Кыдзи олан, От "гöра"? (Пансьöм)

От «гöраса» сикт-грездъясын важысянь олiсны уджач да писькöс коми войтыр: вöдитiсны видз-му, видзисны скöт, заптiсны вöр, унатор сяммисны вöчны ки могысь.

Дмитрий Турбылев

 Менам пöч бать кузя, кодлöн мамыс вöвлöма Ватоись грездысь (Заречьеысь), век шулывлiс, кор ме юасьлывлi важся (Октябрьскöй революцияöдз) олöм йылысь, мый От «гöраса» войтыр олiсны ёна озырджыка Висдiн грездса олысьясысь. Кöть и Висдiнса войтыр, кодъяс кöсйисны да сяммисны уджавны, сiйö кадас олiсны эз гöля.

Первой мирöвöй да Гражданскöй вöйнаяс дырйи олöмыс сикт-грездъясын дзугсьылiс, но сэсся бöр ладмыштлiс НЭП (новая экономическая политика) дырйи коллективизацияöдз. Кор пон-дiсны котыртны колхозъяс, медъён хöзяйствояс «кулачитiсны» – мырддисны бурджыка олысь крестьяналысь му-видзсö, скöтсö, му вылын уджалан эмбурсö, а кодсюрöлысь и керкаяссö.

Но медсьöкыд кадыс вöлi водзын на. Великöй Отечественнöй вöйна пансьöм бöрын пöшти став мужичöйсö босьтiсны Гöрд армияö. Став уджыс му вылын, фермаясын да вöрын вичмис нывбабаяслы, олöма войтырлы да челядьлы. Олöмыс бöр пондiс бурмыны сöмын 1950-öд воясö.

Воис кад, кор став колхозсö, кодъяс уджалiсны От «гöра» вылын, öтлаöдiсны «Коквицкöй» совхозö. Совхозö пондiс воны быдсикас техника: сельскохозяйственнöй, тракторъяс, автомашинаяс. Öттшöтш лыбисны выль фермаяс, содiс мöс-куклöн лыдыс. 1980-öд вояс помланьыс От «гöра» вылö восис асфальт, Сыктывкарсянь пондiс волывлыны автобус.

1990-öд воясö уна воöн лöсьöдöм оласногыс бара киссис: тупкыссис совхоз, Туискерöсса вöр заптан предприятие юкöн, сиптыссисны кызвын магазиныс, От грездын öкмыс класса школа, социально-культурнöй да мукöд объектъяс. От «гöраса» войтыр кызвыннас разалiсны Коми Республика да Россия пасьтала.

«Öнi 13 сикт-грездын, кодъяс пырöны «Кöжмудор» сиктса поселениеö, артавны кö регистрация кузяыс, олöны 978 морт, – висьталö поселениеöн веськöдлысь Дмитрий Турбылев. – Медйöза Кöжмудор сикт – 297 олысь, да Туискерöс грезд – 184 олысь. Гажакерöс, От (Коквицы), Кырс, Лыаты, Назар, Улыс От (Нижние Коквицы), Семуково, Сюлатуй да Эжолты грездъясын сёысь этшаджык олысь, а Ватоись (Заречье) да Ипа грездъясын – дасысь этшаджык. Гожöмъяснад сикт-грездъясыд, кор сэтчö волывлöны дачникъяс, ёна гажмывлöны. Тöвъяснад гажтöмджык».

  Семуковоын дзöля архитектурнöй форма

– Дмитрий Иванович, мунiм машинаöн некымын сикт-грезд пыр – туйяс быдлаын бура весалöма, а Отйын весиг потшöс сувтöдöма, медым туйсö оз тырт лымйöн турöбъяс дырйи. Кодi тiян тадзи весалö туйястö да видзöдö на бöрся?

– Республиканскöй туйяс лымйысь весалö Айкатыласа ДРСУч, а мукöдсö – ООО «СеверПлюс» предприятие. Тайö предприятиеыс, кодöн веськöдлö Василий Иванович Козлов, От «гöра» вылын медыджыд. Сэнi уджалöны 17 морт: заптöны пес, пилитöны вöр брус да пöв вылö, весалöны лымйысь муниципальнöй туйяс, новлöдлöны йöзöс. Уджсö ассьыныс тöдöны бура. Лымъялöм бöрын петöны весавны туйяс вит-квайт час асылын: медводз весалöны туйяссö школьнöй маршрутъяс вылысь, бöрас мукöдсö. Öт-тшöтш весалöны и пöжарнöй водоёмъяс дорö матыстчанiнъяс. И потшöссö От грездын найö сувтöдiсны асьныс, медым кокньöдны тöвся уджсö, видзны туйсö толöмысь.

