Архив новостей
понвтрсрдчетпятсубвск
    123
45678910
11121314151617
18192021222324
25262728293031
       

Главная Общество Пöрысь салдатлöн олан туй

Пöрысь салдатлöн олан туй

28 февраля 2023

От «гöраса» олысь Алексей Иванович Ганов чужлöма, быдмöма и нэм чöжыс олöма Улыс От грездын.

Улыс Отйö мунам машина вылын. Руль сайын Володя, Алексей Ивановичлöн племянникыс. Сiйö быд вежон раз-мöдысь волывлö дядь Леш ордас, вайлывлö йöв да мукöд чöсмасянтор, кодöс лöсьöдö гöтырыс, отсалö керкадор вöдитны.

Алексей Ганов вöвлöм Сöветскöй армияса салдат, «Коквицкöй» совхозса ветеран – видз-му овмöсын сiйö уджалiс 35 во сайö, пенсия вылö петiс 1995 воын.

Улыс От грезд сулалö чериöн озыр Кузь ты берег бокын, шорсö вуждан – воан Навöлöк вöрö, кöнi быдмö уна пöлöс тшак. Тулыснас, кор Эжва вылысь мунас йи и ваыс пондас ойдны, Юрум кытшсянь ваыс шыбитчö шуйгавыв, да увтасiнъястi писькöдчö Туис-Керöс грездлань, кöнi бöр öтлаасьö Эжва юыскöд. Бöръя кадас ваа увтасiнъясас овмöдчöмаöсь мойяс, лэптöмаöсь плотинаяс и артмöма содтöд уна посни ты.

Алексей Ганов чужлöма 1937-öд воын январь 30-öд лунö. Сыысь кындзи бать-мамыслöн вöлöма ещö кык ныв, Алексей шöркостсаыс. Батьыс тöдiс грамота, уджавлöма сельпо контораын, бухгалтер-учётчикöн колхозын. Сiйö эм важ фотография вылын, морöсас öшалö сэкся ГТО значок. Мамыслы абу шедлöма велöдчынысö тшыгöм олöм вöснаыс, сiйö мырсьывлöма колхозын быдсикас удж вылас, тшöтш мöс лысьтысьöн да кук видзысьöн.

Великöй Отечественнöй вöйна пансьöм бöрын батьсö босьтiсны армияö, мöдöдiсны фронт вылö. «Ичöт вöлi, но помнита, кыдзи пызан сайын пукалiсны уна йöз, кор колльöдiсны вöйна вылö батьöс», – казьтыштiс ветеран. Батьыс вошöма юöртöг Волхов ю вуджигöн, кыдзи и уна сюрс мукöд салдат.

Кор быдмыштiс, Алексей пырис велöдчыны Улыс Отса школаö. Велöдчис сэнi кык во, сэсся Погостса школаын помалiс 4-öд класс. Сы бöрти сизим класс помалiс Кырув школаын, а сэсся велöдчис Емдiнса шöр школаын, кöнi сылы сетiсны 10-öд класс помалöм йылысь аттестат.

1957 вося арын Алексей Гановöс босьтiсны Сöветскöй армияö. Первойсö служитiс Бобруйск кар бердын, Белоруссияын. Примитiс присяга, ветлывлiс нарядъясö да нуис караульнöй служба. Сэнi салдатöc велöдiсны уджавны операторöн – артавны енэжтi лэбысь объектъяслысь траектория. Служитiс армиялöн ПВО юкöнын.

«Ёна вöлi пышйöдлöны, – казьтылö вöвлöм ракетчик. – Велöдчим зэв öдйö пасьтасьны-кöмасьны, противогаз да АКМ кватитны оружейкаысь, и сувтны стройö. Первойсö унаöн эз сяммыны весиг нямöдсö кок лапаас гаровтны – котралöм бöрын кокъясас вир гайдьяс вöлi петöны, но сержантъяс да старшина велöдiсны. Торйöн паметьö колины столöвöй кузя нарадъяс: öнi салдатъясöс кызвыннас вердöны гражданскöйяс, а сэки войбыд вöлi эмалированнöй ванна тыр весалан картупель, ыджыд бакö лук, морков. Синмыд нин куньсьö асъядорыс, а век уджалан. Тасьтi-пань быд сёйöм бöрын колö мыськавны киöн, кор мыськан машинаыс жугалас. Но, майбыр, и сёйыштны вöлi шедлö пöттöдзыд».

