Олöмыс помöдз эз на кус

Бöръя комын вонас Емдiн районын сикт-грездъяс ёнакодь кушмисны: предприятиеяс сиптыссисны, йöзыс мунiсны или кувсисны. Но кöнсюрö олöм биыс öзйö на.

Михаил Козлов

 От «гöра» вылын чужлiсны-быдмылiсны уна нималана морт: на йылысь гижлывлiсны газетъясö, висьтавлывлiсны радио пыр, петкöдлывлiсны телевизор кузя, налы козьнавлiсны государственнöй наградаяс. Но талун ме кöсъя висьтыштны прöстöй уджалысь морт йылысь, кодi мырсьö От грездса мöс видзан фермын.

Но медводз ферма йывсьыс. Кыдзи висьталiс Надежда Нефедова, фермерскöй хöзяйствоöн веськöдлысь, фермаын öнi 38 мöс, öти öш, 52 кукань да кык вöв: ставыс – 93 пемöс. Найöс дöзьöритöны сизим морт: кык тракторист – Володя Окулов да Евгений Нефедов, доярка Наталья Нефедова, кык телятница – Надежда Туркина да Елена Шашева, слесарь Михаил Козлов да рабочöй Максим Козлов.

Надежда Питиримовна майшасьö – уджавны видз-му овмöсын öнi зэв сьöкыд. Техника, ломтас-мавтас, комбикорм да мукöдтор, мый колö, медым нуöдны удж, – век донсялö. А йöв да яй ньöбöны ичöт донысь: литра йöвсö ньöбöны 26,40 шайтысь первой сорт, 31-34 шайтысь медвылыс сорт. Яйсö хöзяйство вузалö бюджетнöй учреждениеяслы 400-450 шайтысь килограмм.

Скöт видзысьлöн аслас уджалан график. Мöскыд абу компьютер или станок, сiйöс он сувтöд: быд лун колö ас кадö вердны, лысьтыны. Тайö уджсö кö он вöч, мöсъясыд дугдасны сетны йöв, а куканьясыд – быдмыны. Фермаын уджалысьяс, кöть удждоныс налöн и абу ыджыд, старайтчöны. Налы отсöг вылö, кор колö, петавлывлö и ачыс Надежда Питиримовна Сергей верöсыскöд.

Удж мытшöдъяс, кодъяс эмöсь ферма вылын, уджалысьяс зiльöны вештыны. Таво тöв кежлö вежисны фермаын пыран öдзöс – воддзаыс вöлi лёка кутö шоныдсö. Скважинаын оз тырмы ва – тшöтш колö мöвпышты, мый вöчны. Быд тöлысь уджалысьяслы колö мынтыны удждон, бюджетö – налогъяс.

Кöнi чужис, сэнi и олö да уджалö

Михаил Козлов чужлiс 1988 вося март 19-öд лунö Эжов грездын. Быдмис Туис-Керöсын, рабочöй семьяын. Батьыс, Иван Питиримович, нэм чöжыс уджалiс трелёвочнöй трактор вылын Туис-Керöсса РММ-ын – петкöдлiс делянкаяс вылысь хлыстъяс да сöвтiс найöс лесовозъяс вылö. Кор организациясö реорганизуйтiсны, гожöмъяснас сiйö содтöд пондiс заптыны турун. Мамыс, Зинаида Васильевна, уджалiс «Коквицкöй» совхозын.

Миша дзöля дырйиыс аскодьыскöд тшöтш ветлывлiс вуграсьны, вöрö тшак-вотöсла, купайтчыны. Велöдчис шöркодя, эз вöв вильышöн. 2006-öд воын помалiс дас öти класс, кöсйис велöдчыны лесник вылö, но батьыс шуис, мед пö первой армияö ветлас, а сэсся нин велöдчас.

Армияын веськалiс кöрттуй войскаö, служитiс Ставропольскöй крайын Невинномыск кар бердын кык во. Служба дырйиыс унаысь ветлывлiс командировкаö. Демобилизуйтчис 2008-öд вося арын.

Армия бöрын вöлi мöвп пырны уджавны Микунь карса кöрттуй организацияö, но уджалан местаыс сэки сэнi эз вöв. Сувтiс Центр занятостиö учёт вылö, кысянь сiйöс ыстiсны От грездса МУП «Заря» овмöсö. Сiдзи бöр и воис Михаил Козлов аслас чужан От «гöра» вылö.

Первойсö уджалiс полеводствоын, вöр заптан бригадаын. Уджалiс бура, сьöлöмсяньыс. «Зэв кывкутысь да дисциплинированнöй уджалысь. Век ас кадö волывлö удж вылас, кöть локнысö колö ылысь Ипа грездысь», – висьталiс Валентина Алексеевна Ганова, кодi ас кадö веськöдлiс МУП «Заря» предприятиеöн.

И збыль, удж вылас воöдчыны Михаил Ивановичлы колö пöшти кöкъямыс километра сайсянь. Ветлывлö ёнджыкасö велосипед вылын – гожöм кöть тöв, ар кöть тулыс. Тырмö жö мортыдлöн терпеньеыс! 2018-öд восянь, кор От грездын восьтiсны выль ферма, Михаил уджалö слесарьöн, а гож\мнас ещö и мöс-кук видзö.

Менам юалöм вылö – «Кыдзи овсьö-уджавсьö?», Миша вочавидзис: «Быдсямаыс овлö. И дышöдлывлö, и мудзлывлан ёна… Но бокö, вахтаяс вылö, пока оз на кыскы. Да и тьöткалы колö отсасьны. Удждон кынöмпöт вылö тырмö. Кор мöс-куктö лэдзам йирсьыны, содтöд уджысь удждон содлывлö. Да и кодi менö ферма вылас вежас – уджалысь арлыда йöзыс сикт-грездад пöшти эз кольны, а кывтöм пемöсъястö он эновт!»

ВАСИЛИЙ КОСТРОМИН.