Кыдзи олан, От "гöра"? (Лыддьöй помсö)

 От «гöраса» сикт-грездъясын важысянь олiсны уджач да писькöс коми войтыр: вöдитiсны видз-му, видзисны скöт, заптiсны вöр, унатор сяммисны вöчны ки могысь.

Победалöн парк

(ЛЫДДЬÖЙ ПОМСÖ)

– Миян районын частöкодь öзйывлöны пывсянъяс, керкаяс… Кыдзи тiян лöсьöдöма уджсö пöжарнöй безопасность кузя?

– Быд сикт-грездын миян эм пöжарнöй водоёмъяс. Тöвъясын туйяссö на дорö век весалам. Кöжмудорын эм пöжарнöй пост. Пöжаръяс дырйи отсöг вылö волывлöны пöжарнöйяс Сыктывдiн районса Слудка сиктысь. Тулыс-гожöмнас нуöдам удж йöзыскöд, мед эз öзтавны кос турун, эз сотны ёг, кöнi оз позь, видзисны пöжаръясысь вöръяс.

– Быд во республиканскöй программа «Народнöй бюджет» пыр Емдiн районын унатор вöчсьö, медым йöзлы вöлi лöсьыдджык овны. Кыдзи тайö уджсö пуктöма Кöжмудор сиктса поселениеын?

– Кольöм во Кöжмудор сиктын ми вöчим «Парк Победы», кодöс сиöма Великöй Отечественнöй вöйна пыр мунöм ветеранъяслы. Таво ми мöвпалам пыртны олöмö куим проект: Туискерöсын вöчам благоустройство километра кузьта туй вылын; Семуково грездын выльмöдам Великöй Отечественнöй вöйна вывса ветеранъяслы памятник и вöчам ремонт «Незабудка» турбазалöн вевт вылын.

– Ёна ö отсалö От «гöраса» войтырлы овны вöр-ва?

– Кодi оз дышöдчы, тшакöн да вотöсöн озыр воясö вермö содтöд бура нажöвитчыны. Дерт, колö техника. Мыш вылад уна тшак-вотöс он кыскав. Чериöн вердöны Эжва ю, тыяс. А вот зверь-пöткаыд вöръясад этша.

– Кодсюрö тiян олысьясысь 2021-2022 воясö элясис кабанъяс вылö – градъяс пö ректректöны. Да и кöинъяс тöвнас волывлiсны. Кыдзи колис 2023 во?

– Кольöм во кабанъяс кыйöм вылö кыйсьысьяс ньöбисны лицензияяс, но, мыйта тöда, ни öти кабанöс эз и кыйны. Кöинъяс тшöтш эз волыны – некод От «гöраса» олысьясысь эз юöрты, мый кодлысь кö сёйисны понсö.

ОТ «ГÖРАСА» сикт-грездъяслöн «зарни» кадыс, тыдалö, мунiс и бöрсö оз нин во. Олысь йöзыс чинö. Социальнöй сфераын кызвыннас уджалöны олöма да шöр арлыда йöз. Ныв-зон мунöны ыджыд сиктъясö да каръясö. Кöжмудорын, шуам, продавецöс магазинö оз вермыны нин корсьны. Мый лоö вит-дас во мысти, некод висьтавны оз вермы. Но мöдам лача кутны, мый коми сиктлы помöдз оз-жö сетны киссьыны.

АЛЕКСАНДР ЛЮТОЕВ.