Ми олам ас му вылын

Унджык сиктса коми йöз öнi быд ногöн кöсйöны вужъясьны каръясö да ыджыд посёлокъясö, но эмöсь и сэтшöм войтыр, кодъяслы сьöлöм вылас лöнь грездса олöм да видз-му овмöсын удж.

Владимир Окулов

На пиысь öти – Владимир Николаевич Окулов. Чужлiс сiйö Туис-Керöс грездын уна челядя семьяын 1971 воын. Сыысь кындзи семьяын быдмисны вок да куим чой. Батьыс тöвъясын пöрöдiс вöр, гожöмнас чукöртiс пуръяс РММ-са производственнöй юкöнын. Мамыс уджалiс «Коквицкöй» совхозса Кöжмудор юкöнса видз-му овмöс бригадаын.

Бать-мамыс дзöлядырсяньыс велöдiсны ныв-пиянсö вöчны гортгöгöрса удж – и керка пытшкын, и град йöрын. Радейтлывлiсны ветлывлыны ныв-зонъяс и вöрö тшак-вотöсла.

ВЕЛÖДЧАН КАД

1978 воын Володя пырис велöдчыны Туис-Керöсса начальнöй школаö, а сэсся помалiс дас класс шöр школаын. Велöдчис кокниа. Быд классын сэки вöлi кызь гöгöр, а то и унджык морт. Зонъяслы ёна кажитчисны НВП, труд, физкультура да трактор велöдан урокъяс.

Сiйö воясö «Коквицкöй» совхозысь школаö вуджис уджавны водзмöстчысь механизатор Александр Туев. Школаын сiйö пондiс велöдны зонъясöс веськöдлыны школьнöй Т-40АМ тракторöн, нуöдны техобслуживание, вöчны ремонт. Школалöн сэки вöлi аслас му йöр – куим гектар, кытчö пуктывлiсны картупель да мукöд градвыв пуктас. Велöдчигас зонъяс грездса войтырлы ытшкыв-лiсны турун, вайлывлiсны ва дорысь да вöрысь пес, видзъяс вылысь турун, град вылысь картупель.

Александр Ильич сяммис öзтыны челядь пытшкын техника да удж дорö радейтöм. Вот и Володя окотапырысь велöдчис вöчны ставсö, мый колö тöдны механизаторлы. Школа помалiгöн аттестаткöд тшöтш выпускникъяслы сетiсны коймöд класса тракторист-машинистъяслысь удостоверение. Аттьö таысь Александр Алексеевич Седрисевлы, районса сельхознадзорса инспекторлы, кодi Туис-Керöсса школакöд да «Коквицкöй» совхозса администрациякöд кутiс топыд йитöд.

Унаöн, кодöс велöдiс Александр Туев, школа бöртиыс пырисны уджавны совхозö. Сiдз жö вöчис и Володя Окулов – сылöн уджалан туйвизьыс пансис «Коквицкöй» совхозын 1988 вося сентябрь 24 лунö. Медводз уджалiс рабочöйöн, а 1989 воын сылы сетiсны ДТ-75 трактор. Трактор вылын Окулов уджалiс арöдзыс, кытчöдз сылы эз во армияö пöвестка.

АРМИЯ

Призывник шедiс Тихоокеанскöй флотö. Быдса вежон том йöз поездöн мунiсны служба местаöдз – Приморскöй крайса Шкотово посёлокöдз. Октябрьын Владимир каис «Новороссийск» корабль вылö, кöнi служитiс пöшти куим во – 1992 вося июнь тö-лысьöдз.

Первойсö вöлi сьöкыд. Штормъяс дырйи корабльсö довйöдлiс öтарö-мöдарö. Велавны колö вöлi и дзескыд кубрикъяс дорö, и тревогаяс дырйи öдйö корсьны ассьыд пост. Куим вонад корабль некымынысь вöлi ылыс походын. Таысь матрос Окуловлы козьна-лiсны «За дальний поход» значок, кодöс век вылö донъявлiсны матросъяс.

БÖР ГОРТÖ

Куим во служитöм бöрын Владимир Окулов бöр воис чужан грездö, От «гöра» вылö. Дыр эз шойччы, регыд и пырис совхозö удж вылö трактористöн. Лун бöрся лун мöдiсны мунны уджалан лунъяс. Кодi уджавлiс видз-му овмöс хöзяйствоын, тöдö, мый сэтшöмыс лоны трактористöн или мöс лысьтысьöн.

