Миян бриллиант

Культураын уджалысьяс пыр шуöны, мый культура – тайö бриллиант. Быд бок бриллиантын югъялö аслыспöлöса, сiдз жö и культура öтувтö ас пытшкас уна сикас нырвизь.

Емдiн районын культура юкöн öтувтö и культура керкаяс, и библиотекаяс, и искусство школаяс, и кинотеатр, и музейяс. Уджалöны танi сё ветымынысь унджык морт. Шöр арлыдыс – 45 арöс. Медшöр мытшöдыс, кыдзи и став сиктса районъяслöн – том квалифицированнöй кадръяс тырмытöм. Медся ёна колöны сiдз шусяна векни специалистъяс – режиссёръяс, хорöн веськöдлысьяс, йöктыны велöдысьяс, библиотекаряс. Та вöсна районса культураын уджалысьяс зэв окотапырысь ветлывлöны Вениамин Чисталёв нима культура колледжö. Аттьöалöны таысь колледжса директорöс Марина Анкудиноваöс – тайö сэтшöм морт, кодi век примитö гöстьясöс зэв бура.

Неважöн Емдiн районса культураын уджалысьяс бара аддзысьлiсны мöд да коймöд курсса студентъяскöд. Емдiн районысь волiсны Вера Фомина, районса администрация культура юкöнöн веськöдлысь, да Наталия Николаева, районса методическöй шöр юкöнöн веськöдлысь. Серниыс, дерт, мунiс Емдiн район йылысь – важся да öнiя кадся олöм йылысь. Студентъяс тöдмалiсны, мый Емдiн районын эм уна промышленнöй предприятие: Зöвсьöрт посёлокын уджалö фанера вöчан комбинат, Микунь карын газ да му сир вöтлан, кöр туй станцияяс. Презентация отсöгöн лои петкöдлöма, мый олöмыс сиктын бурмö, капитальнöя дзоньталöны культура керкаяс, выльмöдöны оборудование, лöсьöдöны туйяс, лыбöны выль благоустроеннöй керкаяс, бурмö инфраструктура.

Медшöр серниыс, дерт жö, мунiс культура отрасльын уджалöм йылысь. Культураын удж зэв интереснöй, да и удждон абу вывтi ичöт. Сы вöсна, эм кö кöсйöм, студентъясöс велöдчöм помалöм бöрас корисны Емдiн районö, уджавны культура сöвмöдöм да бурмöдöм вылö.

МИЯН КОРР.