Архив новостей
понвтрсрдчетпятсубвск
    123
45678910
11121314151617
18192021222324
25262728293031
       

Главная Кроме того Чуймöдана выльторъяс

Чуймöдана выльторъяс

26 января 2022

Кольöм нэмся ветымынöд воясö весиг посни коми грездъясöдз воисны радио на электричество, мый ёна чуймöдлiс сэнi олысь войтырöс.

Дас во колис Германиякöд ыджыд тыш помассьöмсянь. Организацияясын май 9-öд лунö пондiсны нуöдны чукöртчöмъяс, кöнi сёрнитiсны сы йылысь, мый артмис вöчны и кутшöм могъяс сулалöны водзын. Татшöм чукöртчöм нуöдiсны и Емдiн районса связистъяс.

Районын связистъясöн сэки веськöдлiс Калиса Николаевна Нефёдова. Сiйö ошкыштiс бура уджалысьясöс, пиньыштiс дышджыкъясöс, а сэсся шыöдчис чукöртчöм войтыр дорö: «Вай босьтам социалистическöй обязательство вося уджалан план тыртны Сталинскöй конституция – декабрь 5-öд лун кежлö».

Мужичöйясысь кодсюрö броткыштiсны – ог пö вевъялöй. Но друг кок вылас сувтiс Володя Тырин, Вогваздино грездса монтёр: «Вай ог мöдöй зыксьыны, а пуктам ас водзö ыджыдджык мог – вося план тыртны Великöй Октябрьскöй революциялöн ноябрь 7-öд лун кежлö».

Ставöн ланьтiсны, быттьö вом тырыс ва босьтiсны. «Но, мый ланьтiнныд, – водзö гораа нуöдiс сёрнисö том монтёр. – Абу сöгласенöсь!» «Вай гöлöсуйтам!» – кылiс залысь некымын гöлöс. Гöлöсуйтiсны – ставыс лэптiсны кияснысö. Та вылын чукöртчöм и помассис.

Вогваздино грезд пырыс сэки мунiсны телефоннöй да радио магистральнöй линияяс Cыктывкарсянь Айкатылаö да Княжпогостö. Медым сёрниыс бура кылiс, вöлi сувтöдöма усилительнöй пункт (УП). Монтёръясöн тайö грездас уджалiсны куим Тырин – Павел, Володя да Веня. Веськöдлiс бригадаöн Павел Тырин.

Студенец посёлокын сэки вöлi Коквицкöй лесопунктлöн шöр юкöныс, веськöдлiс лесопунктöн Всеволод Порсюров. Сы дорö и матöстчисны Тыринъясыд. Всеволод Леонидович радпырысь сёрнитiс монтёръяскöд – сылы вöлi ки выв вуджöдны лесопункт баланс вылысь радио линиясö связистъяслы: асланыс монтёръяс лесопунктын эз вöвны, а линияяс бöрся колö вöлi век видзöдны. Порсюров кöсйысис лöсьöдны сюръяяс и разöдны найöс мир туй бокö Студенецсянь Вогваздиноöдз – тайö квайт километра гöгöр.

Гожöм быд Тыринъясыд мырсисны: кодйысны гуяс сюръяяс улö, сувтöдлiсны найöс, а бöрнас и проводтö нюжöдiсны. Корсюрö начальство отсöг вылö мöдöдлывлiс Емдiн сиктса монтёрöс – Николай Быковöс. Суденецö вайисны понижающöй трансформатор, пуктiсны, йитiсны выль линия дорö посёлоклысь радио линиясö. Ыджыд удж лои вöчöма, но абу на помöдзыс.

Воис ар, а колö на вöлi радио линия нюжöдны Щукино грездöдз, а тайö ещö на километр гöгöр. Но вöчны нинöм, кöсйысьöма план тыртны ноябрь тöлысся праздник кежлö – колö вöчны. Нюжöдiсны и сэтчöдз радио проводтö. Быд керка стенö, а керкаыс грездас вöлi сöмын кöкъямыс, вöчисны розь, пуктiсны пытшкöсас розеткаяс.

Щукино грездса олысьяс уджалiсны колхозын, уджсьыс налы сьöм местаö сетлывлiсны сю, ещö мыйсюрö. Радио проводтö нюжöдiсны, а радиотö йöзлы ньöбны нинöм вылö, дай некысь. Лиза тьöтлöн Öльöксан пиыс велöдчис Гöрд Затонын мотористö и уджалiс пароход вылын. Мамыс и корас сiйöс ньöбны радиотö. Коркö и ваяс Лизалы пиыс радиотö – ыджыд сьöд тасьтi кодь найö сэки вöлiны. Öшöдас стенас, розеткаас сюяс штепсельнöй вилкисö и мунас. И некод вöлi грездсаясысь оз тöд, кор проводъяс кузя грездö воас радио шыыс.