Медуна уджыс шедö шоныд кадö. Тулысын колö гöрны-кöдзны да пуктыны картупель. Гожöмын заптыны турун да силос, дöзьöритны картупель да капуста муяс. Грездса войтырлöн вöлi удж, фермаясын видзисны мöс-кукань, быдöнлы воис удждон. Тшöтш уджалiсны посни челядь видза-нiнъяс, школаяс, культура керкаяс. Том войтыр эз тэрмасьны мунны чужан сикт-грездъясысь.

ОЛÖМЫН ВЕЖСЬÖМЪЯС

Кольöм нэмся öкмысдасöд воясын олöмыс пондiс дзугсьыны, и эз сöмын От «гöра» вылын, но став страна пасьтала. «Коквицкöй» совхоз сиптiсны, а сы местаö вöчисны СПК «Кожмудор». Окулов вуджис сэтчö, бара жö трактористöн. Тайö предприятиеыс уджалiс 2003 воöдз, а сэсся и сiйö сиптыссис. Став вöвлöм ыджыд совхозысь колис сöмын МУП «Колос» От грездын.

Передприятиеöн веськöдлысь Валентина Ганова, сылöн отсасьысь Надежда Нефедова да механик Анатолий Нефедов сьöкыдлунъяс вылö видзöдтöг вермисны видзны сiйöс кок вылас: колисны мöс-кукань, тракторъяс, сельхозтехника, пилорама. Некымын дас мортлы колис удж. На лыдын вöлi и Владимир Окулов.

Кык во мысти «Колос» местаö лоис МУП «Заря», кодi уджалiс 2017 воöдз. Январь тöлыссянь уджалысь войтыр вуджисны КФК-ö (крестьянско-фермерскöй хöзяйствоö), кодöн öнi веськöдл Надежда Питиримовна Нефедова. Сiйö висьталiс, мый Владимир Окулов зэв бура видзöдö трактор бöрсяыс, отсасьö удж кузя ёртъясыслы.

УДЖЫД ВИДЗ-МУ ОВМÖСАД ВЕК ТЫРМÖ

Öнi этшаöн нин тöдöны сиктса механизаторыдлысь уджтö, но ме зэв бура тöда и помнита та йылысь. Кор матöстчан трактор вылад, код вылö öшöдöма турун ытшкан агрегат, видз дорö, кодлöн öдва тыдыштö помыс, мöвпалан, мый сы вылысь турун ытшкыны некор он вермы. Но вот кытш бöрся кытш и саридз ыжда видзыд чинö, а сэсся и помассьö. Но тат-шöм выдзыд абу öти.

Медбур турун пуктан кад – гожöмлöн шöр юкöн. Сэк жö медуна петö ном да лöдз. Сöмын сувтöдан трактортö, медым шойччыштны или лöсьöдны кутшöмкö нелючки, найö пыр жö чукöрöн уськöдчöны тэ вылö.

Окулов уна во чöж ытшкывлiс важиник трактор вылас Отса да Туис-Керöсса видзьяс вылысь турун. Медуна уджыс шедлывлiс жар да кос поводдя дырйи. Татшöм кадас кö нюжмасян, бур турун заптыны оз артмы, а сэки и мöскыд тöвнас пондас йöвтö лысьтыны этшаджык и кук-öшкыд ньöжйö-джык быдмас. КФК-лöн ферма вылын öнi видзöны сё гöгöр мöс да кук-öш. Комбикормыд öнi дона и бур туруныд ёна отсалö скöт видзысьяслы.

Турун заптöмсьыд кындзи механизаторыдлöн тырмö и мукöд уджыд: колö быдтыны картупель – пуктыны, чукавны, арнас лэптыны; кыскавны вöрысь кер да пес, видзьяс вылысь турун; тулыснас новлыны куйöд От «гöра» вылын олысь йöзлы.

Важ МТЗ трактор вылын Владимир Николаевич уджалiс сизим во. Сэсся видз-му овмöс министерство отсалiс ньöбны выль трактор МТЗ-82 и пресс-подборщик. Механизатор век бура видзö техникасö, медым сiйö век вöлi дась уджавны.

Тöвнад сиктад механизаторыдлöн уджыд неуна этшаджык: фермаö вайны турун да петкöдны куйöд абу зэв дыр и Владимир Окулов пöшти быд лун ферма вылын отсасьö мöс лысьтысь Наташа нывлы. Ферма вылын öнi 35 мöс, квайтымын сайö кук-öш да ещö вöв. А скöт дорад уджалiгад мужичöй киыд век ковмывлö.

ВАСИЛИЙ КОСТРОМИН.