Эм сэтшöм удж

ХХ-öд и öнiя ХХI-öд нэмын миян странаса пöшти быд мужичöй поколениелы ковмывлiс оружие отсöгöн дорйыны чужан му или Россиялысь государственнöй интересъяс.

Роман Прошев

Контракт кузя Коми Республикаысь унаöн служитiсны или öнi служитöны Российскöй армияын. На лыдын и От «гöраса» том йöз: Сергей Козлов срочнöй бöрти кык во служитiс контракт кузя, Юрий Ненин служитiс морскöй пехотаын Мурманскöй областьын, Эжолты грездысь Андрей Прошев – погранвойскаын, От грездысь Иван Коннин да ещö некымын морт. Öнi контракт кузя служитö Лыаты грездса том морт Роман Прошев.

Роман помалiс Кöжмудорса шöр школа 2018 воын. Челядь лыдыс классас, кöнi сiйö велöдчис, вöлi этша. Но классын велöдчысьяс вöлiны бур ёртъясöн, пырöдчисны быд школьнöй да спортивнöй мероприятиеö. Унатор велöдчысьясöс öтувтöм могысь вöчис классöн веськöдлысь учитель Ирина Васильевна Одинцова. Велöдчысьяс, тшöтш и Роман, гожöмнас уджалiсны школьнöй бригадаын, бура петкöдлiсны асьнысö «Юный защитник Отечества» районнöй ордйысьöмъяс вылын.

Школа помалöм бöрын Роман Прошев пырис велöдчыны Сыктывкарса автомеханическöй техникумö, слесарь по ремонту и обслуживанию автомобилей категории «С» специальность вылö. Армияö сiйöс босьтiсны 2022 вося ноябрь 30-öд лунö Сыктывкарса военкомат пыр. Служитiс Ленинградскöй областьын, Всеволжскöй районын, 53167-«У» подразделениеын, кодi пырö Балтийскöй флотö. Служба помассьöм бöрын, 2023 воын, кырымалiс контракт кык во кежлö.

Романлöн вöеннöй специальность – электрик-дизелист электротехнического отделения. Сыкöд öти подразделениеын Комиысь служитöны квайт морт. Контрактникъяслы вичмöдiсны служебнöй оланiн, бура вердöны, сетöны обмундирование. Контрактникъясöс специальность кузя быдöнöс водзö велöдöны, сöвмöдöны да ёнмöдöны физически, нуöдлывлöны стрельбище да соревнованиеяс вылö. Роман Васильевич вöлi командировкаын СВО вылын. Сы бöрын сылы сетiсны статус «Ветеран боевых действий».

2024-öд вося февральын Роман Прошев öтлаасис Кулöмдiн районысь Татьяна нывкöд, кодкöд важысянь нин тöдса. Гöтырыс велöдчö Сыктывкарса государственнöй университетын учитель начальных классов вылö, кор эм кадыс – ветлывлö верöс дорас. Öтпускъясö Роман волывлö Сыктывкарö.

ВАСИЛИЙ КОСТРОМИН.