От гораса генерал

105 во сайын, май 13-öд лунö, Семуково грездын чужлiс Александр Иванович Одинцов, генерал-полковник, кодлöн олан туйыс вуджис кык вöйна пыр.

А апрель 14-öд лунö тырис дас во, кыдзи Емдiн районса ДОСААФлöн организация аслас пленум вылас вынсьöдic Кöжмудор школаса первичнöй организациялысь корöм и сетiс сылы генерал-полковник Александр Одинцовлысь ним.

Александр Одинцов чужлiс 1918 воын Семуково грездын, крестьянскöй семьяын. Сылöн батьыс, ыджыд тушаа ён мужичöй, кыдзи и мукöд грездса войтыр, уджалiс аслас кöзяйствоын, а ещö вöлi бур вöралысьöн и Саша писö ичöтысянь велöдiс, кыдзи пуктавны лэч, капкан, лыйны урöс, медым кусö не тшыкöдны.

Тöдöмлунъяс бöрся

Кор зонкалы тырис кöкъямыс арöс, сiйö пырис велöдчыны нёль класса Семуковоса школаö. Медым велöдчыны водзö, Сашалы ковмис мунны гортсьыс да овмöдчыны Татьяна чой ордас, Тыдор грездö, кодi сулалiс Семуковолы вочча, но Эжва юлöн веськыдладорас. Тыдорсянь Айкатыласа сизим класса школаöдз вöлi вит гöгöр километр, и зонкалы буд лун ковмис ветлöдлыны подöн öтарö-мöдарö. Бать-мам керкаас волывлiс сöмын шойччан лунъясö, праздникъяс да каникул дырйи. Тадзи бöрö колис Айкатыласа школаын велöдчöм.

Водзö позьö вöлi велöдчыны Емдiн сиктса педучилищеын, кодöс восьтicны 1931 воын. Сдайтiс экзаменъяс школьнöй юкöнö 1935 воын, мöдiс велöдчыны. Но овны йöз кваритираын вöлi дона и велöдчöм ковмис эновтны.

Эм сэтшöм профессия

1937 воын Александрöс корисны ужавны комсомоллöн районса комитетö, индiны веськöдлыны политотделöн. Воис кад мунны армияö. Том мортöс мöдöдiсны Ленинградса Энгельс нима военно-политическöй училищеö. Но помавны велöдчöмсö Одинцовлöн эз артмы, пансис вöйна Финляндиякöд. Коми зонмöс мöдöдiсны фронт вылö политрукöн. Сьöкыд бой дырйи сiйö ёна доймис, дыр бурдöдчис госпитальын. Бурдöм бöрын сылы козьналiсны медводдза правительственнöй награда – орден Боевого Красного Знамени.

Советско-финскöй вöйна помассьöм бöрын дивизиясö, кöнi служитiс Одинцов, мöдöдiсны Белорусскöй вöеннöй округö. Недыр мысти пансис выль вöйна и сылы ёртъясыскöд ковмис бара тышкасьны вöрöгкöд. Воис 1941 вося июль. Александр Одинцовöс корисны фронт вылысь, индiсны комиссарöн разведывательно-диверсионнöй отрядö. Июль помын 100 морта отряд гусьöн вуджис фронт вомöн да пырис враглы тылас, кöнi нуöдiс разведывательно- диверсионнöй удж вит тöлысь чöж, кытчöдз эз во приказ бöр воны ас войскаяс расположениеö.

Одинцовлöн эм татшöм гижöд «Непокорённая Березина» небöгын: «1941 вося ноябрьын Рытыввыв фронтса командующöйсянь, а тайö вöлi Георгий Жуков, воис приказ вуджны фронт и локны сы дорö – миян киясö сэки шедiсны немецкöй командованиелöн зэв колана документъяс. Фронт вуджим сьöкыда – öти войся тышын воштiм дас мортöс. Дасöс! Отрядлысь дасöд юкöнсö. Но фашистьясöс ми водтöдiм унджык. Вöчим сiдзи, мый найö эз гöгöрвоны, кодi и кысянь на вылö уськöдчис, та вöсна лыйлiсны кытчö шедö. Кор ми петiм асланым позицияяс дорö, ми вылö позьö вöлi видзöдны сöмын чуймöмöн – уналöн вöлi трофейнöй оружие, сэтшöм жö кöм-паськöм. Но генерал Жуков водзын петкöдчим ас, Гöрд армиялöн салдатъяслöн обмундированиеын.

