Регыд корабль вылö

Кöдзыд Еджыд саридз дорын сулалö Северодвинск кар, код бердын эм Войвыв флотлöн база.

Уна коми зон нуис матрослысь служба Россиялöн войвыв муяс вылын: кодкö веськалiс корабль вылö, мукöдыс – морскöй пехотаын.

Некымын кыв тайö база йывсьысь. Водзсö Северодвинск вöлi шусьö Молотовск карöн, базасö сэнi пондiсны лэптыны 1940-öд вося юльын, а август тöлыссянь сiйöс мöдiсны шуны Беломорскöй военно-морскöй базаöн. Сэтчö пырисны частьяс да учреждениеяс, кодъяс дислоцируйтчисны Еджыд саридзлöн берегъяс вылын.

База лöсьöдöмлы помкаыс лоис сэк, кор 1938-öд воын Молотовск кар бердын пондiсны лэптыны корабльяс стрöйтан да вочан завод. Öнi база водзын сулалöны сэтшöм могъяс: нуöдны атомнöй подлодкаяслысь испытание, видзны Еджыд саридзлысь акватория Баренц саридз дорöдз.

Став воддза призывъясса матросъяс служба помалöм бöрын дзоньвидзаöн бöр воисны чужан сикт-грездö. Некымын матрос, кодi помавлiс Кöжмудор сиктса школа, кольччылiсны служитны контракт кузя.

Талун ме кöсъя тöдмöдны тiянöс Давпи грездса том морткöд – Алексей Политовкöд. Кыдзи и мукöд зонка, Лёша быдмис грезд дорын сулалысь вöр-ва бердын. Паськыд лудъяс, мича Эжов ты да пожöма ягъяс кыскисны зонпосниöс ас бердас. Зонка ёртъясыскöд öтлаын ичöтысянь котралiс кыйны чери, öктыны тшак-вотöс матысса ягъясысь.

Бать-мамыс видзисны мöс-кукань, быдтiсны градвыв пуктас. И кыдз быд грездса челядь, Лешалы да Лида чойыслы ковмывлiс отсасьны и турун пуктыны, и градвыв пуктас урожай идравны, и пес поткöдлыны да тэчны. Бать-мамыс велöдiсны пи-нывсö вöчны быдсикас гортгöгöр удж.

Велöдчыны Лёша пырис Туис-Керöсса школаö, а помалiс школасö Кöжмудорын. Велöдчис шöркодя, вывтi эз ышмы, ёртъясыскöд ладмис, но ёнджыкасö ёртасис Яша воча вокыскöд. Эз öтдортчы внекласснöй уджысь, вермасис школаса соревнованиеяс вылын. Тöдлытöг колины велöдчан вояс. Школа помалöм бöрын зон пырис Эжваса целлюлозно-бумажнöй техникумö. Техникум помалöм бöрын уджыштiс, а 2021-öд вося арын сылы воис пöвестка. Военкоматса призывнöй комиссия мöдöдiс зонcö Войвыв флотö. Алексей веськалiс Северодвинск карса учебнöй подразделениеö, кöнi сiйöс велöдöны трюмнöй механик профессияö. Учебкасö помалöм бöрын том мортöс мöдöдасны служитны корабль вылö.

Окота висьтавны некымын кыв Алексейлöн бать-мам йывсьыс. Батьыс, Николай Михайлович, Сöветскöй армияын служитис 1985-1987-öд воясö Кемерово кар бердын, ВОСО частьын, колльöдлывлiс секретнöй вöеннöй грузъяс, кодöс нуисны кöрт туй кузя. Демобилизуйтчис сержант чинын. Армия бöрас пырис уджавны «Коквицкöй» совхозö трактористöн.

Мамыс, Валентина Валериановна, коми поэт Евгений Козловлöн чойыс, школа помалöм бöрын велöдчис Кировскöй сельскохозяйственнöй институтын ветеринар вылö, 1996-öд воöдз уджалiс совхозын, а сэсся вуджис сиктсöветö. Öнi уджалö соцработникöн.

Лида чойыс педучилище помалöм бöрын уджалö Эжваса детскöй садйын.

Николай да Валентина Политовъяс лэптылiсны ассьыныс керка, талунъя лунöдз видзöны гортса пемосъясöс, быдтöны-дöзьöритöны градвыв пуктас. Николай Михайлович кыйö чери, пес да вöр заптö. Гожöм-арын став семьянас чукöртöны вöрса козинъяс. Олöны öтсöгласöн да ёрта-ёртсö пыдди пуктöмöн.

Алексейлöн джын служитан кадыс коли бöрö. Регыд помассяс учебка, а сэсся завöдитчас корабль вылын матрослöн служба. Коми мортыд некор эз повлывлы сьöкыдлунъясысь, пыр кужлiс венны ставсö. Сиам зонлы бура помавны службасö да ас кадö воны чужанiнö.

ВАСИЛИЙ КОСТРОМИН.