Медводдза дозмöр

Том дырйи прöст кадö частö ветлывлi вöрö кыйсьыны зверь-пöтка вылö. Кокъяс сэки вöлiны тэрыбöсь, да и кыйдöсыс вöлi уна.

Уна кыйсьöм дерт вунi нин, но медводдза дозмöр кыйöм век на куйлö паметьын. Тайö вöлi важöн нин, 1991 воын. Меным тырис 24 арöс, но вöлi гöтыра нин, семьяын быдмис нёль арöса Настук ныв. Сентябрьын Ёль грездса ёрткöд – öнь Як Толькöд, мöдöд-чим вöрö. Кайим богомолов туй кузя (водзсö сiйö шусис пу туйöн – лежнёвкаöн, рочöн кö) газопроводöдз, а сэсянь мунiм Илья-Шор посёлоклань. Туй вылысь жбыр-книтiс сьöла да пуксис неылö, лыйи – усис.

Арся луныд дженьыд. Мöвпыштiм ёрткöд – чай юам да бергöдчам гортлань. Öзтiм бипур, öшöдiм таган вылö пöрт. Виччысьтöг матöсчис Жулик пон: ме и вунöдi, мый сiйö кöвъясис ме бöрся. Жулик вöлi гончöйöн, но увтöдiс и пöтка – сьöла, тар, дозмöр. Синъясыс öгыр кодьöсь, вöрын пышъялöм бöрын кынöмыс сюмалöма, сёйны корö…
Сетiм, мый вöлi, чай юим и вöрзим гортлань. Торйöдчим: Толик бöр мунiс локтан туйöд, а ме квартальнöй визир кузя. Друг кылi, Жулик пондiс увтны – кöчöс лэптöма. А ме вöлi пöрöм пу кузя шор визь вуджа. Пукси кер вылö, кывзыся, кытчö понйыс кöчсö вöтлö. Мелань локтö!

Виччысьтöг мыш сайысь кодкö гораа бордъяснас шлоп-кöмöн кыпöдчис му вывсьыс. Бергöдчи и джуджыд пожöм вылысь аддзи ыджыдсьыс ыджыд сьöд дозмöрöс – сiйö пукалiс ув вылын да гоньйöдлiс юрнас. Сьöлöмöй пондiс гораа тiпкыны, киясöй тiралöны. Ог тöд – кöчсö виччысьны или дозмöр дорас видлыны матöстчыны.

Тiралан киясöн вежи ружьёысь патрон, матöстчи дозмöр дорö, лыйи. Дозмöр шпорöдчöмöн уси. Но и ыджыд! Менам нопйö весиг эз тöр. Ковмис кöртавны сы дорö да сiдзи нуны гортö. Вои гортö, а сэнi тесть Вöркутаысь гöститны локтöма. Фотографируйтчим. Дозмöрыс Настук нылысь ыджыдджык вöлi.

Дозмöрсö эг мöд куштыны, ньöжйöник кули кусö, вöчи чучело. Сiйö öнöдз на пукалö пожöм ув вылын Ёль грездын бать керкаын.

НИКОЛАЙ ОГНЕВ.