Доклад вылын вöлiм кыкöн: Шевченко да ме. Командующöй да Вöеннöй Сöветса член юалiсны миянлысь, збыль-ö став уджсö вöчöма сiдз, кыдзи ми висьталiм. Сэки ми приёмнöйлöн джодж вылас вольсалiм немецкöй салдатъяслысь документъяссö, штабнöй кабалаяс, фашистскöй наградаяс…  Командующöй корис миянöс кабинетас да козьналiс кыкнанымлы орден Ленина. Мöд луннас наградаяс козьналiсны миян отрядса мукöд солдатлы да офицерлы».

Шойччöм бöрын тшöктiсны чукöртны выль отряд, велöдны боецъясöс. 1942 вося августын 70 морта группа, кодъяс пöвстын вöлi и Одинцов, бара шыбитiсны вöрöглöн тылö – парашютъяс вылын оккупируйтöм Белоруссияö. Отрядыслы сетiсны «Непокорённая Березина» ним. Разведывательно-диверсионнöй удж отряд нуöдiс немецкöй группа армий «Центр» тылын. Тайö отрядас Александр Одинцов вöлi кык во чöж, кытчöдз Гöрд армия эз вöтлы фашистъясöс Белоруссияысь. Вот кöнi ковмис Коми муса салдатлы батьыслöн вöравны велöдöмыс!

Му вылын сувтiс мир

Вöйна Александр Ивановичлöн помассис сэк, кор сьылiас пырис осколок. Сылöн званиеыс сэки вöлi подполковник. Сiйöс эвакуируйтiсны самолёт вылын «ыджд му» вылö, госпитальö. Бурдöдчöм борын Александр Одинцовöс сувтöдiсны Главнöй разведывательнöй управление штабса резервö. Вöйна помассьöм бöрынсiйö помалис Школа высшей разведки, а 1948 воын – Фрунзе нима вöеннöй академия. Велöдчöм бöрын служитiс начальник штаба да командир полка должностьяс вылын.

1960-öд воясын служба нуис Закавказскöй вöеннöй округын, а кор помалiс генеральнöй штаблысь академия, Ылысасыввывса вöеннöй округын – Камчатка вылын веськöдлiс 22-öд дивизияöн. Камчаткаысь Одинцовлöн семьяыс вуджис Москваö, кöнi Александр Иванович уджалiс СССРса обороналöн министерствоын вневойскöвöй подготовка юкöнса веськöдлысьöн.

1973 восянь 1986 воöдз Александр Одинцов – ЦК ДОСААФ председательöс медводза вежысь. Пенсия вылö петöм бöрын генерал-полковник олöм помöдзыс уджалiс Российскöй ветеранъяслöн сöветын, вöлi председательöс медводдза вежысьöн.

Рöдиналы бура служитöмысь Александр Иванович Одинцовöс наградитiсны орден Ленинаöн, орден Октябрьской революции, нёль орден Боевого Красного Знамени да öти орден Трудового Красного Знамени, орден Отечественной войны 1-й степени, орден Красной Звезды да уна медальöн.

Кувсис ветеран 1995 вося январь 9-öд лунö, дзебисны Лефортовскöй кладбище вылö.

Ветеран век миян паметьын

Тавося май 13-öд лунö А.И.Одинцовлы тырис бы 105 арöс. Сё вося чужан юбилейсö сылысь кыпыда пасйисны миян Кöжмудорса школаын. Волiс Москваысь сылöн Екатерина внучкаыс, кодi кытшовтiс дедыслысь чужан местаяссö, пуктiс дзоридз букет сылöн мемориальнöй плита бердö, унатор висьталiс Одинцов йылысь челядьлы. Бöрыннас козьналiс разведывательно-диверсионнöй группаяслöн вöюйтöм йылысь дедыслöн гижöм куим книга. Емдiн музейысь вайлiсны выставка, код пиын вöлi генераллöн мундирыс да уна мукöдтор. Антонина Михайловна Туркина, Туис-Керöсса музейса директор, дасьтiс генерал олöм туй йылысь кык стенд. Коми РТК дасьтiс тайö мероприятие йывсьыс фильм «Чтобы помнили».

Тавося юбилейнöй лун кежлö ми корлiм мужество урок вылö Семуков гозъяöс – Вячеслав Вячеславовичöс да Галина Константиновнаöс. Вячеслав Семуков лоö племянникöн А.И.Одинцовлы: сылöн батьыс, тожö фронтовик, гöтрасьлöма Таня чой вылас, код ордын овлiс Саша Айкатыласа школаын велöдчигöн.

