И сизимдасад олöмыд оз эшты

Висдiн грездса олысь Вера Васильевна Колядич колян тöлысьса ноябрь 30 лунö пасйис 70 во тырöм.

Мамыс Вера Васильевналöн сiдз жö чужлöма Висдiнын, уна челядя семьяын. Вераöс быдтасны мамыс да бабыс, оласны баб керкаас.

«Кыдзи помнита, керкаас баблöн вöлiны ыджыд пач, пызан, лабичьяс, – казьтылö Вера Васильевна. – Мам пыр уджалiс: уна во совхозын лысьтiс мöс, новлöдлiс йöвсö мöс вый вöчан заводö телега или вöв додь вылын.

Баб да мам век видзисны уна гортса пемöс – мöс, кукань, ыж, курöгъясöс. Град вылы быдмисны картупель, капуста, свеклö, ид, рудзöг. Пызан вылын век вöлi небыд нянь, яй, йöв, рысь, кольк. Тшыглы некор эг овлöй. Баб да мам, мый сяммисны вöчны асьныс, велöдiсны и менö».

Вералöн воис велöдчан кад. 1960-öд воясö коми грездъясын олöмыс бурмис, но уджыс век вöлi зэв уна и челядьлы ковмылiс отсасьны верстьö войтырлы: горт гöгöрын, градъяс вылын, гожöмъяснас гырысьджык челядь видзьяс вылын отсалiсы заптыны турун – куртiсны, кыскалiсны юръяс. И школаын вöлi градйöр, кытчö пуктывлiсны моров, гöрд свеклö, капуста, мукöд градвыв пуктас. Сэнi колö вöлi нетшкыны ёг, киськасьны.

Гожöмнас да арнас грездса олысьяс ветлывлiсны вöрö öктыны косьтан да солалан тшак, мырпом, чöд, чöдлас, бур пув, трипув. Ставсö тайöс заптывлiсны кузь тöв кежлö, медым чöсмасьны кöдзыд кадö гожся козинъясöн.

Но кадыс челядьлы тырмывлiс эз сöмын отсасьны верстьö йöзлы, но и гожъявны, и пöттöдз купайтчыны, и культура керкаö ветлыны кино вылö или йöктыны-гажöдчыны.

Вера помалiс чужан грездын кöкъямыс класса школа да пырис велöдчыны Сыктывкарса видз-му овмöс техникумö. Но велöдчис сэнi сöмын öти во – петiс верöс сайö. Верöсыскöд мунiсны овны Украинаö – сэнi вöлi лöсьыд, некодöс эз дескöдны, но Колядич гозъялöн эз вöв асланыс оланiныс. Куим во мысти Вера верöсыскöд да чужöм кагаыскöд бöр воисны гортас – Коми муö.

Вужъясисны Микунь карö. Вералöн верöсыс пырис уджавны войскöвöй частьö, кöнi прапорщикöн служитiс 32 во. Прöст кадö радейтiс ветлывлыны вöр-ваö, кыйис чери да зверь-пöтка. Гозъя олiсны öтлаын 45 во, быдтiсны кык пиöс да öти нылöс.

Вера Васильевна пырис уджавны кöрт туй вылö, мырсис сэнi 22 во. Дыр уджалiс ревизорöн пассажирскöй поездъясын. Ковмывлiс дыр кежлö мунлывлыны гортсьыс, кольлыны челядьсö öтнанысö.

Öнi Вера Васильевна пенсия вылын. Челядьыс паськöдчисны Россия пасьтала, но мамсö оз вунöдны. Найö козьналiсны квайт внук, чужисны нин и кык правнук. Пенсия вылö петöм бöрын Вера Колядич бöр овмöдчис чужан Висдiн грездас. Ньöбис важиник керка, лöсьöдiс сiйöс.

Но пöрысь баб моз сiйö оз пукав гортас: öдйö пырöдчис грездса ветеранскöй организациялöн уджö, отсасьö лöсьöдны праздникъяс, пöдругаясыскöд ветлывлö быдсикас спортивнöй вермасьöм да квест-ворсöмъяс вылö, сцена вывсянь сьылö радейтана сьыланкывъяссö. Висдiн грездса олöма нывбабаяс ветлiсны нин «Тöвся ворсöмъяс» да мукöд мероприятиеяс вылö Арабач грездö, Гам сиктö, Лесобазаö. Висдiнса аньясöс унаысь нин петкöдлiсны «Юрган» телеканал кузя.

Грездса ветеранъяс öнi лöсьöдчöны выль во кежлö – колö сiйöс гажаа воччаавны, медым локтан 2023 воыс вайис сöмын буртор. А Вера Васильевнаöс став сьöлöмсянь чолöмала тöдчана олöм пасöн! Ыджыд аттьö тiянлы лышкыд ловысь, водзмöстчöмысь, уна вося бур уджысь!

ТАТЬЯНА МАЛАФЕЕВА.