Чужан му дорйысьяс

От гöра вылысь Великöй Отечественнöй вöйна дырйи фронт вылö мобилизуйтiсны 1287 мортöс, на пиысь 643-ыс гортас бöрсö эз воны.

Туис-Керöс грездысь Ай му дорйыны мунiсны 127 морт, 22-ыс на пиысь веськалiсны Ленинградскöй, Волховскöй да Рытыв-Войвыв фронтъяс вылö. Усины да юöртöг вошины 77 салдат да матрос, чужанiнас бöр воисны сöмын 50 морт.

Кöжмудорса шöр школаса велöдчысьяс класснöй руководитель Татьяна Васильевна Бызова юрнуöдöм улын чукöртiсны тöдöмлунъяс Дионисий Николаевич Ненин йылысь, кодi вöйна дырйи тышкасьлöма фашистъяскöд ССС-лöн рытыв-войвылын – Волховскöй да Ленинградскöй фронтъяс вылын.

Дионисий Ненин чужлiс 1923 вося май 23-öд лунö Туис-Керöс грездын крестьянскöй семьяын. 1930 воын пырис велöдчыны Туис-Керöсса начальнöй школаö, а сэсся помалiс сизим класса От сиктса школа. Школа бöрын пырис уджавны колхозö. Вöйна пансьöм йылысь висьталiсны удж вылас. Став верстьö йöзсö чукöртiсны клубö, митинг вылö, юöртiсны, мый Германия июнь 22-öд лунö уськöдчис СССР вылö. Дионисийлы сiйö кадас сöмын на тырис 18 арöс.

Мобилизуйтiсны Дионисий Ненинöс 1942 вося март тöлысьын. Кык тöлысь призывникъясöс велöдiсны Вöлöгда карын 391-öд запаснöй стрелковöй полкын. Та бöрын мöдöдiсны Волховскöй фронт вылö. Вöрöгкöд тышкасис 70-öд гвардейскöй полкын. Сiйöс кыкысь ранитлiсны: 1942 вося июльын бурдöдчис медсанбатын, а сентябрьын кык тöлысь гöгöр куйлiс Вöлöгда областьса Вожöга посёлокса госпитальын.

Бурдöм бöрын Дионисий Николаевичöс мöдöдiсны велöдчыны Кардорса вöеннöй округлöн комсостав дасьтан школаö. Велöдчис сэнi öкмыс тöлысь Кардор карса Соломбала районын. Курсъяс помалöм бöрын сылы сетiсны младшей лейтенант звание и мöдöдiсны командуйтны взводöн 72-öд дивизияса 14-öд стрелковöй полкö.

Ладога ты вуджисны йи кузя. Пöшти став 36 километр туйсö ковмис мунны немецкöй самолётъяслöн би улын. 72-öд дивизия сулалiс Колпино кар дорын. Дионисийöс сэнi бара ранитiсны. Бурдöдчис Ленинград карса госпитальын. Бурдöм бöрын сiйöс мöдöдiсны командуйтны взводöн 45-öд Ленин ордена Краснознамённöй гвардейскöй стрелковöй дивизияö, кöнi сiйö вöюйтiс 1944 вося январь тöлысьöдз.

1944 вося январь 14-öд лунö завöдитчис генеральнöй наступление Ленинград гöгöр блокада ставнас орöдöм могысь. Артиллерия кык час дугдывтöг лыйлiс немецкöй позицияяс кузя. 72-öд дивизия Пулковскöй мылькъяссянь наступайтiс Гатчино карлань. Лун и вой дугдывтöг мунiс чорыд тыш. Противник бура дасьтысис Гöрд армиялöн наступление кежлö – лöсьöдiс нёль визь оборона: окопъяс, траншеяяс, дотъяс, дзотъяс, кöнi сулалiсны пулемётъяс да пушкаяс.

Писькöдчыны татшöм оборона пыр вöлi зэв сьöкыд. И век жö танкъяс да пехота путкыльтiсны противниксö, враг мöдiс бöрынтчыны, но пышйигас разис да сотiс ставсö, мый вевъялiс и вермис. Сiдз, Красная Горка сиктын, кöнi вöйнаöдз вöлöма 530 хöзяйство, абу кольöма ни öти дзонь керка. Тайö сиктсö врагысь весалiс 72-öд дивизия.

Чорыд тышъяс пыр ковмис мунны и Дионисий Николаевичлы аслас взводыскöд. Уна салдат да офицер усисны да ранитчисны. Сьöкыд ранение, тшöт кузя нёльöд нин, шедiс и Ненинлы. Бурдöдчис Ленинградса госпитальын, сэсся сiйöс вуджöдiсны Пермь карса госпитальö, кöнi бурдöдчис 1944 вося июль тöлысьöдз.  

