Бурыс бурöн бöр воö ворон

Вöр-ваын олысь звер-пöткаöс кö он повзьöдлы да кедзовт, найö дугдöны повны мортысь и весиг вермöны гажöдны сылысь олöмсö, а то и сетны отсöг.

Коркö телевизор пыр петкöдлiсны зоопаркын олысь кырнышöс, кодöс велöдöмаöсь шуавны торъя кывъяс. И юрö пыр жö воисны казьтылöмъяс кырныш йылысь, кодi важöн öти кадö олiс Студенец посёлокын.

Доймöм лэбачсö аддзöма Дуся баб, кодi вöлi олö «Полёт» магазин сайын. Кырнышлöн вöлöм доймöмаöсь бордъясыс. Нывбаба бурдöдас лэбачтö, а кор сiйö ёнмас, лэдзас вöля вылö. И мый тi мöвпаланныд – кырнышыд ылö оз лэб: вöчас некымын кытш керка гöгöрыс, и бöр гортас.

Кутшöмкö кад мысти сiйö пондiс паськöдны лэбалан кытшъяссö, корсьны содтöд сёян посёлоксьыс. Йöз дорö велалiс сiдз, мы мукöдыслы пондiс пуксьыны пельпом или нюжöдöм ки вылас, виччысьны, кор сiйöс вердасны. А он кö нинöм сет, вермö вöлi и пинявны.

Йöзыс шуисны сiйöс Яшаöн, велалiсны сы дорö, волывлiсны магазин дорö, медым вердыштны сiйöс. Пондiс кырнышыс волывлыны и миян керка дорö, пуксьö вöлi и ки вылад. Сылы сетлывлiм нянь, картупель, чери, рысь… Лэбачыд гöгöрвоö жö чöскыдтö и частöджык волывлiс сэтчö, кöнi бурджыка вердлывлiсны. Но сэсся кырнышыд воши. Вöлi сёрнитöны – кодкö пö лыйöма. А мыйысь – некод висьтавны эз вермы, кырныштö вöд гулю мозыд оз сёйны.

Некымын во мысти град йöрö пондiсны волывлыны руд рака гозъя. Мöдi найöс вердлывлыны. Тулыснас, аддза, пондiсны пу рос да турун кыскавны – поз, тыдалö, вöчисны. Кор рака гозъялöн ныв-пиыс лыбисны борд вылас, пондiсны волывлыны öтчукöрöн миян йöрö.

Сiйö кадас горт дорö быд во кöдзлывлiм ид да зöр сора анькытш. Арланьыс – он кö вевъяв ас кадö чукöртны урожайтö, воöм зöр-анькытш да ид вылад пыр вöлi уськöдчывлöны гулю чукöръяс. А сiйö воас, кор быд лун пондiс волывлыны рака семья, гулюясыд волывлысны ёна гежöдджыка – рака бать-мамыс вöлi найöс вöтлöны ныв-пи дорсьыс. И урожайыд миян град вылад воис зэв бура.

Менам внук Женя Кузьмин уджалö Емдiн станция вылын. Сэтчö пондiс волывлыны руч. Морт дорö велалiс сэтчöдз, мый нянь тортö пондiс босьтны кисьыд.

Бурöн кö матöстчыны вöр-ваын олысь звер-пöтка дорö, и найö вöчасны тэныд буртор или гажöдасны сьöлöм-ловтö. Некор эн вунöдöй та йылысь!

ВИКТОР КРУГЛИКОВ.