Пуксис нин сёр ар, рытъясын пемдыны пондiс водз. Öти татшöм рытö, вит часыс эз на вöв, Лиза тьöт юкталас ыжъяссö да мунiс суседка дорас – Терень гöтыр Öльöксандра ордö рытсö коллявны. Мыйтакö больгыштiсны нывбабаясыд, да Лизаыд и мöдöдчас гортас. Терень гöтыр эз на вевъяв игнасьны, а суседкаыс звирк бара пырас керкаас – повзьöмысла чужöмыс весиг вежсьöма, кыв шуны оз вермы. Лолыштiс да век жö вермис шуны: «Локтö, локтö ветлам ме дорö. Керка тыр шпанаяс пырöмаöсь, гораа рочöн сёрнитöны. А кытi пырöмаöсь, ог тöд, кыльчöыс тай таса-а. Тыдалö пöсйывтi. Но лок нин, петалам!»

Терень гöтыр горöдiс челядьсö – Павелсö да Зоясö, и мöдöдчисны: Павел киас босьтiс чер, Зоя – джыбан. Локтiсны кыльчö дорö, сувтiсны, кывзысисны – збыльысь рочöн сёрнитöны унаöн. Оз тöдны нывбабаяс да челядь, мый вöчны. Друг тыдовтчис Сандрö Валь, ветлöма кытчöкö. Аддзис йöзтö, сувтiс, юалiс: «Мый сэтчö чукöртчинныд, пемыдас?»

«Со ме локтi гортö, а керкаын тырыс шпана, – бöрдöмсорöн вочавидзис Лиза, – рочöн пинясьöны. Ветлы Щукин Вась дорö, öшиняс битор тыдыштö на. Мед пищальсö босьтас да локтö татчö». Сандрö Валь нинöм эз шу, мунiс. Недыр мысти локтiсны кыкöн.

«Но, мый лоис?» – шыöдчис йöз дорö Щукин Вась.

«То тай, то, керка тыр йöз рочöн сёрнитöны, – пöшти горöдiс Лиза. – Колö вöтлыны».

Кывзiс, кывзiс Щукин Вась сёрнисö, дай шуис: «Тайö абу шпана!» 

«Кодi нö?» – юалiс Öльöксандра.

 

«Тайö севулонъяс (сiйö кадас Комиын вöлi учреждение «Северное управление лагерей особого назначения», дженьыда кö – Севулон) – вочавидзис Щукин Вась. – Шпанаяс кö вöлiны, гораа эз сёрнитны. Найö полöны, медым бара тюрмаад не шедны. А севулонъясыд вöд прöстöй йöз, кодi начальстволы вочча мыйкö шуисны. Наянöс пыр жö нимтiсны «враг народаöн» и лагерьö». Щукин Вась каис кыльчö вылас, öдзöссö йöткыштiс ки пыдöснас. Öдзöсыс гиль-голь мунi быдöн. Керка пытшкöсас лöнис.

«То вöд, то вöд, – серамöн моз шуис Терень гöтыр Öльöксандра. – Сэтшöма повзисны, быттьö тöдöны, мый керкаас пищаля мужичöй пырö».

Сэсся Василей керка öдзöссö гурйыв восьтiс, порог вомöн воськовтiс да горöдiс: «Руки вверх! Стрелять буду!»

Керкаас чöв-лöнь, некод эз шыась. Друг стенсянь горöдiсны комиöн: «Бур рыт, дона ёртъяс! Сёрнитö Сыктывкар. Сетам бöръя юöръяс».

Клопнитiс кокнас джоджас Щукин Вась: «Тэ мый, Лизавета тьöт, эн висьтав, мый тэнад радио эм!»

«Ме и ачым эг тöд, кор сiйö пондас сёрнитны», – вочавидзис Васьлы Лиза тьöт. Та бöрын Лиза öзтiс стеклöа лампа. Сэсся тэрмасьöмöн пач вом дорö самöвар сувтöдiс пузьöдны, а суседъяс пуксисны лабичьяс вылö да пондiсны кывзыны радио – сэнi выльторъяс висьталiсны комиöн, а сэсся сьывны пондiсны комиöн жö. Öльöксандра ваксьыны пондiс: «То вöд карад кутшöм бура сьывнытö сяммöны. Оз ми моз равзыны».

Лиза тьöт пуктiс пызан вылö самöвар, чашкаяс вайис. Сэсся пыралiс гöлбöчас да петкöдiс сэтысь öти киас сола тшак бекар, а мöдас гöрд вина сулея. «Татшöм лунад позьö и винатор ньылыштны», – шуис сiйö.

«Пукалыштiм, да и честь колö тöдны, – чеччис дыркодь пукалöм бöрти пызан сайысь Щукин Вась. – Öкмыс час рыт пондiс воны, колö водны, асыв бара сьöкыд уджалан лун». А Терень гöтыр Öльöксандра и содтыштiс: «Сэсся навернö регыд и би нюжöдасны, сюръяяс со вайисны нин. Олöмыд век бурмö, кöть эн и кувлы сэсся».

 

ВИКТОР КРУГЛИКОВ.


 

 

Комментарии (0)


Противодействие коррупции



Фотогалерея
Версия для слабовидящих