– Кутшöм ещö предприятиеяс уджалöны От «гöра» вылын?

– Миян эм кык крестьянско-фермерскöй хöзяйство – Надежда Питиримовна Нефёдовалöн да Алексей Иванович Ростовлöн. Надежда Нефёдова видзö мöс, быдтö кук-öш – ставыс 101 юр. Алексей Ростов яй вылö видзö некымын öш, ыжъясöс, быдтö картупель, сiдз жö сылöн эм кык магазин – Кöжмудорын да Туискерöсын. Вот миян и став производство – уджыс абу, да и уджалысьыс тшöтш зэв этша.

– Водзсö быд ыджыдджык грездын вöлi магазин, а то и эз öти. Кодi öнi тiян вузасьö?

– Вузасьöны кык предприниматель: Наталья Сизева – сылöн кык магазин Кöжмудорын и öти Отйын, и Алексей Ростов – сы йылысь висьталi нин водзджык. Миян абу магазинъяс Семуково да Лыаты грездъяс вожын. Водзсö сэтчö ветлывлiсны вузасьны машина вылын, но йöзыслы окота öнi тöвартö бöрйыны аслыныс. А предпринимательлы колö выручка. Сы вöсна найö öнi ужалöны сöмын заказъяс кузя – вайöны сiйöс, мый йöзыс корисны. Лыаты вожö ветлывлö Ростов, Семуковолань – Сизева. Позьö шуны, мый миян дасьтöма доставка, кыдзи и каръясын.

– Кыдзи олö бюджетнöй сфера – образование, здравоохранение, культура?

– Кöжмудорын миян школа и фельдшерско-акушерскöй пункт. Кыкнаныс выль стрöйбаясын. Кор пондiсны лэптыны школа, велöдчысьыс миян вöлi уна на. Сы вöсна школаыс проект кузя арталöма 260 морт вылö. Лэптiсны школасö дыр – быдса кöкъямыс во. Öнi школаын велöдчысьыс сöмын 44 морт, да детсадйö, кодi тшöтш школа стрöйбаын, ветлöдлö нёль морт.

Велöдысьыс кызвыннас олöма да шöр арлыда йöз. Иностраннöй кыв (немецкöй) велöдысь – Сергей Николаевич Туркин, кор эм Эжва вомöн йи кузя туй, волывлö Емдiн сиктсянь. Мукöд кадас велöдö челядьöс Интернет пыр.

Фельдшерско-акушерскöй пунктын миян уджалöны куим фельдшер, кыкыс на пиысь сiдз жö шöр арлыда йöз, да пинь бурдöдысь врач Татьяна Яранова. Выльлунö, средаö да пятница Яранова уджалö танi, вторникö да четвергö – Емдiнын. Сы дорö пинь бурдöдны волывлöны оз сöмын миян сикт-грездъясысь, но и Айкатылаысь, орчча Сыктывдiн районысь.

Скорöй помощь машина öнi миян выль, фельдшеръяслы воöдчыны висьысь войтыр дорö лоис кокньыджык.

А вот культура керка Кöжмудорын миян важ зданиеын, ньöжйöник киссьö. Колö лэптыны выльöс. Районнöй администрацияын висьталiсны, мый медводз лэптасны выль культура керка Студенец посёлокын, а сэсся сiйö жö проект кузя Кöжмудорын. Мöдам виччысьны.

– Аддзылiм, мый Кöжмудорын лэптöны кык уна квартираа выль керка. Кодлы найö?

– Миян Кöжмудорын эм кык судтаа кык пу керка и ещö öти сэтшöм жö Туискерöсын. Керкаясыс важöсь нин, та вöсна найöс пыртiсны аварийнöй лыдö и 24 семья колö вуджöдны выль оланiнö. Йöзыс асьныс бöрйисны, кöнi кöсйöны овны – Зöвсьöртын, Микуньын, Айкатылаын или Кöжмудорын. Зöвсьöртö мунны некод эз кöсйы. Микуньö мöвпыштiсны вуджны куим семья, Айкатылаö – 11 семья, öстальнöйыс кольччöны Кöжмудорö.

Быд квартираö ывласянь лоö торъя пыранiн, быд квартираын автономнöй отопление, торъя котельнöй. Котёлъяс универсальнöйöсь – уджалöны и пес, и электроэнергия вылын. Жаль, мый миян абу биа ру – сiйö бы ёна кокньöдiс квартираясö да социальнöй объектъясö шоныд сетöм.

(ЛОÖ ВОДЗЫН)

АЛЕКСАНДР ЛЮТОЕВ.