Чупыр ю

Аквад грезд дортi важöн визувтлiс неыджыд Чупыр ю, но 1970-öд воясö мелеораторъяс кодйисны сылы выль туй.

Вöрса ю вайлiс Аквад дорса Чупыр, Сьöд, Марпа, Вичко да Турка вадъясö сöстöм ва и сэнi бура овлiс уна пöлöс чери. Вадъяс да ачыс юыс вердлiсны чериöн Аквадса войтырöс. Но 1970-öд воясö кутшöмкö чина мортлы юрас воöма мöвп косьтыны вад костъясысь да ю дорсьысь васöд видзьяссö, медым на вылын бура вермис уджавны турун заптан техника.

Емдiн районаса ПМК вына трактор-экскаваторъясöн кодйис канаваяс, а Чупыр юсьыс васö веськыда лэдзисны Эжва юö. Вадъясын бырис гырысь чери, öнi найö öдйö турунсялöны, гожöм-тöвнас ёна ямöны. Кор на вöлi совхоз, сылöн Аквад юкöнын уджалысь войтыр бöр кöсйисны бергöдны юсö: бульдозер отсöгöн сиптiсны выль руслосö, но тулыснас мусö нуис и Чупыр ю важ туй визьтiыс визувтнысö эз нин мöд. Гашкö ещö и сы вöсна, мый ваыслöн важ туйыс сэк кежлö тырис нин турунöн да пу-роскöн.

Мыйла ме та йылысь гижи? А сы вöсна, мый вöр-валысь да и странаса войтырлысь оласногсö вежöм водзвылын колö ёна мöвпавны, мыйöдз тайö вермас вайöдны.

ИВАН БАЖЕНОВ.