Оквад грездад ставыс ас

Шуöны – быд морт олö сiдзи, кыдзи кöсйö. Но тадзи оз век артмы и миянлы ёнджыкасö ковмывлö овны сiдз, кыдзи тшöктöны.

Глафира Козлова

Менö, том специалистöс, 1963 вося арын райсöветса культура юкöн мöдöдiс Оквад грездö вежны декретнöй öтпускö петысь киномеханикöс – Дина Одинцоваöс. Грездö воöм бöрын пыр жö пондi петкöдлыны кинофильмъяс. Культура керкаöн сiйö кадас веськöдлiс Глафира Николаевна Козлова. Тöдмасим. Сiйö отсавлiс вузавны билетъяс налы, кодъяс волывлiсны сеанс завöдитчöм бöрас.

Ныкымын вой узи кинобудкаын, а сэсся Глафира Николаевна нуöдiс менö квартира вылö аслас баб – Агния Степановна Козлова, ордас. Олöма нывбабакöд ми öдйö воим öти кывйö – гортгöгöрас сылы вöлi колö мужичöй ки. Кöть и вöлi сiйö пöрысь нин, век на видзис мöс.

Быд лун Агния Степановна дорö отсасьны волывлiсны нылыс – Зинаида Фёдоровна Бызова, да внучкаясыс – Глафира да Нина. Грездад, да ещö кöзяйствоад кö эм мöс, уджыд век тырмö: колö пыртны пес, ломтыны пач (кöдзыд кадö кыкысь луннас), лысьтыны мöс, юктöдны-вердны сiйöс, вайны турун.

Менам бать-мам Студенецын век видзлывлiсны мöс и меным дзöлядырсянь вöлi тöдса мöс видзан уджыд. Мыйöн верми, пондi кöзяйкаыдлы отсасьны. А тшöтш и унатор тöдмалi тайö семья йывсьыс.

МУЖИКТöМ КЕРКА

Сьöкыда, вöлöмкö, олöны нёль нывбабаыд. Глафира да Нина водз колисны батьтöгыс. Глафиралы вöлöма куим ар гöгöр, а Ниналы сöмын кык вежаун чужöмсяньыс, кор батьсö – Николай Бызовöс, арестуйтiсны. Сiйö уджавлöма магазинын вузасьысьöн. Ревизия дырйи оз тырмы вузасянторйыс 200 шайт вылö. Таысь сетасны нёль во дзескыдiнын пукавны. Этапöн нуöдасны Вылыс Човйö, сэсянь Ухтаö, кöнi сiйö юöртöг воши. Некод оз тöд, кор кулiс и кытчö дзебöма.

Бур, мый Агния Степановна век видзис мöс. Ачыс, нылыс и внучкаясыс та вöсна некор эз тшыгъявны. Тадзи олiсны и мукöд грездса семьяяс, кодъяс колисны мужичöй киястöг. И пöрысь, и пöрнöй, и челядь уджалiсны шойччытöг лунысь лун, мед перйöны кынöмпöт.

Вояс лэбисны öти бöрся мöд. Кызь арöсöн Зинаида Бызовалöн Глафира нылыс петiс верöс сайö. Верöсыс статя, ён моряк, кодi неважöн демобилизуйтчис Балтийскöй флотысь – Михаил Логинович Козлов. Керкаын лоис мужичöй.

Михаил уджалiс Черноярскöй рейдын катер вылын капитан-механикöн. Катерöн Эжва ю кузя кылöдлывлiс пуръяс Зöвсьöрт посёлокса фанера вöчан комбинатöдз или Котлас (Пырас) карöдз. Но некымын во мысти ва вылын уджыс чинiс. Сэки жö Чёрнöй Ярын восьтiсны «Сельхозтехника» предприятие. Cэтчö вöлi колö\ны шоферъяс и Михаил вежис профессиясö: ветлiс Зеленеч сиктö велöдчыны шопер курсъяс вылö, велöдчöм бöртиыс сылы сетiсны выль «ЗИЛ-130» машина, пондiс уджавны.

Но некод оз тöд водзвыв ассьыс олан туйсö. 1975 вося сентябрь öтикöд лунö Михаил Козлов локтiс гортас удж бöртиыс, сёйыштiс, водiсны узьны. Асывнас ставыс чеччисны, а сiйö эз, видлiсны – кöдзыд, сьöлöмыс узьыгас сувтöма. Глафира колис верöстöг кык челядьöн – Сергей да Женякöд, кодъяс велöдчисны школаын.

УДЖАЧ МОРТЫД БЫДЛАЫН КОЛö

1964 воын Глафира Николаевнаöс мöдöдiсны велöдчыны öкмыс тöлысся курсъяс вылö, кöнi дасьтiсны воспитательясöс детскöй садъясö. 1965 воын сiйöс босьтiсны уджавны «Емдiн» совхозö От грездса детсадйö веськöдлысьöн. Во мысти От «гöра» вылын лоис торъя совхоз – «Коквицкöй». Глафира Николаевна бöр локтiс чужан Оквад грездö и пондiс уджавны грездса детсадйын веськöдлысьöн.

Вит во мысти тэрыб да уджач нывбабаöс пуктiсны веськöдлыны совхозлöн Оквад юкöнöн. Артыштiсны, мый Глафира Козлова бура тöдö став йöзсö, ладмö накöд, сiдзкö вермас уджавны. И збыль, Глафира Николаевна быд уджалысь морт дорö сяммис асногыс матыстчыны: кодöскö пиньыш-тлывлiс, а кодöскö и ошкыштлiс.

Сылöн мамыс, Зинаида Фёдоровна, висьтавлывлiс, мый Глафира быд лун вöлi мунö удж вылас вит час асылын, а бöрсö локтö кöкъямыс рытын. Оквадса отделение совхозын век вöлi бур лыдын. Турун скöтлы заптöм быд во помавлiсны медводз, и эз сöмын совхозса юкöнъяс пöвстын, но и районын.

Грездса войтыр вöлi уджалöны сiдз, медым помавны турун заптöм август мöдöд лунöдз, кор Енлы эскысь христиана пасйöны Илля лун. öбедöдз уджалöны, а сэсся мунöны гортас, мичаö пасьтасьöны и рытланьыс чукöртчöны культура керкаö, собрание вылö. Сэнi пасйöны бура уджалысьясöс, видзöдöны концерт, а сэсся и асьныс гажöдчöны – сьылöны да йöктöны гармошка улö.

ВИКТОР КРУГЛИКОВ.