Бурдöм бöрти фронтовикöс комиссуйтiсны, сетiсны мöдöд группа инвалидность и сiйö воис гортас, чужан грездö. Корiсны уджавны Туис-Керöсса школаö военрукöн. Некымын во велöдiс челядьöс, а сэсся вуджис уджавны Туис-Керöсса РММ-ö мастерöн, кöнi и мырсис пенсияöдзыс.   

Öтпыр предприятиелöн территория вылын лоис пöжар – öзйис конюшня, кöнi вöлi некымын вöв. Фронтовик эз повзьы биысь, восьтiс öдзöссö да петкöдiс вöвъяссö ывла вылö. Öти вöлöс вöлi шуöны Орликöн. Сы отсöгöн РММ-са уджалысьяс гöрлывлiсны картупель муяс, петкöдлывлiсны куйöд да вöчлывлiсны уна мукöд удж.

Дионисий Николаевич сяммис вöчны пачьяс. Туис-Керöсын öнöдз на эмöсь керкаяс, кöнi сулалöны сы киöн вöчöм пачьяс, шонтöны керкаын олысь йöзöс да пöжалöны уна пöлöс чöскыд пöжас.

Госпитальысь гортö воöм бöрын Дионисий недыр мысти тöдмасис Пятордын олысь Капитолина нывкöд, кодi öзтiс фронтовиклысь сьöлöмсö. Ворсiсны кöлысь. Ненинордын лэптiсны керка, кодi и öнi на зумыда сулалö. Быдтiсны вит пиöс да Нина нылöс.

Артмис сiдз, мый Дионисий Николаевич Капитолина гöтырыскöд лоины мэнам баб, Манефа Степановна пыр, рöдвужöн, а налöн шöркост пиыс – Миша, менам одноклассник. Унаысь ме вöлi Ненинъяслöн керкаын, пукавлi ветеранкöд öти пызан сайын, пывсьывлi… Ас синмöн аддзылi сылöн туша вылысь рубецъяс, кодъяс кольöмаöсь ранениеяс бöрын. Сылöн медся радейтана сьыланкывйыс вöлi «Землянка». Тыдалö паметяс чорыда вöлi йиджтысьöма землянкаясын тышъяс коласын шойччöм-шонтысьöмыс.

Öнi мукöд дырйи мöвпавлывла, мыйта терпение, дой венöм вöлöма сiйö кадся войтырлöн – найö мунiсны зэв сьöкыд вöйна пыр, тшыгъялiсны, кынмисны, усьтöдзыс уджалiсны. Кодi китöм, кодi коктöм лöсьöдiсны семьяяс, лэптiсны керкаяс, видзисны гортса пемöсъясöс, чужтiсны-быдтiсны ныв-пиöс…

Школаын ме пондi уджаны 1982 воын военрукöн, трактор устройство да вождение велöдысьöн. Мужество урокъяс вылö корлывлiм вöйна вывса ветеранъясöс. Помнита сiйö кадся Победа лун пасйöм. Совхозса автобусöн урчитöм кадö памятник дорö вайöдлывлiсны ветеранъясöс От гöра грездъясысь. Митинг да неыджыд концерт бöрын найöс чукöртлывлiсны школьнöй столовöйö, праздничнöй пызан сайö. Фронтовикыс вöлi уна: кодi дзор, кодi ки пöла или протез вылын, уналöн чужöм вылас вöлiны шрамъяс. Быдöнлöн морöсас дзирдалiсны наградаяс. Кодсюрö вöлiны фронтöвöй гимнастёркааöсь, погонаöсь.

Дионисий Ненинлöн сiдз жö вöлiны наградаяс: орден Отечественной войны II степени, медальяс «За оборону Ленинграда», «За победу над Германией», «20 лет Победы в Великой Отечественной войне», «За доблестный труд и в ознаменование 100-летия со дня рождения В.И.Ленина», «25 лет Победы в Великой Отечественной войне», бур уджысь козьнавлöмаöсь морöс пасъяс – «Ударник» да «Победитель социалистического соревнования», грамотаяс.

Вöйна вылö босьтлiсны и Дионисийлысь батьсö – Николай Ильич Ненинöс. Сiйö служитiс 192-öд инженернöй батальонын, усис 1943 вося февраль 10-öд лунö. Похоронкаыс волiс гöтырыслы, Юлия Ивановналы.

Вöйна вывса ветеранъясысь От гöра вылын öнi некод нин эз кольны, да и олысьыс сикт-грездъясас воысь во чинö. Победа лунö обелискъяс дорö волывлöны сöмын некымын дас морт.

Дионисий Николаевич Ненин кувсис 1988 вося ноябрь 12-öд лунö. Сылы вöлi сöмын 65 арöс. 

ВАСИЛИЙ КОСТРОМИН.