс, мый Коми Республикаын олö 256 500 коми морт, 2020-öд во кежлö коми войтырлöн лыдыс чинiс кык пöвсьыс унджык – 127 089 мортöдз. На пиысь коми кывсö тöдö джынсьыс этшаджык. Тайö тенденцияыс петкöдлö, мый коми народ и сылöн кывйыс, оз кö нинöм вежсьы национальнöй политикаын, регыдъя кадö вошасны му вылысь.

Эз артмы сöвмöдны и видз-му овмöс: совхозъяс киссисны да сиптыссины, крестьянско-фермерскöй хозяйствояслöн выныс оз тырмы вердны регионын олысьясöс йöв-яйöн, картупельöн да мукöд градвыв пуктасöн.

Йöзтöммöны посни сикт-грездъяс, чинö олысь войырыслöн лыдыс посёлокъясын и каръясын. Емдiн районын 1990-öд воын олысь лыдыс в\лi 42 сюрс сайö, öнi колис 23 сюрс.

Кык палатаа парламент республикаын эз вöчны, 30 морта Каналан Сöветын коми депутатыс öнi некымын морт, ёна этшаджык коми йöзлöн республикаын олысь процент лыдысь.

Экономика республикаын кыдзи вöлi кызвыннас сырьевöйöн, сiдзи и колис. Вотыс, кодi чукöрмö республикаын, 80 гöгöр процентыс мунö федеральнöй центрö. Артмö, мый монголъяс, кодъяс роч княжествояслысь вöлi босьтöны вотсö 10%, вöлiны ёна бурджык хöзяеваöн.

Мый артмис и неуна гажöдö ловтö – тайö коми гажъяс нуöдöм. Уна районын, кöнi эм на коми олысьыс, öнi шоныд гожся кадö нуöдсьöны зэв бур да мича праздникъяс. Эм татшöмыс и Емдiн районын – «Емдiнса югöр», «Коми сьыланкывлöн ловъя шöрт».

АЛЕКСАНДР ЛЮТОЕВ.