Рубрики
Олöмын тöдчана пас
23 августа 2019
От «гöраса» ичöтик Ипа грездын олö коми морт, кодлысь уджсö пасйöма Дружба народов орденöн.
.jpg)
Эжва юлöн шуйга береглöн кыр вылын сулалö От «гöраса» Ипа грезд. Öнi сэнi олöны сöмын некымын морт, да гожöм кежлö карысь волывлöны дачникъяс. А водзсö танi сулалöмаöсь порсь да кукань видзан фермаяс – Ипа грезд вöлöма «Емдiн» совхозлöн юкöнöн, уджалысь вöлöм ёна уна. На лыдын вöлöмаöсь Василий Иванович да Анфиса Александровна Туркинъяс. Василий Туркин, Великöй Отечественнöй вöйнаса участник, ранение вöсна инвалид, уджавлöма рабочöйöн, кувсьылöма 62 арöсöн. Анфиса Туркина дöзьöритлöма куканьясöс, уджавлöма дояркаöн. Туркинъяслöн семьяас вöлöма сизим челядь – квайт нывка да öти зон, кодöс нимтылöмаöсь Öльöксанöн.
Чужлöма Александр Васильевич 1944 вося июль 18 лунö, быдмöма сьöкыд вöйна бöрся кадö. Ас арлыдаясыскöд гожöмъяснас кöмтöгыс котравлöма вöрö тшак-вотöсла, Эжва дорö шатинöн чери кыйны, кыдз вермöма, отсасьöма бать-мамыслы гортса овмöсын. Воас кад, пырас велöдчыны Туискерöсса школаö. Сылöн висьталöм кузя, велöдчöм сетчöма кокниа: торйöн кажитчöмаöсь физика, математика да геометрия. Класснöй руководительнас вöвлöма Гаяния Васильевна, бöрыннас – отличник народного образования, заслуженнöй учитель Коми АССР, «Знак почета» орденса кавалер.
Тöдлытöг бöрö колины школаса вояс. Пырис уджавны «Емдiн» совхозö разнорабочöйöн. Уджалiс армияöдз. 1963 восянь куим во – 1966 воöдз, служитiс Сöветскöй Армияын. Квайт тöлысь вöлi Чебаркуль учебкаын, сiйöс помалöм бöрын мöдöдöмаöсь Германияö. Водзö служитöма спецсвязь подразделениеын, КГБ-са 8-öд отделын. Демобилизуйтчöм бöрын бöр воас ас совхозö, сэки нин «Коквицкöй» нима.
Директорнас уджалöма И.М.Огнев. «Шань да тöлка морт, бур юралысь…» – казьтылö Александр Васильевич. Том мортöс мöдöдасны автошколаö Сыктывкарö шопер курсъяс вылö, кодöс сiйö помалiс 1967-öд вося май тöлысьын. Том водительлы пыр жö сетiсны важиник бортöвöй «ГАЗ-51».
«Лун ветлöдла, кык лун машина воча. Но велалi зэв тэрыба болт-гайкатö гартны-разявны, да «пытшкöссö» машиналысь ёна бура тöдмалi», – казьтылö Александр Туркин. Медводдза «ГАЗ-51» бöрын вöлiны «ЗИЛ-585», сэсся бортöвöй «ГАЗ-52» – дзик выль машина. Коркö воис öчередьыс выль самосвал «ГАЗ-53»-öдз. Сiйö кадас совхозса гаражын вöлi 35 сайö грузöвöй машина, молоковоз и 2 бензовоз.