Гöстьяс унатор висьталiсны велöдчысьяслы: кутшöм окотапырысь генерал век сёрнитлывлiс чужан сиктса йöзкöд коми кыв вылын, некор эз ышнясь ыджыд чинöн да наградаясöн. Сылы кажитчис ветлывлыны матысса ягö, öктыны тшак да пув, кыйны чери. Ёна радейтiс чужан местаяссö да быд гожöм кöсйысис волывлыны татчö. Семуково грездö волiгöн сiйö век вöлi ньöблывлö челядьлы кампет, а ветеранъяслы – курыдтор.

Торъя нин сутшкысис велöдчысьяслы сьöлöманыс Вячеслав Семуковлöн Москваö генералöс медбöръя туйö коллявны ветлöмыс. Миян районысь делегация нуис сюрс катшасинъясысь вöчöм венок. Тайö войвывса дзоридзсö зэв ёна радейтлöма миян нималана земляк.

Грездса активистъяс

Вячеслав Вячеславович гöтырыскöд да грездса активистъяскöд быд тöдчана праздник кежлö дасьтöны концерт, пуктöны спектакль. Торъя нин кыпыда пасйöны Победа лун. Великöй Отечественнöй вöйна вылын усьöмъяслы памятник дорын Кöжмудор школаса велöдчысьяскöд чукöртлöны митинг, пуктöны гирляндаяс, кодъясöс уна во чöж кöртавлö Вячеслав Семуков, а дзоридзясöн мичмöдöны нывбабаяс.

Торъя кыпыда Семуковоын пасйисны тавося май 9-öд лун. Гуйöр дорса туй вылын сулалiс мичмöдöм ГАЗ-66 автомашина, кодöс дасьтiс Вячеславлöн Славик пиыс. Тувсовъя тöв мелiа тöлöдiс Победа знамялысь копиясö, кодöс вöлi лэптöма машина кабина вылас, кылiсны вöйна кадся сьыланкывъяс да маршъяс. Бöрынджык памятник дорö митинг вылö локтысь йöзöс гöститöдiсны тушонкаа греча рокöн да пым чайöн. Праздникыс мунiс зэв кыпыда.

ДОСААФлöн юкöн

Миян школаын дасöд во уджало ДОСААФлöн юкöн, кодлы сиöма генерал-полковник А.И.Одинцовлысь ним. Ас кадö миянлысь корöмсö вынсьöдiс ДОСААФлöн региональнöй организация. Почётнöй нимкöд тшöтш школаса организациялы сетiсны ДОСААФлысь флаг, код улын мунöны школаса став патриотическöй мероприятиеяс.

Миян бур традицияöн лоисны биатлон да лыжнöй эстафетаяс нуöдöм, мужество урокъяс. Школаса организацияса членъяс выступайтöны оборонно-массöвöй мероприятиеяс вылын. Кыкысь ветлiм походъясö, кодъяс мунiсны зэв гажаа. Торйöн кöсъя пасйыны школаса уджалысьясöс, тайö В.П.Туркин, А.И.Туев, Б.Э.Климушев, В.Н.Прошев, В.А.Туркина, С.И.Мартынова. Тавося юбилейлы сиим лыйсьöм кузя соревнование, кöнi вермисны участвуйтны быдöн. Öнi виччысям районса ДОСААФсянь наградаяс – грамотаяс да медальяс.

ДОСААФын ме 1982 восянь и кöсъя тшöтш пасйыны аслам наставникъясöс, кодъяс веськöдлiсны районнöй организацияöн – тайö Владимир Васильевич Каракчиев, Руслан Михайлович Маслов, Владимир Аркадьевич Розмысло да Любовь Гельмутовна Павлова. Накöд век вöлi воам öтувъя кывйö, найö век, кыдзи вермисны, отсалiсны школаса организациялы.

Миян школаса ДОСААФлöн организация аслас активкöд и водзö кутас вылын кутны асланым земляклысь, генерал-полковник Александр Одинцовлысь, ним. Мöдам помнитны сылысь боевöй туй да водзö висьтавлыны та йылысь том йöзлы. Генерал-полковник Одинцов – миян От гöраса легенда, код вылысь колö босьтны пример став татчöс олысьлы – и ичöтлы, и олöмаяслы.

ВАСИЛИЙ КОСТРОМИН.