Лэбач-мародёръяс

Комиын олöны кык лэбач – рака да катша, кодъяс ёна радейтöны хулиганитны, а тшöтш и кедзовты слабджыкъясöс.

Ас нэмын унаысь казявлi да аддзылi рака-катшалысь лёк привычкаяссö. Кöть и гöгöрвоа, мый татшöм оласногыс налöн артмöма уна миллион во эволюциони-руйтiгöн, тайö лэбачъяссö ог радейт.

ГУСЯСЬÖМЫСЬ

Катша-ракаяс мый аддзасны, медводз кутшöмкö сёянтор, пыр жö гусяласны. Öтчыд йи кузя чери кыйигöн воккöд чай юим, ноп колим воисаöн, пытшкöсас тэрмос да пакетын гортса пöжас. Чери корсиг вешйим метра 50-60. Ноп дорö пыр жö локтiсны кык катша, кыскисны пакетсö нопйысь, а сэтысь пирöг кусöк. Повзьöдiм, бокö пуктiм налы сёянторсö, а ноп сиптiм. Лым вылö пирöг тор дорад эз и волыны, кöть и дыркодь на китшкисны бадь кустъяс вылас. Тыдалö, гусялöм сёяныд чöскыдджык.

Катшаяс унаысь нулiсны майтöг торъяс гожся ывлавывса ки мыскан доз дорысь. Пыралан чай юны, петан, а майтöгыд абу нин. Кыскалöны мусьыс пуктöм лук, кор сiйö абу на вужъяссьöма. Тыдалö мöвпалöны мыйкö лук увсьыс аддзыны. Кыскавлöны и мусьыс рöссада. Керка дорса быдмысь вотöсысь медъёна радейтöны крыжовник, а сiдз жö оз.

Ракаяс морт дорад озджык матöстчыны, но кор матiгöгöрсьыс некодöс оз аддзыны, тшöтш кыйöдöны, мый бы нуны.

ПОСНИ ЛЭБАЧ КЭДЗОВТÖМЫСЬ

Водзсö, челядь дырйи, сикт-грездад тулыснад вöлi локтöны уна сквореч налы лöсьöдöм позъясö. Кор вöлi петасны сквореч пияныд колькъяссьыс, да пондасны чирзöмöн корны бать-мамыслысь сёян, пыр жö локтöны катшаяс – сюясны юрнысö сквореч позъяд, медым кыскыны сэтысь посни пемöсъясöс. Бать-мамыс дерт старайтчöны дорйыны ныв-писö, но оз век тайö артмы.

Катша-ракаыд, казяласны кö, виöны быдсикас том лэбачöс, том урöс или кöчöс. Коми пединститут помалöм бöрын уджавлi От грездса школаын. Чардак вылас вöлi поздысьöны гулюяс. Быдмыштасны, петöны гуляйтны вевт вылас. А сэтысь найöс шыбитöны ракаяс, а сэсся му вылас нин виöны да сёйöны.

Быд во тöвнас пуктывла грездса керка дорö посни лэбач верданiн. Волывлöны кольквиж да руд нивджияс, жоньяс. Сёян босьтан вомыс дзöля, но катшаяс, юрсö бергöдöмöн, бокньыд, но велалiсны гусясьны. Аддза, öшиньö тракнита, лэбасны, но недыр мысти бара нин сэнöсь.

АЛЕКСАНДР ЛЮТОЕВ.

 Фото «Вперёд. Водзö»