«Шоперъяслöн коллектив вöлi дружнöй, быдöн отсасисны ёрта-ёртыслы вочны разсьöм машина: КПП торйöдны-кöлавны, мотор ремонт бöрын машина пытшкöсö сувтöдны, – водзö висьталö Александр Васильевич. – Да и праздникъяс водзын вöлi радейтам пукыштны-варовитны. Том йöзлы отсавлiм бур сöветöн, юксим накöд асланым тöдöмлунъясöн. Видзöдан öнi – руль сайын частö пукалöны нывъяс да нывбабаяс. А миян коллективын 80-öд воясын нин мужикъяскöд öтвыв грузовик вылын уджалiс Лыатыысь Таня нима ныв. А шоперлöн уджыд совхозад – силос да турун кыскавны, компост петкöдны му вылö гöра-кöдза водзын. Бара жö Язель да Вогваздино станцияяссянь вагонъясысь комбикорм, удобрение мешöкъяс гургöдлыны. Мукöд дырйи ковмывлiс уджавны сёр рытöдз, вöчны некымын рейс, öд он кö ас кадö ректы вагонтö, совхозлы воас ыджыд штрап. Но, а сэкся туйясыс вöлiны, рочöн кö – не дороги, а одни направления. Асфальт эз вöв, тулыс-арын торъя мырсьöм-майшасьöм шопер-трактористъяслы. Да и тöвнас шедлывлiс мырсьыны, водзтiöд лымсьыд турöбъяс бöрад эз öнiя моз туйястö весавлыны».
Александр Васильевич водзö казьтылö, кыдзи сiйöс Лёня Горяинов ёртыскöд колян нэмся кокъямысдасöд воясö ас машинаяснас – самосвал «ГАЗ-53»-ясöн мöдöдлöмаöсь командировкаö Летка-Абъячой автомобильнöй туй лöсьöдны. Туйыс республиканскöй тшупöда, уджаласны найö сэнi январь тöлысь чöж. Олöмаöсь ыджыд кузь барак манера керкаын, луннас машина вылын кыскалöмаöсь туй вомöн железобетоннöй ва лэдзан трубаяс. И тадзи быд лун – асывсянь сёр рытöдз. А машинаяс ывла вылын сулалöны… Кыдзи завöдитны машина мотортö асывнас, войнас кö комын градус кöдзыд сулалö? Сöмын паяльнöй лампа отсöгöн!
1986 воын тöлка да опытнöй шоперлы «Коквицкöй» совхозса директор И.М.Турбылев дöверитiс выль автобус «КАВЗ-685». Уджалiс автобус вылын Александр Туркин матö дас во, кытчöдз перестройка бушков эз разь совхозъяс, кыдзи и СССР-са уна завод-фабрика да мукöд предприятие. Совхоз тупкыссьöм борын Александр Васильевич пырис уджавны ТОО «Вöр-ва» кордон вылö, мырсис во гöгöр, но эз кажитчы и петiс пенсия вылö.
Александр Васильевичлöн уджалан стажыс 33 во, на пиысь комын воыс – руль сайын. Уджалiг чöж эз вöв ни öти авария и некутшом ПДД торкалöм. Сылысь уна вося бур уджсö пасйöма уна Почетнöй грамотаöн, «Победитель социалистического соревнования» знакöн. Но медся тöдчана награда – орден Дружбы народов, №61121, кодöн пасйöма Александр Туркинлысь уджсö 1986 вося август 23 лунö Верховнöй Сöветса Президиумлöн Указöн.
Таво август тöлысьын Александр Васильевичлы тырис 75 арöс. Татшöм арлыд вылö видзöдтöг сiйö пыр на тэрыб вöраса, пельк да вына, да и шоперскöй навыкъяс эз вошны, трактор-машинатöг овны оз вермы. Радейтö вöр-ва, ветлывлö тшак-вотöсла, кыйö чери. Водзджыксö вöравлöма, весиг ош да кöинöс кыйлöма. Кыдзи и унджык шоперыс, ёсь кывла да шмоньла зептö оз пыр. Валентина Константиновна гöтырыскöд олöны 48 во, быдтiсны кык пиöс. Пыр пуктöны градвыв пуктас, уна во видзисны мöс да кук, порсь, ыжъясöс. Но олöмлöн воясыд босьтöны ассьыныс, öнi дöзьöритöны сöмын кроликъясöс.
Тадзи олö-вылö Ипа грездса Дружба народов ордена кавалер Александр Туркин, кодлы тайö олöмас ставыс тырмö и ёна шензьö миян государствоса да республикаса чина йöз да депутатъяс вылö, кодъяс унджыкыс мöвпалöны оз прöстöй йöз, ас му дзоньвидзалун да сöвмöм йылысь, а сöмын асланыс зеп тыртöм йылысь.
ВАСИЛИЙ КОСТРОМИН.
Чужан луныс всё-таки 18 июля или августа...?
18 июля.