Некымын тöлысь мысти Алексейöс да некымын салдатöс мöдöдiсны Латвияö, Добеле кар бердö. Сэтчöс ПВО юкöнын салдатыд и помалiс ассьыс матö куим вося службасö. Урчитöм кадысь неуна водзджык лэдзисны армияысь сы вöсна, мый салдат шыöдчис командир дорас, медым лэдзасны пырны велöдчыны железнодорожнöй техникумö. Командиръяс мунiсны сылы вочча. Тадзи 1960-öд вося арын солдат воис чужан муö.

Недыр шойччыштöм бöрын Алексей Иванович шыöдчис совхозса кадръяслöн юкöнö, мед босьтны направление велöдчöм вылö. А сэнi вöлöм чукöртöны шопер курсъяс вылö зонъясöс и öти морт оз тырмы группаас. Вот и ковмис сылы мунны велöдчыны Сыктывкарса автошколаö шопер выло. Нёль тöлысь мысти том йöзлы сетiсны «С» категория вылö правояс.

1960-öд воясö совхозъясö пондiс воны уна пöлöс техника, Гановлы вичмис «ГАЗ-93» самосвал. Уджыд совхозад сэки вöлi уна: тулыссянь сёр арöдз гöра-кöдза, турун да силос заптöм, да и сельпоса магазинъясö корлывлiсны быдсикас тöвар вайны. Вогваздино кöрт туй станциясянь фермаясö вайлывлiсны комбикорм. А сэкся туйястö он öтлаöд онiякöд: воиса местаясас тöвнас нöбавлiс морт судта толаяс, тулыс-арын – рöспута. Совхозъясса тракторист-шоперлы уна ковмывлiс мырсьыны.

Тадзи Алексей Иванович уджалiс руль сайын вит во. А сэсся том да кывзысьыcь морттö индiсны бригадирöн От отделениеса тракторнöй бригадаö. Техника частö вöлi жугласьö, запчастьыд оз тырмы. Алексей Ганов бур кывйöн казьтылö кузнеч Филипп Филиппович Тринцöс, токарьясöс Александр Васильевич Ярановöс да Владимир Иванович Козловöс, кодъяс вöлiны зэв кужысь специалистъясöн и век отсасисны механизаторъяслы да шоперъяслы дзоньтавны разсьöм техника.

1970-1980-öд воясад От отделениеын вöлiны мöс да кук видзан гидъяс, пилорама, кöрым посньöдан машина, быдтiсны картупель уна гектар вылын. Дерт, техникаыд кызвыннас вöлi важ, да и век эз тырмы, та вöсна зэв уна удж ковмывлiс вöчны ки кежысь. Тадзи Ганов мырсис-уджалiс бригадирöн вит во, но сэсся совхозö воис велöдчöм морт и сiйöс вежисны. Мöдiс уджавны полеводческöй бригадаын. Йöзкöд бура ладмис, да и воддза воясса веськöдлöмыс отсалiс.

«Гажаа сэки сиктад олiсны! – казьтылö Алексей Иванович. – Том йöз субботникъяс вылын чукöртлывлicны коз да ньыв пу лыс, сэсся ciйöс изiсны пызь вылö да содтылiсны скöтлы кöрымас – тулысланьыд ёна содтö йöвтö, да и витамин сюрукъяслы. Важöн, помнита, Погостын вöлi сулалö кирпич вичко, ой и мича жö! Енлы веритысь йöз унаöн чукöртчывлiсны вичко праздникъяс дырйи. Том войтыр клубын вöлi ансамбль чукöртлывлöны, гитара-барабан отсöгöн концертъяс дасьтывлiсны, да и трактор волокушаын орчча грездъясö ветлывлiсны. Гыма яг вылын, кодi ты бердас, челядь котыр футболысь ворслывлicны. А онi…»

Кольöм во, август тöлысьын, Улыс От пасйис юбилей. Алексей Ивановичöс, кыдзи ветеранöс, тшöтш корлiсны праздник вылас, сетiсны Почётнöй гражданин ним.

Нэм чöжыс совхозса труженик олö ичöтик важ керкаын, кытчö воддза воас лыйис мача чард би, чуть пöжар эз ло, бур, мый мортыс ывлын вöлöма. Уна фотография да бура уджалöмысь Грамота тшыксьöма, а вöд Гановлы козьнавлöмаöсь «Ударник коммунистического труда» да «Победитель социалистического соревнования» знакъяс. Тадзи лöня и олö Улыс Отса удж вывса ветеран да вöвлöм ракетчик Алексей Ганов. Гожöм-арнас век на ветлывлö вотны тшак, кыйö чери орчча тыас, вöдитö градвыв пуктас. Сиам сылы дзоньвидзалун да став бурсö!

 

ВАСИЛИЙ КОСТРОМИН.

Комментарии (0)


Противодействие коррупции



Фотогалерея
Версия для слабовидящих